ប័ណ្ណធានារ៉ាប់រង សំដៅទៅលើកិច្ចសន្យាដែលតំណាងថា អ្នកដែលទិញប័ណ្ណធានារ៉ាប់រងត្រូវបង់ប្រាក់តាមថេរវេលាមួយជាក់លាក់ទៅកាន់ក្រុមហ៊ុនធានារ៉ាប់រង ហើយនៅពេលមានគ្រោះថ្នាក់អ្វីមួយដែលបានចែងនៅក្នុងកិច្ចសន្យានោះ អ្នកទិញនឹងទទួលបានសំណងនៃការខាតបង់ពីក្រុមហ៊ុនធានារ៉ាប់រងនោះវិញ។
ប្រភេទនៃធានារ៉ាប់រងដែលចាំបាច់ និងសក្តិសមសម្រាប់អ្នកដែលមានអាយុក្រោម៣០ឆ្នាំគួរដឹង និងអាចយកទៅពិចារណាបានរួមមាន៖
១. ធានារ៉ាប់រងអាយុជីវិត
ក្នុងវ័យ២០-៣០ឆ្នាំ អ្នកប្រហែលជាអាចគិតថាធានារ៉ាប់រងនេះមិនចាំបាច់ខ្លាំងនោះទេ ប៉ុន្ដែវានឹងសំខាន់ខ្លាំងសម្រាប់អ្នកជាមេគ្រួសារ ឬជាអ្នកផ្គត់ផ្គង់ជីវភាពក្នុងគ្រួសារ ពោលគឺវានឹងជួយសម្រាប់ទុក្ខលំបាកក្រុមគ្រួសារអ្នក ក្នុងការរស់នៅបន្តទៅមុខទៀតនៅពេលអវត្តមានរបស់អ្នក។
២. ធានារ៉ាប់រងសុខភាព
យើងដឹងហើយថា ពេលមានបញ្ហាសុខភាពម្ដងៗគឺត្រូវចំណាយថវិកាអស់ច្រើន ហើយមនុស្សមួយចំនួនអាចនឹងជួបប្រទះនូវវិបត្តិហិរញ្ញវត្ថុ នៅពេលដែលពួកគេមិនបានរៀបចំកញ្ចប់ថវិកាទុកជាមុន។ អញ្ចឹងហើយទើបបានជាអ្នកគួរមានធានារ៉ាប់រងនេះ ដើម្បីធានាថារាល់ពេលដែលមានបញ្ហាសុខភាពអ្វីមួយ អ្នកនឹងមានប្រាក់ផ្គត់ផ្គង់គ្រប់គ្រាន់សម្រាប់ខ្លួនឯង។
៣. ធានារ៉ាប់រងលើយានយន្ត
ធានារ៉ាប់រងលើឡាន ឬម៉ូតូរបស់អ្នក នៅពេលអ្នកជួបបញ្ហាគ្រោះថ្នាក់ដែលធ្វើឲ្យខូចខាតដល់យានយន្តនោះ។ ផលចំណេញពីការមានធានារ៉ាប់រងប្រភេទនេះនៅអាយុក្រោម៣០ឆ្នាំ គឺថាអ្នកនឹងមិនខាតបង់ថវិកាក្នុងការជួសជុស និងតំហែរក្សាយាន្តជំនិះច្រើននោះទេ នៅពេលមានឧប្បត្តិវហេតុផ្សេងៗកើតឡើង។ ពិសេសជានេះទៅទៀត មានដឹងអត់ថា យើងមិនបាច់ឈ្លោះប្រកែករឿងចរចាតម្លៃខូចខាតជាមួយអ្នកប៉ះទង្គិចគ្នានោះទេ ព្រោះភ្នាក់ងារធានារ៉ាប់រងនឹងដោះស្រាយសម្រាប់យើង។
៤. ធានារ៉ាប់រងលើទ្រព្យសម្បត្តិ
ធានារ៉ាប់រងនេះអាចជួយសម្រាលបន្ទុកអ្នកពីការបាត់បង់ទ្រព្យពិត(Real Assets) រួមមាន ផ្ទះសំបែង ទ្រព្យសម្បត្តិ លុយកាក់ផ្សេងៗ ពេលអ្នកមានគ្រោះអាសន្នដូចជា អគ្គិភ័យ ឬគ្រោះធម្មជាតិនានា ហើយវាសក្តិសមបំផុតនៅពេលអ្នកមានគ្រួសារត្រូវរ៉ាប់រង និងអ្នកប្រកបអាជីរកម្មដែលមានហានិភ័យខ្ពស់លើទ្រព្យសម្បត្តិរបស់ពួកគេ។
យ៉ាងណាក៏ដោយ មនុស្សម្នាក់ៗអាចជួបនឹងស្ថានភាពខុសៗគ្នា ព្រមទាំងមានកញ្ចប់ថវិកាចំណាយក៏ផ្សេងៗគ្នា ដូច្នេះហើយ អ្នកគួរតែទៅពិគ្រោះជាមួយអ្នកជំនាញធានារ៉ាប់រងបន្ថែមទៅលើលក្ខខណ្ឌនីមួយៗ និងការបង់ប្រាក់របស់វា រួចធ្វើការសម្រេចចិត្តដោយខ្លួនឯងថា តើធានារ៉ាប់រងមួយណាខ្លះក្នុងចំណោមទាំង៤នេះសំខាន់សម្រាប់អ្នក៕
ចុចទីនេះស្វែងយល់បន្ថែមពី: ប្រភេទធានារ៉ាប់រងដែលអ្នកនឹងត្រូវការនាពេលអនាគត
