សេវាកម្មបង់រម្លស់ អាចជួយសម្រួលដល់អតិថិជនគ្រប់រូបដែលត្រូវការទិញទំនិញភ្លាមៗ ដូចជាបង់រម្លស់ផ្ទះ ទូរសព្ទ ឬរបស់របរប្រើប្រាស់ដទៃទៀត ដោយពុំចាំបាច់ចាយលុយម្ដងទាំងដុល( បង់លុយទាំងអស់ )។ ដោយសេវាកម្មបង់រម្លស់ អ្នកត្រូវបង់ថ្លៃថេរជាប្រចាំខែទៅតាមការកំណត់ដែលបានព្រមព្រៀងគ្នាជាមួយអ្នកលក់ ឬជាមួយធនាគារ។ ថ្វីត្បិតតែ សេវាបង់រម្លស់មានភាពងាយស្រួល មិនចាំបាច់ចំណាយថវិកាទាំងដុលក៏ពិតមែន តែក៏វាមានទាំងផលចំណេញ និងកំហាតនៅក្នុងនោះ។
ក. ផលចំណេញ
១. មិនប៉ះពាល់ខ្លាំងដល់ស្ថានភាពហិរញ្ញវត្ថុ
បើសិនជាអ្នកចង់ទិញសម្ភារមួយដែលមានតម្លៃថ្លៃ ហើយអ្នកបង់លុយសរុបទិញផ្ដាច់តែម្តងនោះ អ្នកនឹងចាយលុយអស់មួយផ្នែកធំរបស់អ្នកក្នុងមួយពព្រិចភ្នែកតែប៉ុណ្ណោះ ហើយវាក៏ប៉ះពាល់ដល់គម្រោងចំណាយដទៃទៀតរបសអ្នកដែរ។ ប៉ុន្តែបើអ្នកបង់រម្លស់វិញ ចំណាយធំនោះនឹងត្រូវបានចែកទៅជាចំណាយតូចៗដែលអ្នកអាចគ្រប់គ្រងបានក្នុងរយៈពេលវែង។
២. ងាយស្រួលគ្រប់គ្រងលំហូរសាច់ប្រាក់
បើធៀបនឹងការទូទាត់សរុបតែម្ដង ការបង់រម្លស់អាចផ្ដល់ភាពងាយស្រួលក្នុងការគ្រប់គ្រងលំហូរចំណូលចំណាយប្រចាំខែជាង។ ដោយសារការបង់រម្លស់គឺបង់ជាដំណាក់កាល និងជាបំណែកចំណាយតូចៗដែលល្មមយើងអាចគ្រប់គ្រងបាន។ ម្យ៉ាងទៀត បើទំនិញឬទ្រព្យដែលអ្នកបង់រម្លស់នេះ អាចយកទៅបង្កើតចំណូលត្រឡប់មកវិញទៀតនោះ វាក៏អាចជួយសម្រួលលំហូរសាច់ប្រាក់អ្នកផងដែរ។ ឧបមាថា អ្នកបង់រម្លស់ទិញឡាន តែយកមករត់តាក់ស៊ីឬGrab ក៏អាចមានចំណូលមកវិញបានខ្លះដែរ។ បើបង់រម្លស់កុំព្យូទ័រ គប្បីប្រាកដថាអ្នកអាចរកចំណូលពីវាមកវិញ ដើម្បីជួយទប់ចំណាយដែលអ្នកត្រូវបង់ទៅគេ។
៣. អាចចាត់ទុកជាការវិនិយោគ
ការបង់រម្លស់ក៏អាចជាការវិនិយោគរយៈពេលវែងមួយដែរ ប៉ុន្តែវាអាស្រ័យលេីការវិនិយោគនេះដោយរបៀបណា។ អ្នកអាចបង្វែងការបង់រម្លស់ទៅជាការ វិនិយោគវិញបាន បេីសិនជាអ្នកប្រេីប្រាស់ការបង់រម្លស់នេះ សម្រាប់ទ្រព្យដែលមានតំលៃឬអាចផ្តល់ប្រាក់ចំណូលមកអ្នកវិញបាន។ ឧទាហរណ៍ ការបង់រម្លស់អចលនទ្រព្យ ដូចជាផ្ទះ ដី ឬខុនដូជាដេីម ដែលទ្រព្យទាំងនេះអាចឲ្យអ្នកដាក់ជួលឬលក់ហេីយទទួលបានកម្រៃពីវាផងដែរ។
