ការទិញ franchise គឺជាការទិញសិទ្ធិអាជីវកម្មបន្ដពីម្ចាស់អាជីវកម្មដើម (franchisors) ដែលលក់ក្នុងទម្រង់ជាគំរូ ឬរូបមន្ដជាក់លាក់នៃប្រតិបត្តិការអាជីវកម្មខ្លួន ទៅឱ្យអ្នកទិញសិទ្ធិអាជីវកម្ម (franchisees)។ រីឯ ការបង្កើតយីហោខ្លួនឯង គឺជាការបើកអាជីវកម្មថ្មីមួយដោយគំនិតផ្ដួចផ្ដើមរបស់ខ្លួនផ្ទាល់ ហើយពុំមានការទិញសិទ្ធិពីគេដូច franchise នោះទេ។
ខាងក្រោមគឺគុណសម្បត្តិ និងគុណវិបត្តិមួយចំនួនដែលអ្នកគួរដឹងពីការទិញ franchise និងការបង្កើតម៉ាកយីហោខ្លួនឯង ដែលអ្នកអាចយកទៅពិចារណា។
Franchising
#គុណសម្បត្តិ
- អត្រាជោគជ័យខ្ពស់៖ អ្នកអាចទទួលបានការជួយជ្រោមជ្រែងពី franchisors តាមរយៈការទទួលបានគំរូអាជីវកម្មដែលដើរស្រាប់ វត្ថុធាតុដើមមានគុណភាព និងយុទ្ធសាស្ត្រគ្រប់គ្រងអាជីវកម្មមានប្រសិទ្ធភាព។ បើយោងទៅតាមទិន្នន័យរបស់ The U.S. Census Bureau បានបញ្ជាក់ថា ដំណើរការអាជីវកម្មដោយទិញ franchise មានអត្រាជោគជ័យច្រើនជាងអាជីវកម្មដំណើរការដោយខ្លួនឯង។ ជាងនេះទៅទៀត បើយោងតាមរបាយការណ៍ចេញដោយ Service Employees International Union នៅសហរដ្ឋអាមេរិច មានកម្ចី 17% ប៉ុណ្ណោះនៃកម្ចីយកទៅទិញ franchise សរុប ដែលផ្ដល់ឱ្យដោយ Small Business Administration បានទទួលបរាជ័យ (គិតចាប់ពីឆ្នាំ 1991 ដល់ 2010)។
- ហានិភ័យហិរញ្ញវត្ថុត្រូវបានកាត់បន្ថយ៖ ការគ្រប់គ្រងមិនសូវជាមានភាពស្មុគស្មាញ រីឯហិរញ្ញវត្ថុក្រុមហ៊ុនក៏មិនមានប្រឈមនឹងហានិភ័យច្រើន ដោយសារតែ franchisees បានរៀនពីយុទ្ធសាស្ត្ររៀបចំនិងគ្រប់គ្រងហិរញ្ញវត្ថុពីម្ចាស់ដើម ឬ franchisors។
- អាជីវកម្មមានកេរ្តិ៍ឈ្មោះល្បីស្រាប់៖ អាជីវកម្ម franchise ភាគច្រើន ជាអាជីវកម្មដែលមានកេរ្តិ៍ឈ្មោះល្បីល្បាញស្រាប់ហើយ និងមានអតិថិជនជាច្រើនបានស្គាល់ទាំងនៅក្នុងនិងក្រៅប្រទេស។ នេះជាហេតុ ដែលពេលអ្នកទិញអាជីវកម្ម franchise នោះមក នឹងអាចទាក់ទាញអតិថិជនបានច្រើន។
#គុណវិបត្តិ
- • ចំណាយដើមទុនច្រើន៖ ដើមទុនសម្រាប់ទិញ franchise អាចមានជាធម្យមចន្លោះពី $20,000 ទៅ $50,000 (អាចតិចជាង ឬច្រើនជាងនេះ អាស្រ័យលើប្រភេទអាជីវកម្ម) ហើយនេះគ្រាន់តែជាតម្លៃទិញឈ្មោះប្រ៊ែនគេប៉ុណ្ណោះ។ ក្រៅពីនេះ អ្នកត្រូវមានទុនបន្ថែមទៀតសម្រាប់ចំណាយ ដូចជាការដេគ័រហាង តម្លៃជួល ប្រាក់ឈ្នួលបុគ្គលិក ឯកសាររត់ការ និងសេវាកម្មផ្សព្វផ្សាយផ្សេងៗបន្ថែមទៀត ។
- អ្នកទិញ franchise មិនអាចបញ្ចេញគំនិតផ្ទាល់ខ្លួនបានច្រើន៖ Franchisor ច្រើនតម្រូវឱ្យ franchisee គោរពនិងអនុវត្តតាមលក្ខខណ្ឌនានាដូចជា ការស្លៀកពាក់របស់បុគ្គលិក ច្បាប់ទម្លាប់ ប្រព័ន្ធប្រតិបត្តិការជាដើម ដែលបានចែងក្នុងកិច្ចព្រមព្រៀងរវាង franchisor និង franchisee ដែលធ្វើឱ្យអ្នកទិញ franchise មិនអាចកែប្រែ ឬបន្ថែមអ្វីថ្មីទៅតាមគំនិតរបស់ខ្លួនលើសពីលក្ខខណ្ឌដែលបានចែងឡើយ។
