៣ជំហានរក្សាសុខភាពហិរញ្ញវត្ថុ អោយកាន់តែប្រសើរ

សុខភាពហិរញ្ញវត្ថុល្អ គឺកាលណាអ្នកអាចគ្រប់គ្រងវាប្រកបដោយប្រសិទ្ធិភាព ដោយការថែរក្សា និងបន្តកែលម្អវាឲ្យបានជាប់លាប់។
ត្រឹមតែ១នាទី! ស្វែងយល់ពី ៣ជំហាននៃការរក្សាសុខភាពហិរញ្ញវត្ថុ ជាមួយកាក់សេនទាំងអស់គ្នា !!

ស្វែងយល់ពីទ្រព្យសកម្មនិងបំណុល

ទ្រព្យសកម្មរួមមានដូចជាប្រាក់ខែ ប្រាក់សន្សំ ភាគហ៊ុន រថយន្ត ឬអចលនទ្រព្យផ្សេងៗ។ ចំណែកបំណុលរួមមានដូចជា កម្ចីទិញផ្ទះ កម្ចីអាជីវកម្ម ឬបំណុលកាតឥណទានជាដើម។ ការស្វែងយល់ពីទ្រព្យសកម្ម និងបំណុលរបស់ខ្លួន គឺដើម្បីផ្ដល់ភាពងាយស្រួលក្នុងការតាមដាន ថែរក្សា និងកែសម្រួលសុខភាពហិរញ្ញវត្ថុឲ្យប្រសើរ។ និយាយឲ្យសាមញ្ញ គឺដើម្បីឲ្យប្រាកដថាបំណុលរបស់អ្នកស្ថិតក្នុងដែនកំណត់ រីឯទ្រព្យសកម្មមានគ្រប់គ្រាន់សម្រាប់តម្រូវការ។

កំណត់និងវាយតម្លៃគោលដៅហិរញ្ញវត្ថុ

មិនថាគោលដៅសម្រាប់រយៈវែង ឬខ្លី សុទ្ធតែត្រូវមានការតាមដាន និងវាយតម្លៃទៀងទាត់ និងច្បាស់លាស់។

អ្នកអាចកំណត់គោលដៅមួយសមស្រប ដោយគិតពីលទ្ធផលដែលអ្នកចង់បាន និងកំណត់រយៈពេលសមស្របមួយដែលត្រូវសម្រេចគោលដៅឲ្យបាន រួមទាំងផែនការសម្រាប់អនុវត្ត។ បន្ទាប់មក អ្នកត្រូវតាមដាន និងវាយតម្លៃគោលដៅហិរញ្ញវត្ថុនោះឡើងវិញ ដើម្បីពិនិត្យ និងកែតម្រូវវិធីសាស្ត្រអនុវត្តឲ្យកាន់តែមានប្រសិទ្ធភាព។

ពិនិត្យមើលពិន្ទុឥណទាន

ការពិនិត្យមើលពិន្ទុឥណទានរបស់ខ្លួនអាចឲ្យយើងរក្សាសមាមាត្រនៃការប្រើប្រាស់ឥណទានឲ្យនៅក្រោមការគ្រប់គ្រងល្អ។ ពេលយើងមានពិន្ទុឥណទានល្អ វាមានភាពងាយស្រួលក្នុងការស្នើសុំកម្ចីមកប្រើប្រាស់។ តួយ៉ាងដូចជាកម្ចីទិញផ្ទះ កម្ចីអាជីវកម្ម ឬកម្ចីផ្សេងៗពីធនាគារ។ យល់ល្អ អ្នកគួរតាមដានពិន្ទុឥណទានរបស់ខ្លួនរៀងរាល់មួយខែម្ដង៕