លុយ និងការបំពេញន័យឱ្យជីវិត

ការបំពេញន័យឱ្យជីវិតសំដៅលើការរស់នៅដែលអ្នកបានធ្វើកិច្ចការស្របនឹងគុណតម្លៃ (value) របស់អ្នក។ មនុស្សមានគុណតម្លៃខុសៗគ្នា។ អ្នកខ្លះឱ្យតម្លៃលើភាពស្មោះត្រង់ ហេតុនេះគាត់ក៏រៀនសូត្រ ប្រកាន់ជាប់ភាពស្មោះត្រង់។ អ្នកខ្លះឱ្យតម្លៃលើគ្រួសារ ការសិក្សារៀនសូត្រ ការជួយយកអាសាអ្នកដទៃ ការដើរកំសាន្ដស្វែងយល់ពីពិភពលោក ហើយខ្លះទៀតឱ្យតម្លៃលើទ្រព្យសម្បត្តិជាដើម។

ជារួម ពេលដែលអ្នករស់នៅដោយព្យាយាមអនុវត្តកិច្ចការដែលអ្នកឱ្យតម្លៃ ហើយអ្នកមានអារម្មណ៍ថា រីករាយ ស្កប់ស្កល់នោះ ហើយជាការបំពេញន័យឱ្យជីវិត។ ទោះជួបឧបសគ្គការធ្លាក់ទឹកចិត្តការប្រឆាំងក៏អ្នក នៅតែមានអារម្មណ៍ថា ជីវិតរបស់អ្នកមានន័យ និងមានតម្លៃដែរ។
ងាកមកមើលសង្គមបច្ចុប្បន្ន តើមនុស្សភាគច្រើនឱ្យតម្លៃទៅលើអ្វី? អ្នកអាចសាកល្បងមើលក្នុងបណ្ដាញសង្គម តើអ្នកច្រើនឃើញមហាជនទូទៅបង្ហាញអ្វីខ្លះ? ផ្ទះថ្មី ឡានថ្មី ខោអាវថ្មី ទូរស័ព្ទថ្មី iPhone iPad MacBook ថ្មីៗ និងការញ៉ាំហ៉ឺហានៅហាងល្បីៗ។ល។ មនុស្សហាក់ឱ្យតម្លៃខ្ពស់ទៅលើសម្ភារៈខាងក្រៅ។ លុយកាក់សំខាន់ ព្រោះវាជាមធ្យោបាយដែលទ្រទ្រង់ ផ្ដល់ផាសុកភាពដល់ជីវិតរស់នៅ និងជួយដោះស្រាយបញ្ហាផ្សេងៗជាច្រើនផងដែរ។ ប៉ុន្តែតើមានលុយច្រើនធ្វើឱ្យអ្នកមានន័យថាជីវិតរបស់អ្នកមានន័យមែនទេ?

ឧទាហរណ៍មួយអំពីមនុស្សម្នាក់ដែលបានលះបង់ការងារប្រាក់ចំណូលច្រើន មកធ្វេីការងារនឿយហត់ ដែលគាត់យល់ថាបានជួយបំពេញន័យឱ្យជីវិតរបស់គាត់។ លោក Scott Neeson នាយកប្រតិបត្តិនៃអង្គការមូលនិធិកុមារកម្ពុជា (Cambodian Children Fund) បានបោះបង់អាជីពជាប្រធានផ្នែកចែកចាយភាពយន្ដហូលីវូដនៅក្រុមហ៊ុន 20th Century Fox International កាលពីឆ្នាំ២០០៤ មកបង្កើតអង្គការមូលនិធិកុមារកម្ពុជា ក្នុងគោលបំណងជួយស្រោចស្រង់កុមារដែលរស់នៅក្នុងគំនរសម្រាមស្ទឹង មានជ័យឱ្យទទួលបានការអប់រំ និងអនាគតល្អប្រសើរដូចកុមារកម្ពុជាផ្សេងៗទៀត។