- អាយុកាលនៃអាជីវកម្មមានកាលកំណត់៖ អ្នកទិញ franchise គប្បីដឹងដែរថា អាជីវកម្មដែលពួកគេទិញនោះ នឹងមិនមែនជាកម្មសិទ្ធិរបស់ពួកគេរហូតទេ។ ពោលគឺអាជីវកម្ម franchise មានកាលកំណត់អាចត្រឹមរយៈពេលណាមួយទៅតាមការកំណត់ក្នុងកិច្ចសន្យាប៉ុណ្ណោះ។ ជាទូទៅ កាលកំណត់នេះអាចមានពី 5ឆ្នាំ 10ឆ្នាំ 15ឆ្នាំ ឬ 20ឆ្នាំ។ល។
ការបង្កើតយីហោខ្លួនឯង
#គុណសម្បត្តិ
- ដើមទុនតិច៖ បើអ្នកបង្កើតយីហោខ្លួនឯង អ្នកអាចសម្រេចចិត្តទៅលើទំហំអាជីវកម្ម ទីតាំង ពេលវេលាម៉ោងដំណើរការអាជីវកម្ម ដោយខ្លួនឯង។ ម្យ៉ាងទៀត ចំណូលដែលអ្នកបានមក ក៏មិនចាំបាច់ត្រូវមានកាតព្វកិច្ចបង់ទៅឱ្យម្ចាស់ដើមដែរ (សម្រាប់ franchise អ្នកត្រូវបង់ថ្លៃសួយសារ ឬ royalty fees)។
- សេរីភាពក្នុងការប្រើប្រាស់គំនិតផ្ទាល់ខ្លួន៖ ជាម្ចាស់អាជីវកម្មផ្ទាល់ខ្លួន អ្នកមានសិទ្ធិសម្រេចចិត្តកែសម្រួលគម្រោងនិង/ឬគំរូអាជីវកម្មបានដោយឯកឯង និងមិនចាំបាច់រង់ចាំការយល់ព្រមពីអ្នកដទៃឡើយ។ ខុសប្លែកពីអាជីវកម្ម franchise អ្នកត្រូវគោរពទៅតាមលក្ខន្តិកៈដែល franchisors បានកំណត់។
- កម្មសិទ្ធិលក់ចែកចាយបន្ត៖ បើអ្នកបើកអាជីវកម្មក្រោមយីហោផ្ទាល់ខ្លួន ហើយអាជីវកម្មអ្នករីកចម្រើនជាលំដាប់ទៀតនោះ អ្នកក៏អាចក្លាយជាម្ចាស់អាជីវកម្មដែលអាចលក់ franchise បន្ដទៅឱ្យគេដែរ។
#គុណវិបត្តិ
- ហានិភ័យខ្ពស់៖ វាទាមទារឱ្យអ្នកត្រូវមានបទពិសោធន៍ច្រើន មានគំនិតថ្មីៗ ត្រូវចំណាយពេលសិក្សាស្រាវជ្រាវនិងស្វែងយល់ពីអាជីវកម្មរបស់អ្នកឱ្យបានច្រើន ផ្ទុយពី franchising។ ប្រសិនបើជំនាញគ្រប់គ្រងហិរញ្ញវត្ថុរបស់អ្នកនៅខ្សត់ខ្សោយ អ្នកអាចប្រឈមនឹងបញ្ហាហិញ្ញវត្ថុអាជីវកម្មដែលបង្កជាហានិភ័យដល់ដំណើរការអាជីវកម្មអ្នកទាំងមូល។
- ភាពលំបាកក្នុងការបង្កើតក្រុម៖ ដល់ដំណាក់កាលមួយ អ្នកអាចនឹងត្រូវការដៃគូរកស៊ី អ្នកចូលហ៊ុនបន្ថែម ឬអ្នកមានចក្ខុវិស័យក្នុងដំណើរការអាជីវកម្មដូចអ្នក ទើបការរកស៊ីអាចដំណើរការរលូនទៅមុខទៀត។ ទម្រាំអាចរកបានអ្នកមានទស្សនៈនិងផ្នត់គំនិតប្រហាក់ប្រហែលខ្លួនមិនមែនជារឿងងាយស្រួលនោះទេ ហើយនៅមិនទាន់ទាំងគិតលើគោលបំណង គោលដៅ និងភាពស្មោះត្រង់របស់បុគ្គលផង។
- ការប្រកួតប្រជែងដណ្ដើមទីផ្សារខ្ពស់៖ ដើម្បីអាចដំណើរការអាជីវកម្មប្រើយីហោខ្លួនឯងនេះដោយរលូនបាន អ្នកត្រូវចំណាយពេលច្រើនដែរលើការតាមដាននិន្នាការទីផ្សារ រៀនសូត្រពង្រឹងយុទ្ធសាស្រ្ដបន្ថែម និងត្រូវគ្រប់គ្រងអាជីវកម្មស្ទើរតែគ្រប់ផ្នែក។
បន្ទាប់ពីអានរួច តើអ្នកទាំងអស់គ្នាយល់យ៉ាងណាដែរចំពោះការទិញ franchise ពីគេ និងការបើកអាជីវកម្មដោយមានយីហោខ្លួនឯង? បើចង់បើកដំណើរការអាជីវកម្ម មួយណាជាជម្រើសរបស់អ្នកទាំងអស់គ្នា?
Click here: អាជីវកម្ម Franchise តើចំណេញយ៉ាងម៉េចខ្លះ?
