អីគេ? ពិពិធកម្មផលបត្រ? វិនិយោគិន ឬអ្នកមានចំណាប់អារម្មណ៍ខាងវិនិយោគ ប្រាកដជាស្គាល់ច្បាស់ហើយពីពាក្យពិពិធកម្មផលបត្រ និងគុណសម្បត្តិរបស់វា។ ប៉ុន្តែសម្រាប់អ្នកថ្មីថ្មោងជាមួយនឹងប្រធានបទវិនិយោគ ក៏គួរយល់ពីការធ្វើពិពិធកម្មផលបត្រនេះដែរ។
ពិពិធកម្មផលបត្រ បើភាសាអង់គ្លេស គេហៅថា Portfolio diversification គឺជាដំណើរការនៃការបណ្ដាក់ទុនវិនិយោគរបស់អ្នកច្រើនកន្លែង ទៅលើប្រភេទទ្រព្យ ឬមូលបត្រផ្សេងៗគ្នា ដើម្បីកាត់បន្ថយហានិភ័យទូទៅនៃផលបត្រវិនិយោគសរុបរបស់អ្នក (investment portfolio)។
សាកស្រមៃមើលថា តើនឹងមានអ្វីកើតឡើងប្រសិនបើអ្នកបណ្ដាក់ទុនទាំងអស់ដែលអ្នកមាន ទៅលើការវិនិយោគតែមួយ? អ្នកនឹងចំណេញកាក់កប ប្រសិនបើការវិនិយោគរបស់អ្នកអំណោយផល។ ចុះបើអត់អំណោយផល? ក្នុងករណីដែលតម្រូវការទីផ្សារធ្លាក់ចុះ អ្នកនឹងខាតបង់ការវិនិយោគរបស់អ្នកទាំងស្រុងដូចគ្នា។
Diversifying your investment portfolio:
ការវិនិយោគទាំងអស់សុទ្ធតែពាក់ព័ន្ធនឹងហានិភ័យមួយចំនួន។ ហេតុនេះហើយ នៅពេលដែលវិនិយោគិនធ្វើពិពិធកម្មផលបត្រ គាត់បែងចែកដើមទុនសរុបដែលគាត់មានសម្រាប់ការវិនិយោគ ទៅលើផលិតផលវិនិយោគផ្សេងៗគ្នា នោះគាត់នឹងអាចកាត់បន្ថយហានិភ័យនៃកំហាតបង់ដើមទុនទាំងអស់របស់គាត់។ បើទោះបីជាការបែងចែកផលបត្រវិនិយោគ មិនអាចធានានូវផលចំណេញខ្ពស់អីមកវិញ តែវាអាចកាត់បន្ថយនូវហានិភ័យដែលអ្នកអាចប្រឈម ផ្ទុយពីការដាក់ទុកវិនិយោគទាំងអស់នៅតែមួយកន្លែង។
យើងអាចលើកឧទាហរណ៍ងាយៗមួយអំពីការវិនិយោគលើអចលនទ្រព្យបានថា អ្នកមានលុយ ៣០ម៉ឺនដុល្លារ ហើយចង់បណ្ដាក់ទុនវិនិយោគទាំងអស់ ទិញផ្ទះទុកលក់ចេញយកចំណេញ នៅម្ដុំទួលគោក។ នោះបើចំណេញឬខាតយ៉ាងណា ហើយនិងកម្រិតហានិភ័យ គឺអាស្រ័យតែលើទ្រព្យមួយនេះតែប៉ុណ្ណោះ។ ប៉ុន្តែបើអ្នកបែងចែកទុនដែលអ្នកមាន ៣០ម៉ឺនដុល្លារនោះ ទិញផ្ទះនៅទួលគោក១ នៅតាខ្មៅ១ និងនៅជ្រោយចង្វារ១ នោះហានិភ័យដែលអ្នកប្រឈមនឹងដើមទុនសរុបរបស់អ្នក ត្រូវបានបែងចែកជាបីដែរ។ បើខាតមួយ នៅមានសង្ឃឹមមួយទៀត។ នេះហើយដែលយើងអាចហៅបានថាការធ្វើពិពិធកម្មផលបត្រ។
ក្រៅពីនេះ នៅមានវិធានការជាច្រើនទៀតដែលវិនិយោគិនអាចគិតគូរ និងដើម្បីកាត់បន្ថយកម្រិតហានិភ័យចំពោះផលបត្រវិនិយោគរបស់ពួកគេ តែសូមរង់ចាំតាមដានអត្ថបទរបស់ពួកយើងនៅពេលក្រោយទៀត៕
