ប្រាក់ចំណេញមានតួនាទីសំខាន់ណាស់ក្នុងការជួយទ្រទ្រង់អាជីវកម្មនីមួយៗ ដ្បិតថាអាជីវកម្មមួយអាចដំណើរការ ឬរីកចម្រើនទៅមុខបាន ក៏អាស្រ័យទៅលើទំហំនៃប្រាក់ចំណេញរបស់អាជីវកម្មនោះដែរ។
សប្ដាហ៍មុន អេដមីនចែករំលែកហើយពីចំណុចសំខាន់ៗដែលអាចជួយឱ្យលក់បានច្រើន។ តែកុំច្រឡំណា! លក់បានច្រើន មិនប្រាកដថាចំណេញច្រើននោះទេ! ចង់ដឹងថាហេតុអី? អូខេ យើងមកមើលទាំងអស់គ្នាថាម៉េចបានអញ្ចឹង។
ថ្លៃលក់ – ថ្លៃដើម = ផលចំណេញ
ដើម្បីយល់ច្បាស់ យើងត្រូវយល់ពី បីចំណុចនេះសិន៖
- តម្លៃលក់
- ថ្លៃដើម
- ផលចំណេញ
ផលចំណេញ គឺបានមកពីថ្លៃលក់បាន ដកឱ្យថ្លៃចំណាយដើមទាំងអស់នៃផលិតផលឬសេវាកម្មរបស់អ្នក។
ប្រសិនបើអ្នកអាចលក់ពងទាកូនមួយបាន 1,500៛ ហើយអ្នកចាយលើថ្លៃដើមអស់ 1,000៛ នោះអ្នកនឹងចំណេញបាន 500៛ ឬ 50% នៃថ្លៃដើម ពីការលក់ផលិតផល1ឯកតា។
តែបើអ្នកលក់បានថ្លៃ ហើយថ្លៃដើមនៃផលិតផលឬសេវាកម្មរបស់អ្នកថ្លៃដែរ អញ្ចឹងតើអ្នកនឹងចំណេញយ៉ាងម៉េចទៅ?
បានន័យថា បើថ្លៃលក់ និងថ្លៃដើមស្មើគ្នា ទោះជាអ្នកលក់បានរាប់រយ រាប់ពាន់ឯកតា ក៏មិនចំណេញដែរ! មានតែអាចឡុងចុងនៅក្នុងរយៈពេលវែងទៅវិញទេ។
ក្រៅពីកំណត់តម្លៃលក់ ថ្លៃដើម និង កម្រិតចំណេញហើយ នៅមានកត្តាមួយចំនួនទៀតដែលអាជីវករគប្បីគួរពិចារណា ដើម្បីអាចចំណេញបានកាន់តែច្រើន។
កាត់បន្ថយចំណាយថ្លៃដើម (Cost)
អ្នកអាចកាត់បន្ថយចំណាយថ្លៃដើមនៃផលិតផលឬសេវាកម្មរបស់អ្នកតាមរយៈ ៖
- ចរចាជាមួយអ្នកផ្គត់ផ្គង់លើថ្លៃវត្ថុធាតុដើម
- រកអ្នកផ្គត់ផ្គង់ថ្មីដែលអាចលក់ឱ្យអ្នកក្នុងតម្លៃថោកជាងមុន
- តាមដានចំណាយជាប្រចាំដទៃទៀតដែលអាចកាត់បន្ថយបាន(1)
- ប្រៀបធៀបស្ដង់ដារអាជីវកម្ម (Benchmarking)(2)
- ត្រួតពិនិត្យនិងគ្រប់គ្រងស្តុកទំនិញឡើងវិញ(3)
ចំណាំ៖
- ចំណាយជាប្រចាំដទៃទៀត ជាឧទាហរណ៍មាន ចំណាយថ្លៃទឹកភ្លើង និងឧបករណ៍ដែលមិនសូវជាចាំបាច់ ដែលអាចកាត់បន្ថយនិងសន្សំសំចៃបាន។
- Benchmarketing គឺការប្រៀបធៀបស្តង់ដារអាជីវកម្មរបស់ខ្លួនទៅនឹងអាជីវកម្មដទៃដែលស្ថិតក្នុងប្រភេទដូចគ្នា លើការចំណាយថ្លៃដើមដូចជាចំណាយលើការជួលទីតាំង ថ្លៃទឹកភ្លើង -ល- ថាតើចំណាយរបស់យើងតិចឬច្រើន ខុសគ្នាឆ្ងាយជាងគេឬទេ។ ប្រសិនជាចំណាយច្រើនជាងគេពេកនោះ អ្នកនឹងដឹងថាចំណាយថ្លៃដើមណាខ្លះដែលខុសប្រក្រតីនិងគួរដោះស្រាយជាចាំបាច់។
- ការគ្រប់គ្រងស្តុកទំនិញឬវត្ថុធាតុដើម គឺដើម្បីកាត់បន្ថយកំហាតដោយសារទំនិញហួសកំណត់ឬខូចគុណភាព និងដើម្បីអាចទាញយកប្រយោជន៍ពីការបញ្ចុះតម្លៃពីអ្នកផ្គត់ផ្គង់។
ពិនិត្យតម្លៃលក់ឡើងវិញ (Selling Price)
តើថ្លៃលក់បច្ចុប្បន្នផ្ដល់ផលចំណេញឱ្យអ្នកបានកម្រិតណា?
