ក្រោមទិសដៅបន្តអនុវត្តនូវគម្រោងនគរូបនីយកម្មរបស់រាជរដ្ឋាភិបាល សំណង់លំនៅដ្ឋាននានាបានរីកដុះដាលជាច្រើនសន្ធឹកសន្ធាប់ តាំងពីកណ្ដាលក្រុងរហូតដល់ជាយក្រុង។ ដោយសារតែការចង់បំពេញតម្រូវការចាំបាច់របស់អតិថិជនគ្រប់រូប គួបផ្សំនឹងយុទ្ធសាស្ត្របង្កើនការលក់របស់ខ្លួនផងនោះ ម្ចាស់បុរី គម្រោងអភិវឌ្ឍន៍នានា បានផ្ដល់ជូននូវមធ្យោបាយបង់ផ្ទះក្នុងវិធី២យ៉ាង គឺបង់ផ្ដាច់ និងបង់រម្លស់។ ហើយក្នុងការបង់រម្លស់នេះទៀតសោត ត្រូវបានបែងចែកជា ២ផ្នែកទៀតគឺ រម្លស់ជាមួយធនាគារ ឬរម្លស់ផ្ទាល់ជាមួយម្ចាស់បុរី/ល្វែង/ផ្ទះ។ ដែលការរម្លស់ជា២បែបនេះហើយ នាំឲ្យមានការពិភាក្សាវែកញែកពីសំណាក់អ្នកជំនាញហិរញ្ញវត្ថុថា ការបង់រម្លស់ផ្ទះជាមួយធនាគារ ប្រសើរជាងជាមួយម្ចាស់បុរី។ ខាងក្រោមនេះ ជាហេតុផលដែលលោកអ្នកគប្បីយល់ដឹង៖
១. ការសិក្សាយ៉ាងល្អិតល្អន់ពីលទ្ធភាពសងត្រឡប់៖
ខាងធនាគារនឹងពិនិត្យមើលយ៉ាងលម្អិតអំពីលំហូរសាច់ប្រាក់របស់អ្នកបង់ វិនិច្ឆ័យមើលលទ្ធភាពសងមកវិញក្នុងរយៈពេលកំណត់ណាមួយដែលចែងក្នុងកិច្ចសន្យា។ ការអនុវត្តកន្លងទៅ គ្រឹះស្ថានធនាគារផ្ដល់យោបល់ថា ការបង់រម្លស់នេះមិនគួរលើសពី ៣០% នៃចំណូលរួមឡើយក្នុងមួយខែ។ ម្យ៉ាងទៀត បុគ្គលិកធនាគារនឹងណែនាំលោកអ្នកថា អ្នកគួរទិញផ្ទះក្នុងតម្លៃប៉ុនណា ដើម្បីឲ្យយើងទទួលបានភាពល្អរលូន ជោគជ័យលើការទិញផ្ទះដោយសេវាបង់រម្លស់។ ប្រសិនបើគ្មានឯកសារគ្រប់គ្រាន់ដូចជាប្លង់រឹង ក្រដាសផ្ទេរកម្មសិទ្ធិត្រឹមខណ្ឌ ស្រុក ហើយលទ្ធភាពបង់ប្រាក់យើងទៅមិនរួច ធនាគារមិនផ្ដល់ឥណទានទេ ដូចនេះ មិនសូវមានហានិភ័យហិរញ្ញវត្ថុនៅថ្ងៃអនាគត។
ខុសពីខាងស្ថាប័នធនាគារ ថ្វីត្បិតតែការរម្លស់ជាមួយម្ចាស់បុរីមានភាពងាយស្រួល ដោយពុំត្រូវការឆ្លងកាត់ឯកសារស្មុគស្មាញជាច្រើនដំណាក់កាលដូចធនាគារក៏ពិតមែន ក៏ប៉ុន្តែម្ចាស់គម្រោង និងភ្នាក់ងារអចលនទ្រព្យមិនសូវបានសិក្សាលម្អិតពីលទ្ធភាព និងវាយតម្លៃពីហានិភ័យក្នុងការសងត្រឡប់របស់អតិថិជនច្រើននោះទេ។
២. អត្រាការប្រាក់៖
