ការគ្រប់គ្រងហិរញ្ញវត្ថុផ្ទាល់ខ្លួនរាប់ចាប់ពីការគ្រប់គ្រងចំណូលចំណាយ ផែនការសន្សំ គម្រោងចូលនិវត្តន៍ ការវិនិយោគ និងផ្នែកពាក់ព័ន្ធដទៃទៀត។ ប៉ុន្តែអ្នកដឹងទេថា ការប្រើប្រាស់សេវាធានារ៉ាប់រងក៏ជាផ្នែកមួយសំខាន់នៃការគ្រប់គ្រងហិរញ្ញវត្ថុផ្ទាល់ខ្លួនដែរ។ ខាងក្រោមនេះ យើងនឹងវែកញែកថាវាសំខាន់ត្រង់ណាខ្លះ។
យើងដឹងហើយថា គោលបំណងចំបងនៃការទិញធានារ៉ាប់រងគឺដើម្បីការពារអ្នកនិងសុខភាពហិរញ្ញវត្ថុរបស់អ្នកពីការខាតបង់ដែលមិនបានដឹងមុន។
សាកគិតមើលទាំងអស់គ្នាមើល៍ថា បើសិនជាអ្នកជួបប្រទះនឹងហេតុការណ៍ណាមួយដែលតម្រូវឱ្យអ្នកខាតបង់ហិរញ្ញវត្ថុផ្ទាល់ខ្លួនភ្លាមៗ តើអ្នកនឹងដោះស្រាយដូចម្ដេច?
- បើអ្នកបានត្រៀមខ្លួនផ្នែកហិរញ្ញវត្ថុសម្រាប់បញ្ហាបន្ទាន់ នោះស្ថានភាពហិរញ្ញវត្ថុរបស់អ្នកនឹងមិនទទួលរងផលប៉ះពាល់ខ្លាំងនោះទេ។
- តែបើអ្នកមិនបានត្រៀមខ្លួនផ្នែកហិរញ្ញវត្ថុទេ ហើយថែមទាំងគ្មានធានារ៉ាប់រងទៀតនោះ អ្នកនឹងត្រូវដោះស្រាយដោយខ្លួនឯង ដោយជម្រើសអាចមានដូចជា ទៅខ្ចីលុយញាតិមិត្តឬធនាគារ ដកលុយសន្សំផ្ទាល់ខ្លួន បញ្ចាំទ្រព្យសម្បត្តិជាដើម។ វានឹងប៉ះពាល់ដល់ស្ថានភាពហិរញ្ញវត្ថុ ជាពិសេសគឺគោលដៅហិរញ្ញវត្ថុរបស់អ្នកតែម្ដង។
- ដោយឡែក ប្រសិនបើអ្នកបានទិញធានារ៉ាប់រងទុកជាមុនវិញ នៅពេលមានហេតុការណ៍ដែលត្រូវការដំណោះស្រាយផ្នែកហិរញ្ញវត្ថុនោះ វានឹងអាចជួយអ្នកបានយ៉ាងហោចណាស់ក៏មួយផ្នែកដែរ។
ឧទាហរណ៍ ចំពោះករណីគ្រោះថ្នាក់ចរាចរណ៍ ដែលបង្កឱ្យមានការខាតបង់ទាំងយានយន្តផ្ទាល់ខ្លួននិងអ្នកដទៃ។ កាលបើមានធានារ៉ាប់រង យ៉ាងហោចណាស់អ្នកក៏អាចទទួលបានជំនួយជាសំណងលើការខូចខាតទាំងចំពោះខ្លួនឯងនិងអ្នកដែលរងគ្រោះថ្នាក់នោះផងដែរ។ បើទោះបីជាសំណងពីធានារ៉ាប់រងអាចតិចតួចក្ដី តែហោចណាស់វាអាចជួយស្រោចស្រង់អ្នកពីការប៉ះពាល់ដល់សុខភាពហិរញ្ញវត្ថុរបស់អ្នកធ្ងន់ធ្ងរ។
សូមចំណាំថា នេះគ្រាន់តែជាឧទាហរណ៍ប៉ុណ្ណោះ ដោយជាក់ស្ដែង គោលការណ៍ធានារ៉ាប់រងគឺខុសៗគ្នាអាស្រ័យលើប្រភេទកញ្ចប់សេវាធានារ៉ាប់រងនីមួយៗ ក្រុមហ៊ុនធានារ៉ាប់រងផ្សេងគ្នា អ្នកទិញធានារ៉ាប់រងផ្សេងគ្នា ទ្រព្យដែលត្រូវបានធានារ៉ាប់រងផ្សេងគ្នា នោះលក្ខខណ្ឌក្នុងគោលការណ៍ក៏ខុសគ្នាទៅតាមនោះដែរ។
បន្ថែមពីនេះ ការទិញធានារ៉ាប់រង គឺជាផ្នែកមួយនៃការរៀបចំផែនការហិរញ្ញវត្ថុផងដែរ ដោយអ្នកបានត្រៀមខ្លួនចំពោះហានិភ័យនៃការខាតបង់លុយកាក់ដែលមិនបានរំពឹងទុក ស្របពេលដែលវាប្រៀបបានដូចជាការសន្សំជាប្រចាំសម្រាប់តម្រូវការលុយកាក់ភ្លាមៗ។
ម្យ៉ាងទៀត ដើម្បីធានាបានថា អ្នកនៅតែអាចបន្តដំណើរសម្រចនូវគោលដៅហិរញ្ញវត្ថុរបស់អ្នក បើទោះបីជាអ្នកបានប្រឈមមុខនឹងវិបត្តិហិរញ្ញវត្ថុក៏ដោយ។ ចំណែកឯមូលនិធិបន្ទាន់របស់អ្នកដែលបានសន្សំកន្លងមកហើយនោះក៏នៅដដែល មិនរងទង្គិចដោយមិនត្រូវដកយកទៅចំណាយលើបញ្ហាកើតមានភ្លាមៗនោះទេ៕