មុនពេលបោះបង់ អាជីពនៅហូលីវូដលោក Scott ធ្លាប់និយាយថា៖ “ខ្ញុំគិតថាមានអ្វីម្យ៉ាងខុសប្រក្រតីចំពោះជីវិតរបស់ខ្ញុំ គឺពេលដែលខ្ញុំមានលុយកាន់តែច្រើន ខ្ញុំកាន់តែបាត់បង់ភាពរីករាយ”។ គាត់បានបន្តធ្វើការងារសប្បុរស នេះអស់ពេល១៧ឆ្នាំហើយ និងបានជួយកុមារកម្ពុជាជាង៣ពាន់នាក់ឱ្យទទួលបានការអប់រំ និងមធ្យោបាយចាកចេញពីភាពក្រីក្រ។ ក្រៅពីនេះ យើងក៏ធ្លាប់ឃើញតារាល្បីៗដូចជា Taylor Swift Angelina Jolie Chris Pratt ជាដើម បានចំណាយពេលទៅសួរសុខទុក្ខកុមារដែលមានជំងឺមហារីកនៅតាមមន្ទីរពេទ្យ។ ទេាះពួកគាត់មានកាលវិភាគមមាញឹមក៏ដេាយ ពួកគាត់នៅតែចំណាយពេលលេងជាមួយក្មេងៗ ផ្ដល់ភាពរីករាយ និងលើកទឹកចិត្តឱ្យគិតតែអ្វីដែលវិជ្ជមាន និងផ្តល់កម្លាំងចិត្តតតាំងជាមួយជំងឺរបស់ពួកគេ។ ពួកគាត់បានឧបត្ថម្ភជាលុយកាក់ ថែមទាំង ចំណាយពេលវេលាមានតម្លៃជាមួយកុមារទាំងនោះ។

នេះសបញ្ជាក់នូវការបំពេញន័យអេាយជីវិតរបស់ពួកគាត់ ទង្វេីទាំងនេាះគឺជាសេចកី្តស្មេាះត្រង់ដែលកេីតចេញពីពួកគាត់ផ្ទាល់។ ទង្វេីបែបនេាះអាចធ្វើឱ្យពួកគាត់ ស្កប់ស្កល់ក្នុងចិត្តជាងលុយកាក់ទៅទៀតគឺ អំពើល្អបន្តិចបន្តួច ដែលពួកគាត់ជួយត្រឡប់ទៅឱ្យសង្គមវិញ ធ្វេីអេាយមនុស្សកាន់តែកក់ក្ដៅ។

បើយើងសង្កេតឱ្យមែនទែនក្នុងរង្វង់បណ្ដាញសង្គមសព្វថ្ងៃ អ្នកខ្លះបំពេញន័យឱ្យជីវិតខ្លួនឯងដោយធ្វេីការងារដែលខ្លួនស្រឡាញ់ ព្រោះពេញចិត្តនឹងធ្វើវាជារៀងរាល់ថ្ងៃ ទេាះបីការងារនេាះមានប្រាក់ខែតិច ឬហត់នឿយយ៉ាងណាក៏ដេាយ។ រីឯអ្នកខ្លះទៀត មិនបានហ៉ឺហាស៊ីវិល័យដូចគេ តែបានត្រឹមជីវិតរស់នៅស្ងប់ស្ងាត់ មានសុភមង្គលជាមួយគ្រួសារ និងមនុស្សជាទីស្រលាញ់ក៏ជាទីគាប់ចិត្តទៅហើយ។

អត្ថបទនេះ មិនមែនមានន័យថា ឱ្យតែអ្នកយកលុយហើយធ្វើដូច លេាកScott ឬបរិច្ចាគជាសប្បុរសធម៌ដូចតារាល្បីៗមួយចំនួន ទើបហៅថាជាការបំពេញន័យឱ្យជីវិតនោះទេ។ លុយនៅតែជាមធ្យោបាយសំខាន់ក្នុងការរស់នៅរបស់យើងរាល់គ្នា ប៉ុន្តែអ្នកក៏មិនគួរខ្វះនូវធាតុដ៏សំខាន់មួយដែលជួយបំពេញន័យឱ្យជីវិតរបស់អ្នកដែរ។ បើយើងទៅមើលមនុស្សជុំវិញខ្លួន មានមនុស្សមិនតិចទេដែលរកប្រាក់ចំណូលមិនបានច្រើនពិតមែន ប៉ុន្តែពួកគេក៏នៅតែរីករាយស្កប់ស្កល់នឹងជីវភាពប្រចាំថ្ងៃរបស់ពួកគេ ដោយសារតែពួកគេបានធ្វើអ្វីដែលបំពេញឱ្យជីវិតពួកគេមានន័យ៕