កំឡុងទស្សវត្ស៍៥០ ប្រទេសកូរ៉េបានជួបនឹងវិបត្តិសង្គ្រាមសុីវិលដែលធ្វើឲ្យប្រទេសទាំងមូលមានការបែកខ្ញែកជាពីរគឺ ប្រទេសកូរ៉េខាងត្បូង និងខាងជើង។ សំណល់ភ្នក់ភ្លើងសង្គ្រាមបានធ្វើឲ្យ ប្រជាជនកូរ៉េផ្ទាល់ធ្លាក់ក្នុងភាពក្រីក្រ។ ប្រទេសក្នុងឆាកអន្តរជាតិជាច្រើនបានសំលឹងមើលមកប្រទេសនេះ ជាប្រទេសក្រីក្រដែលសេដ្ឋកិច្ចពិបាកនឹងងើបឡើងមកវិញ បើទោះបីជាប្រើពេល១០០ឆ្នាំក្នុងការស្តារមកវិញក៏ដោយ។ ប៉ុន្តែអ្វីដែលនឹកស្មានមិនដល់នោះគឺ ៧០ឆ្នាំក្រោយមក ប្រទេសកូរ៉េខាងត្បូងបានក្លាយជាប្រទេសមួយនៃ ប្រទេសមហាអំណាចទាំង១០ផ្នែកសេដ្ឋកិច្ចនៅលើពិភពលោក។ តើការងើបពីភាពក្រីក្រនេះជាអភូតហេតុ ឬក៏កើតឡើងពីការលះបង់និងការខិតខំប្រឹងប្រែង?
លុះ១០ឆ្នាំក្រោយមក រដ្ឋាភិបាលកូរ៉េខាងត្បូងបានបង្កើតនូវក្រុមប្រឹក្សាផែនការសេដ្ឋកិច្ច ដោយខាងក្រុមប្រឹក្សាក៏បានដាក់ចេញនូវយុទ្ធសាស្រ្តនយោបាយរយៈពេល៥ឆ្នាំថ្មីមួយ។ យុទ្ធសាស្រ្តនេះបង្កើតឡើងដើម្បីស្តារនូវសេដ្ឋកិច្ចរបស់ខ្លួនចេញពីភក់ជ្រាំនៃភាពក្រីក្រ ដោយត្រូវបានគេដាក់ឈ្មោះថា “the Miracle on the Han River” (អភូតហេតុទន្លេហាន់) ដោយត្រូវបានដាក់ស្នើនៅក្នុងឆ្នាំ១៩៦១ និងដាក់ដំណើរការជាផ្លូវការក្នុងឆ្នាំ១៩៦២។ ដោយគោលនយោបាយនេះបានចាប់ផ្តើមបង្វែរពី វិស័យកសិកម្មមក វិស័យវាយនភណ្ឌ ក្នុងគោលបំណងស្រោចស្រង់សេដ្ឋកិច្ចរបស់ខ្លួនឡើងវិញ។ វិស័យវាយនភណ្ឌមានការរីកលូតលាស់ជាលំដាប់ ដោយប្រទេសកូរ៉េបានជាប់ចំណាត់ថ្នាក់លេខ១ ក្នុងការនាំចេញផលិតផលវាយនភណ្ឌ និងសក់សិប្បនិម្មិតទៅក្រៅប្រទេស។
ប៉ុន្តែគោលនយោបាយមួយនេះមិនបានប្រព្រឹត្តទៅយ៉ាងរលូននោះទេ ដោយប្រទេសកូរ៉េជួបនូវបញ្ហាមួយចំនួនដូចជាកង្វះខាតហិរញ្ញវត្ថុជាដើម ម្យ៉ាងសហរដ្ឋអាមេរិចក៏បានបង្ហាញពីការមិនយល់ស្របចំពោះផែនការដែលបានដាក់ចេញមក។ បើទោះបីជាជួបនូវភាពរអាក់រអួលក៏ដោយ កូរ៉េពុំបានរាថយត្រឹមនេះឡើយ ជាចុងក្រោយកូរ៉េបានទទួលជំនួយពីប្រទេសអាល្លឺម៉ង់ខាងលិច។ ទន្ទឹមនឹងកំណើនការនាំចេញ និងការរីកលូតលាស់នូវវិស័យវាយនភណ្ឌ ប្រទេសកូរ៉េក៏បានអនុវត្តនូវគោលនយោបាយជាច្រើនផ្សេងទៀត ដូចជា ការបើកទីផ្សារសេរី និងការធ្វើសនិទានកម្មនៃអត្រាការប្តូរប្រាក់នៅក្នុងប្រទេសជាដើម។ ម្យ៉ាងទៀតកូរ៉េខាងត្បូងក៏ទទួលបានជំនួយជាច្រើន ពីប្រទេសមួយចំនួនដូចជា ប្រទេសអាល្លឺម៉ង់ខាងលិច និងប្រទេសជប៉ុនជាដើម។
ជាក់ស្តែងដូចដែលបានរៀបខាងលើ ការអភិវឌ្ឍនិងស្តារសេដ្ឋកិច្ចមួយនេះមិនមែនកើតឡើងក្នុងរយៈពេលមួយយប់នោះឡើយ គឺស្តែងចេញពីការសហការគ្នារវាងរដ្ឋាភិបាល និងប្រជាជនផ្ទាល់ គួបផ្សំជាមួយនឹងទំនាក់ទំនងការទូតដ៏ល្អរបស់កូរ៉េខាងត្បូង។ គួរឲ្យដឹងដែរថា ទម្រាំមកដល់សព្វថ្ងៃប្រទេសកូរ៉េបានអនុវត្តគោលនយោបាយផ្សេងៗទៀត ដោយគោលនយោបាយ the Miracle on the Han River គឺជាចំណុចចាប់ផ្តើមនៃការស្រោចស្រង់ប្រទេស។
ឯកសារយោង៖
Immigrant Small Business and International Economic Linkage: A Case of the Korean Wig Business in Los Angeles, 1968-1977
The Korean Economy – the Miracle on the Hangang River
South Korea, the Miracle on the Han River - BNP Paribas
Sustaining the Miracle on the Han River - OECD
Secrets behind Korea`s Economic Success
© 2021 - 2022 KAKCENT | រក្សាសិទ្ធិដោយកាក់សេន
សូមទាក់ទងមកពួកយើង ប្រសិនបើអ្នកចង់យកមាតិកាយើងទៅប្រើប្រាស់បន្ត។
