អ្នកមានគេគ្រប់គ្រងលុយបែបណា?

ឆ្ងល់ថាតើអ្នកមានតែងតែមាន ហេីយកាន់តែមានថែមទៀត? បេីប្រៀបធៀប មានការងារ ឬប្រកបមុខជំនួញ រកប្រាក់ចំណូលដូចគ្នាតែពួកគាត់នៅតែមាន ឬក៏ពួកគេពូកែក្នុងការគ្រប់គ្រងលុយកាក់។ ឆ្ងល់ថាតើគន្លឹះ ឬវិធីសាស្ត្រអ្វីខ្លះដែលអ្នកមានប្រើដើម្បីមានលុយ? អីចឹង អេដមីននឹងប្រាប់គន្លឹះ ៥ ដែលអ្នកមានប្រេីប្រាស់ ដេីម្បីយល់ដឹងទាំងអស់គ្នា។

១. ចាយតិចជាងចំណូល

អ្នកមានប្រាកដណាស់មិនចាយវាយខ្ជះខ្ជាយ ទោះពួកគាត់មានប្រាក់ចំណូលបានច្រេីនក៏ដេាយពួកគេមានការផែនការចាយវាយច្បាស់លាស់ ដូចជាការចាយវាយតាមបែបក្បួន 50/30/20 5 ប្រភេទ(5 category) និងវិធីសាស្ត្រផ្សេងៗទៀត។ ពួកគេមិនចំណាយលុយ ទិញឡានថ្មីដែលឡានចាស់នៅប្រេីប្រាស់ បានទ្បេីយ ហើយពួកគាត់យល់ថាក៏មិនត្រូវដូរទូរសព្ទ័ថ្មីតាមស៊េរីចុងក្រោយទេ។ ការចាយវាយដោយមានផែនការ អាចឲ្យអ្នកមានសល់លុយកាន់តែច្រើនសម្រាប់ការវិនិយោគ ជាជាងការចាយអត់ ប្រយេាជន៍។

២. បង្កើតចំណូលបន្ថែម

អ្នកមានមិនទុកលុយចោលនោះទេ។ ពួគេយកលុយបង្កើតលុយ ដោយបង្កើនចំណូលអកម្ម (Passive income) ។ ការទិញអចលនទ្រព្យដូចជាផ្ទះ អគារ និងដីសម្រាប់ជួលជាប្រភពចំណូលអកម្ម មួយ ពីព្រោះអាចបានប្រាក់មួយចំនួនសម្រាប់ប្រចាំខែ ឬប្រចាំឆ្នាំ។ ការវិនិយោគទៅលើទីផ្សារភាគហុ៊នក៏អាច ផ្តល់ផលចំំណេញផងដែរ ប្រសិនបើទិញភាគហុ៊នក្នុងតម្លៃថោកហេីយឡើងថ្លៃ។ បុ៉ន្តែការវិនិយោគលើ អចលនទ្រព្យដូចជា ផ្ទះ និងដី អាចទទួលបានផលចំណេញច្រើន មានហានិភ័យតិចជាងកាវិនិយោគលើភាគហុ៊ន។ ពួកគេបង្កើនចំណូលបន្ថែមដោយយកលុយដែលរកបានពីជំនួញមួយទៅបណ្តាក់ទុនរកសុីបង្កើតជំនួញ ថ្មីៗទៀត។

៣. គ្រប់គ្រងបំណុលបានល្អ

យើងតែងតែលឺគេនិយាយថា កាន់តែមាន កាន់ជំពាក់បំណុលតែច្រើន។ តែតើអ្នកដឹងទេ អ្នកមានមិនមែនចេះតែខ្ចីបំណុលងាយៗនោះទេ។ ពួកគេជៀសវាងការខ្ចីបំណុលដើម្បីទិញឡានថ្លៃៗ ឬទូរសព្ទ័ ថ្មី ដែលតម្លៃធ្លាក់ចុះពេលលក់ចេញនេាះទេ។ ផ្ទុយទៅវិញ ពួកគេខ្ចីប្រាក់ដែលមានការប្រាក់ទាប ដើម្បីវិនិយោគ ដូចជា ក្នុងជំនួញ ឬពង្រីកមុខរបរដែលមានស្រាប់ ឬយកមកទិញអចលនទ្រព្យជាដើម។ អ្នកមានថ្លឹងថ្លែងថាបំណុលនឹងផ្តល់ប្រាក់ចំណេញមកវិញលើសការប្រាក់ដែលពួកគេត្រូវបង់អោយធនាគារ។

៤. រៀបចំគោលដៅហិរញ្ញវត្ថុ

ទោះបីជាមានប្រាក់ចំណូលខ្ពស់ហើយក្តី ក៏អ្នកមាននៅតែបន្តធ្វើផែនការហិរញ្ញវត្ថុ ដូចជាការសន្សំប្រាក់ ឬ ផែនការវិនិយោគ។ ពួកគេតែងតែមានផែនការហិរញ្ញវត្ថុច្បាស់លាស់ មិនថាផែនការជាផែនការរយៈពេលវែង ឬខ្លី។ ផែនការហិរញ្ញវត្ថុទាំងនោះ អាចរួមមាន ការសន្សំប្រាក់សម្រាប់ចូលនិវត្តន៏ ការសន្សំប្រាក់សម្រាប់ ពេលមានអាសន្ន ឬគោលដៅហិរញ្ញវត្ថុផ្សេងៗទៀត។ ពួកគេតែងតែអនុវត្តបានខ្ជាប់ខ្ជួននូវផែនការដែលខ្លួន បានដាក់និងមានចិត្តអំនត់អត់ធ្មត់ ទោះបីផែនការនោះមានការលំបាក។ អ្នកមានមួយចំនួនក៏មានអ្នក ជំនាញផ្តល់ប្រឹក្សាផ្នែកហិរញ្ញវត្ថុ ជួយរៀបចំផែនការហិរញ្ញវត្ថុ ឬជួយផ្តល់យោបល់លើការវិនិយោគទុនផងដែរ។

៥. មានចំណេះដឹងផ្នែកហរិញ្ញវត្ថុ

អ្នកមានមិនស្តាប់មតិយោបល់អ្នកដទៃទាំងងងឹតងងុលនោះទេ។ ពួកគេបន្តស្វែងយល់បង្កើនចំណេះដឹងបន្ថែម ដើម្បីធានាការគ្រប់គ្រងលុយកាក់បានល្អ មុននឹងសម្រចចិត្តនានា។ បទពិសោធន៍ និង ចំណេះដឹង បានមកពីការអានសៀវភៅ និងការសិក្សាស្វែងយល់ជារឿងសំខាន់ពីព្រោះ ការសម្រេចចិត្តរឿងហិរញ្ញវត្ថុជារឿងផ្ទាល់ខ្លួន ដែលយើងម្នាក់ៗត្រូវមានទំនួលខុសត្រូវដោយខ្លួនឯង។
ទម្លាប់ល្អៗទាំងនេះ មិនចាំបាច់ទាល់តែមានប្រាក់ចំណូលច្រើន ទើបអនុវត្តបាននោះទេ។ អ្នកអាចចាប់ផ្តើមធ្វើ បន្តិចៗម្តងពីពេលនេះ។ ការរកប្រាក់ចំណូលពិតជាមិនស្រួលនោះទេ ដូច្នេះយើងគួរមានផែនការក្នុងការគ្រប់គ្រង និងបង្កើតចំណូលបន្ថែម៕