ដូចដែលបានលើកឡើងក្នុងអត្ថបទមុនរបស់កាក់សេនរួចមកហើយ ពីផលប៉ះពាល់ទាំងវិជ្ជមាននិងអវិជ្ជមានដែលជំងឺ COVID-19 មានលើអាជីវកម្មនិងសេវាកម្មមួយចំនួននៅក្នុងប្រទេសកម្ពុជា។ អស់រយៈពេលជាច្រើនខែកន្លងមកនេះ អ្នកទាំងអស់គ្នាក៏ប្រហែលជាបានឃើញហើយថាវិស័យទេសចរណ៍ ឧស្សាហកម្ម និងផលិតកម្មជាដើម បានរងឥទ្ធិពលខ្លាំងជាងគេ។ ប៉ុន្តែជាក់ស្តែង ក្រៅពីវិស័យទាំងនេះ គឺមានមុខរបរដទៃទៀតដែលរងទង្គិចខ្លាំងផងដែរ ដែលមានដូចជា៖
១. អ្នកលក់ដូរទំនិញមិនចាំបាច់ (non-essential goods)
អ្នកប្រកបមុខរបរមួយចំនួនដូចជាសំលៀកបំពាក់ សម្ភារតុបតែងខ្លួន សម្ភារលម្អផ្ទះ ឬ ទំនិញប្រណីត (luxury goods) និងទំនិញដែលបំពេញបន្ថែមដល់របៀបរស់នៅ (lifestyle products) ផ្សេងៗ ត្រូវបានរងផលប៉ះពាល់ក្នុងពេលរក្សាគម្លាតសង្គម ដោយសារតែបម្រែបម្រួលនៃតម្រូវការរបស់អ្នកប្រើប្រាស់ ត្រូវបង្វែរទៅលើតម្រូវការសំខាន់ដូចជាម្ហូបអាហារ និង សម្ភារចាំបាច់សម្រាប់ប្រើប្រាស់ប្រចាំថ្ងៃវិញ។ មុខរបរទាំងនេះបានប្រឈមនឹងការធ្លាក់ចុះនៃការលក់
ដោយសារអ្នកប្រើប្រាស់ផលិតផលទាំងនេះបានផ្លាស់ប្ដូរឥរិយាបថក្នុងការចាយវាយ ដែលអាចបង្កមកពីការប្រុងប្រយ័ត្នក្នុងការគ្រប់គ្រងលុយកាក់ និងការប្រែប្រួលនៃប្រភពចំណូល។ ម្យ៉ាងទៀត ពួកគេអាចគិតថា មុខទំនិ៊ញទាំងនេះមិនមែនជាតម្រូវការចាំបាច់ក្នុងស្ថានភាពដែលផ្ដល់អោយនេះទេ។
២. កន្លែងបម្រើសេវាកម្មកម្សាន្ត (entertainment services)
កន្លែងបម្រើសេវាកម្មកម្សាន្តដូចជារោងកុន ក្លឹប pub និងកន្លែងកំសាន្តដទៃទៀតត្រូវបានបិទបណ្តោះអាសន្ន ដែលជាកត្តានាំឲ្យប៉ះពាល់ដល់អាជីវកម្មទាំងនេះយ៉ាងខ្លាំង។ ដោយសារតែការផ្អាកដំណើរការ មុខរបរទាំងនេះពុំទទួលបានចំណូលទាល់តែសោះ ស្របពេលដែលចំណាយនៅតែមាន ហើយបុគ្គលិកក៏ត្រូវបានផ្អាកពីការងារ។ ទន្ទឹមនឹងនេះ យើងក៏បានសង្កេតឃើញដែរថា អ្នកនិយមប្រើប្រាស់សេវាកម្មកម្សាន្តទាំងនេះបានផ្លាស់ប្តូរឥរិយាបថពីការកម្សាន្តនៅខាងក្រៅ មករីករាយនឹងសកម្មភាពទាំងនេះនៅផ្ទះវិញ ដូចជាមើលNetflix ឬ ជួបជុំនៅតាមផ្ទះរៀងខ្លួនជាដើម។
ម៉្យាងវិញទៀត បើទោះបីជាសេវាកម្មកម្សាន្តទាំងនេះចាប់បើកដំណើរការវិញក្នុងពេលឆាប់ៗក៏ដោយ វាអាចនឹងត្រូវការពេលមួយរយៈទៀតទម្រាំមនុស្សហ៊ានទៅទីប្រជុំជនដូចមុន។
៣. មធ្យោបាយដឹកអ្នកដំណើរធុនតូច ទោចក្រយានយន្ត និងត្រីចក្រយានយន្ត
ចំពោះមធ្យោបាយដឹកអ្នកដំណើរដូចជា អ្នករត់ម៉ូតូឌុប ទោចក្រយានយន្តកង់បី (តុក តុក) ក៏ដូចជាត្រីចក្រយានយន្ត (Grab ឬ Passapp rickshaws) ក៏ទទួលរងនូវផលវិបាកក្នុងការរកភ្ញៀវដែរ។ ដោយហេតុថាមនុស្សមានភាពខ្លាចរអារនឹងជំងឺឆ្លង ទើបពួកគេព្យាយាមកាត់បន្ថយការមានទំនាក់ទំនងឬប៉ះពាល់នឹងវត្ថុដែលប្រឈមនឹងការប្រើប្រាស់ដោយមនុស្សច្រើននាក់ ឬដោយសាធារណជន។ ហេតុនេះហើយទើបសព្វថ្ងៃ អ្នកប្រកបមុខរបរនិងអាជីវកម្មទាំងនេះខំរិះរកវិធីរកចំណូលផ្សេង ដោយអាចផ្លាស់ប្តូរពីបម្រើការជាមធ្យោបាយដឹកអ្នកដំណើរទៅជាការបម្រើសេវាកម្មដឹកជញ្ជូនម្ហូបអាហារ ឬ ទំនិញជាដើម ទៅតាមតម្រូវការរបស់អ្នកប្រើប្រាស់នាពេលបច្ចុប្បន្ន។
សរុបទៅ បើតាមការសង្កេតជាក់ស្ដែងឃើញថា ផលប៉ះពាល់ទាំងនេះអាចបណ្ដាលមកពីការផ្លាស់ប្តូរនៃឥរិយាបថចាយវាយរបស់អតិថិជនភាគច្រើន ដោយគេមិនសូវចាយលុយដូចមុនហើយត្រូវផ្ដោតចំណាយលើតម្រូវការសំខាន់ខ្វះមិនបាន ស្របពេលដែលកម្រិតប្រាក់ចំណូលថយចុះ ក៏ដូចជាភាពខ្លាចរអារក្នុងការចេញក្រៅជួបមនុស្សច្រើនដើម្បីកាត់បន្ថយការចម្លងជំអឺរាតត្បាតនេះ។