ធនាគារដាក់ការប្រាក់ទាបជាងការប្រាក់របស់ម្ចាស់បុរី ឬម្ចាស់គ្រប់គ្រងគម្រោងអភិវឌ្ឍន៍រហូតដល់ ៤ % ទៅ ៥% ឯណោះ។ អត្រាការប្រាក់ដែលអនុម័តដោយធនាគារ ជាទូទៅអាចចាប់ពី ៧% ឡើងទៅក្នុងមួយឆ្នាំ ជាមួយនឹងរយៈពេលកម្ចីពី ១៥-២០ ឆ្នាំ ខណៈដែលម្ចាស់បុរីកំណត់ការប្រាក់ជាមធ្យម ១២% ក្នុងមួយឆ្នាំ។ ប្រសិនបើអ្នកបង់រម្លស់ជាមួយធនាគារ អ្នកត្រូវបង់ផ្ដាច់ទៅខាងម្ចាស់គម្រោង ឬបង់រម្លស់ជាមួយម្ចាស់បុរីឱ្យបាន ២០-៣០%ជាមុនសិន ដ្បិតថា ខាងធនាគារអាចផ្ដល់កម្ចីជូនអ្នកត្រឹមតែ ៧០-៨០% តែប៉ុណ្ណោះ។ សូមសង្កត់ធ្ងន់ដែរថា ការប្រាក់កាន់តែធំទៅៗ នៅពេលដែលរយៈពេលរម្លស់កាន់តែយូរឆ្នាំ។
៣. កម្មសិទ្ធិកាន់កាប់៖
ការបង់ទិញផ្ទះបង់រម្លស់ជាមួយម្ចាស់បុរី គឺមានហានិភ័យខ្ពស់គួរសម ពីព្រោះថា ការទិញដូរគឺប្រព្រឹត្តទៅក្រោមរូបភាពត្រឹមតែកិច្ចសន្យា ពោលគឺមិនទាន់បានផ្តល់ភាពជាម្ចាស់កម្មសិទ្ធិពេញលេញមកដល់អ្នកទិញនោះឡើយ ដោយហេតុថា អតិថិជនមិនទាន់បំពេញកាតព្វកិច្ចគ្រប់គ្រាន់តាមលក្ខខណ្ឌរបស់បុរីនៅឡើយ ដើម្បីក្លាយជាម្ចាស់ផ្ទះស្របច្បាប់។ ម្យ៉ាងទៀត ម្ចាស់បុរីនឹងប្រគល់ប្លង់កម្មសិទ្ធិកាន់កាប់អចលនវត្ថុដល់អ្នកទិញនៅពេលដែលពួកគេ បានបង់ប្រាក់ដល់ចំនួនកំណត់ណាមួយ ផ្ទុយពីធនាគារដែលអ្នកទិញអាចទទួលបានប្លង់កម្មសិទ្ធិភ្លាមៗ បន្ទាប់ពីទិញរួច តាមរយៈការបង់រម្លស់ជាមួយភ្នាក់ងារធនាគារ។
ដូចនេះ ជាការល្អ ក្នុងគ្រាដំបូងៗនៃការបង់ថ្មីៗ គួរតែបង់ផ្ដាច់ ឬបង់រម្លស់តាមគោលការណ៍បុរីប៉ុន្មានភាគរាយនៃតម្លៃដើម ដើម្បីយកឈ្មោះជាម្ចាស់កម្មសិទ្ធិសិន សឹមទៅរម្លស់ជាមួយធនាគារ ដោយសារភាពរឹងមាំរបស់យើងផ្នែកច្បាប់គតិយុត្តិ គឺបានផ្ទេរសិទ្ធិពីម្ចាស់អភិវឌ្ឍន៍មកឈ្មោះយើង ដើម្បីយកទៅដាក់នៅធនាគារជាសក្ខីភាព ដូចនេះបើមានអធិករណ៍អ្វីមួយ យើងអាចតវ៉ាតាមផ្លូវច្បាប់បាន។
ការបង់រម្លស់ជាមួយម្ចាស់បុរីក៏មានអត្ថប្រយោជន៍ខ្លះដែរ ប៉ុន្តែការបង់ជាមួយធនាគារនៅតែមានភាពវិជ្ជមាន និងមានប្រៀបជាង ដ្បិតមានការណែនាំយ៉ាងយកចិត្តទុកដាក់ពីអ្នកជំនាញសេដ្ឋកិច្ច ទីប្រឹក្សាហិរញ្ញវត្ថុ។ ការបង់រម្លស់លំនៅដ្ឋានជាមួយធនាគារ គប្បីត្រៀមឯកសារឲ្យបានរឹងមាំ បង់ក្នុងរយៈពេលមិនយូរពេក និងគោរពកិច្ចសន្យាឲ្យបានខ្ជាប់ខ្ជួន ទើបការរស់នៅក្នុងគេហដ្ឋានប្រកបដោយសុខដុមរមនា។
ចុះអ្នកទាំងអស់គ្នាវិញ យល់យ៉ាងណាដែរពីការបង់រម្លស់ផ្ទះនេះ?
ចុចទីនេះដើម្បីស្វែងយល់បន្ថែមពី: ប្រភេទនៃអចលនទ្រព្យទាំង៤
Copyright Notice
© 2021 - 2022 KAKCENT
មាតិកានេះត្រូវបានរក្សាសិទ្ធិដោយកាក់សេន។
សូមទាក់ទងមកពួកយើងដើម្បីស្នើសុំការអនុញ្ញាត ប្រសិនបើអ្នកមានបំណងចង់យកមាតិការបស់យើងទៅប្រើប្រាស់បន្ត។
