សន្សំលុយទុកយូរមិនមែនជាជម្រើសឆ្លាតវៃ

អ្នកទាំងអស់គ្នាមានដឹងអត់ មិនមែនឲ្យតែយកប្រាក់ទៅដាក់សន្សំនៅធនាគារ ឬក៏សន្សំទុកខ្លួនឯង គឺសុទ្ធតែល្អនិងចំណេញរហូតនោះទេ។ អត្រាការប្រាក់ពីដាក់លុយក្នុងកុងធនាគារមានពិត ប៉ុន្តែការប្រាក់នេះនឹងត្រូវខាតបង់ដោយសារអតិផរណា។ សំណួរចង់សួរថា បើខាត តើខាតដោយរបៀបណា?

ដូចដែលយើងបានពិភាក្សាត្រួសៗនៅក្នុងអត្ថបទមុនអំពីអតិផរណាអ៊ីចឹង អតិផរណាសំដៅដល់បាតុភូតដែលតម្លៃរូបិយប័ណ្ណចុះថោក និងទំនិញឡើងថ្លៃ។ ចំណែកឯ ការសន្សំប្រាក់វិញ អ្នកអាចសន្សំទុកនៅនឹងខ្លួនផ្ទាល់ ដាក់ក្នុងកូនជ្រូក ឬបង្កើតគណនីសន្សំនៅឯធនាគារដែលអាចផ្តល់នូវការប្រាក់តិចឬច្រើន អាស្រ័យទៅតាមប្រភេទគណនី ថិរវេលាផ្ញើ និងធនាគារផ្សេងគ្នា។

នៅពេលយើងដាក់ប្រាក់សន្សំនៅធនាគារក្នុងពេលកំណត់មួយ យើងតែងរំពឹងថានឹងបានប្រាក់មកវិញ គួបផ្សំជាមួយនឹងការប្រាក់ដែលទទួលបានពីធនាគារ។ ឧទាហរណ៍ថា អ្នកដាក់លុយ ១០លានរៀលសន្សំនៅធនាគារក្នុងគណនីបញ្ញើមានកាលកំណត់រយៈពេល១ឆ្នាំ ដែលមានអត្រាការប្រាក់ ៣% ដើម្បីទិញម៉ូតូ១គ្រឿងនាឆ្នាំក្រោយ។ ១ឆ្នាំក្រោយមក អ្នកនឹងទទួលបានការប្រាក់ពីគណនីសន្សំនេះ ៣០ម៉ឺនរៀល (មិនទាន់ដកពន្ធកាត់ទុក)។

បានន័យថា ក្នុងរយៈពេល១ឆ្នាំ លុយសន្សំរបស់អ្នកកើនពី ១០លានរៀល មក ១០លាន ៣សែនរៀល។ ប៉ុន្តែដោយសារអតិផរណាបានកើនឡើងដល់ ៣.៥០% នាឆ្នាំថ្មីនេះ នោះទាល់តែអ្នកមានលុយ ១០លាន ៣៥ម៉ឺនរៀល (ឬ៥ ម៉ឺនរៀលបន្ថែម) ទើបអ្នកអាចទិញម៉ូតូដែលអ្នកចង់ទិញពីឆ្នាំមុនបាន។

មានន័យថាអតិផរណា បន្ទាបតម្លៃលុយដែលយើងបានសន្សំកន្លងមកនេះ។ តួយ៉ាង កាលពីវិបត្តិសេដ្ឋកិច្ចសកលឆ្នាំ ២០០៨ សេដ្ឋកិច្ចជាតិរបស់ប្រទេសនីមួយៗទូទាំងពិភពលោករងផលប៉ះពាល់យ៉ាងដំណំ។ អ្នកដែលសន្សំប្រាក់ជួបនូវផលប៉ះពាល់ធ្ងន់ធ្ងរ ដោយតម្លៃលុយរបស់ពួកគេចុះថោកខ្លាំង ដោយសារកំណើនអតិផរណាដែលបណ្តាលមកពីវិបត្តិសេដ្ឋកិច្ចពិភពលោក។

ជាក់ស្ដែង ប្រសិនបើអ្នកដាក់ប្រាក់សន្សំក្នុងរយៈពេលខ្លីឬដាក់នៅធនាគារក្នុងគោលបំណងប្រើប្រាស់ប្រចាំថ្ងៃ ឬនាពេលឆាប់ៗខាងមុខទេ (មិនលើសពី១ឆ្នាំ) អតិផរណាពុំគួរចោទជាបញ្ហាសម្រាប់លុយសន្សំរបស់អ្នកនោះទេ។ ផ្ទុយទៅវិញ ប្រសិនបើអ្នកដាក់លុយសន្សំទុកចោលក្នុងរយៈពេលយូរ (លើសពី១ឆ្នាំឡើងទៅ រហូតដល់ ៣ឆ្នាំ ៥ឆ្នាំ ១០ឆ្នាំ) នោះវាទើបជាបញ្ហាចោទព្រោះតម្លៃលុយរបស់អ្នកនឹងធ្លាក់ចុះ ឬមិនកើនចំណេញអីសោះ ដោយសារតែកំណើននៃអតិផរណា។

ហេតុនេះហើយ ដើម្បីអាចទប់ទល់នឹងអតិផរណា អ្នកគួរយកលុយសន្សំរបស់អ្នកទៅបង្កើតប្រាក់ចំណេញមកវិញឱ្យបានច្រើនជាងការប្រាក់ដែលអាចទទួលបានពីការសន្សំនៅធនាគារ និងច្រើនជាងកំណើនអតិផរណា តាមរយៈវិធីផ្សេងៗដូចជាចូលហ៊ុនប្រកបអាជីវកម្ម ឬវិនិយោគលើភាគហ៊ុន ឬអចនទ្រព្យជាដើម៕