ការត្រួតពិនិត្យតម្លៃលក់ឡើងវិញគឺដើម្បីលៃតម្រូវនិងកំណត់តម្លៃលក់ឱ្យបានសមរម្យទៅនឹងតម្លៃទីផ្សារ តែក៏ត្រូវរក្សាកម្រិតចំណេញ (Profit margin) នៃផលិតផលផង។
កាលណាគម្លាតថ្លៃដើមនិងថ្លៃលក់កាន់តែខ្ពស់ នោះកម្រិតចំណេញក៏កាន់តែខ្ពស់ដែរ។ ការពិនិត្យតម្លៃលក់ឡើងវិញអាចធ្វើទៅបានតាមរយៈការតាមដានជាប្រចាំនូវតម្លៃទីផ្សារ និងប្រៀបធៀបជាមួយវិធីកំណត់តម្លៃលក់របស់ខ្លួន។ ត្រូវចាំថា តម្លៃលក់នៃផលិតផលរបស់អ្នកមិនគួរខុសគ្នាឆ្ងាយពីតម្លៃទីផ្សារពេកនោះទេ តែត្រូវគិតគូរពីអតិថិជនរបស់អ្នកផងដែរ
ព្រោះតម្លៃលក់គួរតែសមរម្យ អាចទទួលយកបានដោយអតិថិជនគោលដៅរបស់អ្នក ហើយសមាមាត្រទៅនឹងគុណភាពនិងសេវាកម្មបំពេញបន្ថែមដោយអាជីវកម្មរបស់អ្នកផង។
លក់ឱ្យបានច្រើន!
បន្ទាប់ពីអាចកំណត់កម្រិតចំណេញនៃផលិតផលឬសេវាកម្មក្នុង១ឯកតាហើយ អ្នកក៏ត្រូវលក់ឱ្យបានច្រើនឯកតាដែរ។ ជាពិសេសនោះ គឺគួរផ្ដោតសំខាន់នូវយុទ្ធសាស្ត្រលក់ឱ្យបានច្រើនចំពោះផលិតផលឬសេវាកម្មដែលមានកម្រិតចំណេញក្នុង១ឯកតា នោះទើបផលចំណេញសរុបនឹងអាចកើនឡើងតាមនោះដែរ។
យើងសង្ឃឹមថា ចំណុចសំខាន់ៗដូចដែលបានរៀបរាប់នៅខាងលើនេះអាចជួយអ្នកក្នុងការអនុវត្តដើម្បីរកប្រាក់ចំណេញបានច្រើនពីអាជីវកម្មរបស់អ្នក។ ម្យ៉ាងទៀត ប្រសិនបើអ្នកនៅតែជួបឧបសគ្គផ្សេងៗទៀត នោះ អ្នកអាចប្រឹក្សាយោបល់ជាមួយអ្នកជំនាញបន្ថែមទៀត ដើម្បីអាចសម្រេចចិត្តឱ្យបានត្រឹមត្រូវ។