ខ. កំហាត
១. ការប្រាក់
ធម្មតាទេ បើយើងជ្រើសយកការទូទាត់ប្រាក់ដោយបង់រម្លស់ វាប្រាកដជាត្រូវខាតការប្រាក់ខ្លះ អីខ្លះហើយ។ រីឯអត្រាការប្រាក់ដែលត្រូវបង់ អាចតិចឬច្រើនអាស្រ័យលើរយៈពេលនៃសេវាបង់រម្លស់ដែលអ្នកជ្រើស។ ឧបមាថា អ្នកចង់បង់រម្លស់ផ្ទះមួយល្វែង ហើយជម្រើសរយៈពេលបង់រម្លស់មាន ៥ឆ្នាំ និង ១០ឆ្នាំ សម្រាប់រយៈពេល៥ឆ្នាំ ការប្រាក់ក្នុងមួយឆ្នាំតែ២% ប៉ុណ្ណោះ តែបើបង់រយៈពេល១០ឆ្នាំ នោះការប្រាក់អាចនឹងឡើងដល់ ៤-៥% ក្នុងមួយឆ្នាំ។ តែនេះគ្រាន់តែជាឧទាហរណ៍ប៉ុណ្ណោះ ព្រោះជាក់ស្ដែងអត្រាការប្រាក់ខុសៗគ្នាអាស្រ័យលើរយៈពេលបង់រម្លស់ និងទំហំនៃកម្ចីឬថ្លៃបង់រម្លស់សរុបផងដែរ។
**សូមសាកសួរបញ្ជាក់ឱ្យច្បាស់លាស់ពីការប្រាក់ដែលអ្នកនឹងត្រូវបង់ មុនសម្រេចចិត្តប្រើសេវាបង់រម្លស់ ដើម្បីឱ្យប្រាកដថាអ្នកនឹងមានលទ្ធភាពគ្រប់គ្រាន់នឹងបង់ការប្រាក់ទាំងនោះនៅថ្ងៃមុខ។
២. បំណុលថ្មី
ការបង់រម្លស់ ក៏ចាត់ទុកជាបំណុល ដែលមានការប្រាក់ដែលត្រូវបង់ជារៀងរាល់ខែ។ ខុសគ្នាពីកម្ចីធម្មតាត្រង់ កម្ចីធម្មតាជាប្រាក់សុទ្ធ និងការរម្លស់ប្តូរមកជាទ្រព្យឬរបស់ប្រេីប្រាស់វិញ។ យ៉ាងណាមិញ អ្នកគួរពិនិត្យមេីលទៅលេីអត្រាការប្រាក់ និងតម្លៃនៃទ្រព្យឬសម្ភារនោះ ថាតេីអ្នកអាចមានលទ្ធភាពក្នុងការទិញ រឺរម្លស់រឺទេ។ ម្យ៉ាងទៀត អ្នកគួរគិតពីគុណប្រយោជន៍នៃការបង់រម្លស់នេះផង បេីសិនជាអ្នកអាចទទួលបានប្រាក់ចំណូលបន្ថែមមកវិញ ពីការបង់រម្លស់នេះ។ ដូច្នេះយេីងអាចចាត់ថា បំណុលនេះគឺជាបំណុលល្អហេីយ។
ដូច្នេះហើយ មុនពេលអ្នកជ្រើសយកការបង់រម្លស់ អ្នកគួរតែគិតពីផលចំណេញ និងកំហាតរបស់វាផង ដោយសាររបស់ខ្លះក៏អាចផ្ដល់ផលចំណេញខ្ពស់ កំហាតតិច ឯខ្លះទៀតមានផលចំណេញតិច តែកំហាតខ្ពស់វិញ៕
