ការងារប្រហែលគ្នា ប្រាក់ខែស្របាលគ្នា ហើយបើកថ្ងៃតែមួយសោះ ហេតុអ្វីចុងខែ ដាច់យ៉ៃតែឯង? មូលហេតុគឺងាយស្រួលយល់ គឺប្រហែលគេមានក្បាច់គុណសម្រាប់គ្រប់គ្រងលុយកាក់បានល្អខុសពីយើង ។ តែយ៉ាងណាមិញ បើចេះ៤ក្បាច់ខាងក្រោមនេះយ៉ាងហោចណាស់ក៏មិនដាច់យ៉ៃរាល់ខែដែរ។
១. ដាក់គោលដៅហិរញ្ញវត្ថុឲ្យត្រឹមត្រូវ
មិនមែនឲ្យតែមានគោលដៅ ដឹងតែល្អនោះទេ ព្រោះគោលដៅខ្លះត្រូវការពេលវេលា លុយកាក់ និងការប្រឹងប្រឹងច្រើន។ ចឹងគួរចាប់ផ្តើមពីគោលដៅតូចៗមានរយៈពេលខ្លីជាមុនដូចជា សន្សំប្រាក់សម្រាប់គ្រាអាសន្ន ឬកាត់បន្ថយចំណាយប្រចាំថ្ងៃឲ្យបានជោគជ័យសិន មុននឹងគិតពីគោលដៅរយៈពេលវែងដូចជា រំលស់ផ្ទះនិងផែនការចូលនិវត្តន៍ជាដើម។
២. សង្កេតមើលចំណាយប្រចាំខែ
វាជាសកម្មភាពជួយឲ្យអ្នកដឹងពីការចំណាយប្រាក់រៀងរាល់ខែ ថាចំណាយណាចាំបាច់ ឬមិនចាំបាច់ ដោយ ធានាថាអ្នកនឹងមិនចំណាយប្រាក់ច្រើនជាងចំណូលដែលអ្នករកបាន។ មានវិធីសាស្រ្តជាច្រើនក្នុងការសង្គេតមើលការចំណាយដូចជា ការបង្កើតគណនីធនាគារដាច់ដោយឡែក ឬការកត់ត្រាទុកក្នុងសៀវភៅនូវចំណាយប្រចាំថ្ងៃនានាជាដើម។
៣. ធ្វើស្វ័យប្រវត្តិកម្មប្រាក់សន្សំ
ធនាគារនឹងកាត់យកប្រាក់នូវចំនួនជាក់លាក់ក្នុងថ្ងៃណាមួយដែលបានកំណត់ចេញគណនីធនាគារដោយស័្វយប្រវត្តិ ដូច្នេះអ្នកមិនបារម្ភខ្លាចភ្លេចដកលុយសន្សំមកចាយមុនទេ ហើយថែមទាំងសន្សំបានទៀងទាត់ទៀតផង។ អ្នកអាចធ្វើបែបនេះបាន ដោយការបើកគណនីមានភាពបត់បែន ឬគណនីសន្សំសម្រាប់អនាគតនៅគ្រឹះស្ថានហិរញ្ញវត្ថុណាមួយ។
៤. ត្រួតពិនិត្យស្ថានភាពហិរញ្ញវត្ថុឲ្យបានទៀងទាត់
យ៉ាងហោចណាស់មួយត្រីមាសម្តង គួរចំណាយពេលពិនិត្យមើលទម្លាប់ចំណាយ និងចំនួនប្រាក់សន្សំរបស់ខ្លួន ព្រោះនឹងជួយអ្នកឲ្យដឹងពីបច្ចុប្បន្នភាពនៃស្ថានភាពហិរញ្ញវត្ថុ ថាតើអ្នកអាចកាត់បន្ថយចំណាយ ឬក៏បង្កើនប្រាក់សន្សំរបស់អ្នកបន្តទៀតឬយ៉ាងណា។ វាក៏ជាពេលមើលថា អ្នកកំពុងស្ថិតលើផ្លូវត្រឹមត្រូវទៅកាន់គោលដៅហិរញ្ញវត្ថុឬយ៉ាងណា ហើយបើមិនទាន់ត្រូវទេ អ្នកក៏អាចផ្លាស់ប្តូរបានភ្លាមៗ។
ភាពជោគជ័យផ្នែកហិរញ្ញវត្ថុកើតចេញពីទម្លាប់ហិរញ្ញវត្ថុល្អៗ ហើយមានតែអ្នកទេដែលមានសិទ្ធ និងអំណាចក្នុងការផ្លាស់ប្តូរទម្លាប់ហិរញ្ញវត្ថុដើម្បីសម្រេចបានគោលដៅហិរញ្ញវត្ថុក្នុងជីវិត។ ចូរកុំបោះបង់ដោយងាយព្រោះភាគជោគជ័យពិតប្រាកដទាមទានូវការខិតខំប្រឹងប្រែង ដោយអនុវត្ត និងរក្សានូវទម្លាប់ល្អៗជាប្រចាំក្នុងរយៈពេលវែង៕
