នៅចាំពីប្រវត្តិទូទាត់ប្រាក់នៅកម្ពុជាទេ? ចាប់តាំងពីស.វទី១ រហូតមកដល់ពេលបច្ចុប្បន្ននេះ ប្រទេសកម្ពុជាធ្លាប់មានប្រវត្តិទូទាត់ទំនិញនឹងទំនិញដែលមានភាពសាំញ៉ាំ និងស្មុគស្មាញខ្លាំង គឺស្ថិតក្នុងអំឡុងអាណាចក្រអង្គរដ៏ធំ។
បើផ្អែកតាមប្រវត្តិសាស្ត្រក្នុងអាណាចក្រអង្គរ យើងសង្កេតឃើញថាអាណាចក្រដ៏ធំនេះពុំមានប្រព័ន្ធហិរញ្ញវត្ថុ ឬរូបិយវត្ថុប្រើប្រាស់នោះឡើយ។ វាជាចម្ងល់មួយ បើរូបិយវត្ថុ(ប្រាក់កាស)ត្រូវបានលុបបំបាត់ចោលទៅ តើអាណាចក្រដ៏ធំនេះនឹងធ្វើពាណិជ្ជកម្មបានយ៉ាងដូចម្ដេច ឬប្រជាជនមានផលលំបាកប៉ុនណាជាមួយនឹងប្រព័ន្ធដោះដូរទំនិញនឹងទំនិញនាពេលនោះ?
សង្គមដោះដូរទំនិញនិងទំនិញ ពិតជាផ្តល់ផលពិបាកយ៉ាងខ្លាំងដល់ការរស់នៅប្រចាំថ្ងៃរបស់ប្រជាជននាពេលនោះ ដ្បិតថា ប្រព័ន្ធហិរញ្ញវត្ថុគ្មានភាពត្រឹមត្រូវ ឬមាត្រដ្ឋានច្បាស់លាស់។ វាមានភាពស្មុគស្មាញ និងសាំញុាំច្រើន ដែលត្រូវឆ្លងកាត់ពីមួយដំណាក់កាលទៅមួយដំណាក់កាល ទម្រាំតែអាចដោះដូររបស់ដែលខ្លួនចង់បាន។
ឧទាហរណ៍ថា បើអ្នកចង់ដោះដូរទំនិញរបស់អ្នកជាមួយនឹងអង្ករមួយតៅ អ្នកត្រូវប្រាកដថាទំនិញដែលអ្នកចង់ដោះដូរនឹងអង្ករនោះមានតម្លៃសក្តិសម និងទទួលបានការព្រមព្រៀងពីអ្នកដែលចង់ដោះដូរ។ ក្នុងករណីដែលភាគីដែលធ្វើការដោះដូរជាមួយពុំពេញចិត្តនូវទំនិញរបស់អ្នក គេនឹងបង្គាប់អ្នកឱ្យយកទំនិញផ្សេងមកដោះដូរវិញ ដែលវាអាចជាផ្ទាំងក្រណាត់សគុណភាពល្អមួយ ទើបគេព្រមដោះដូរអង្ករ។ ដូច្នេះអ្នកត្រូវចំណាយពេលបន្ថែមទៀតដើម្បីទៅស្វែងរកផ្ទាំងក្រណាត់សនោះមកដូរយកអង្ករមួយតៅ។
ចំណែកឯការប្រមូលពន្ធ សួយសាអាករវិញទៀតសោត ក៏គេយកទំនិញទាំងនោះជាគោលផងដែរ ដែលទំនិញមួយចំនួនពុំអាចរក្សាទុកបានយូរ ជាកត្តាមួយហុចផលអវិជ្ជមានដល់អាណាចក្រអង្គរនាពេលសម័យនោះផងដែរ។
យ៉ាងណាក៏ដោយ នាសម័យបច្ចុប្បន្នវិញ ការដោះដូរទំនិញមានការរីកចម្រើនច្រើនមកហើយ ដ្បិតថាប្រព័ន្ធដោះដូរទំនិញនឹងទំនិញត្រូវបានប្ដូរមកជាប្រព័ន្ធដោះដូរទំនិញតាមបច្ចេកវិទ្យា ឬតាមប្រព័ន្ធឌីជីថល(Fintech)ដែលមានភាពរហ័ស ងាយស្រួល និង ចំណេញពេលវេលាបានច្រើន៕
ឯកសារស្រាវជ្រាវ និងដកស្រង់ចេញពី៖ សារមន្ទីរ ព្រះស្រីឦសានវរ្ម័ន (ស.ស.រ)
