ចេញរកស៊ីដំបូងទាំងបាតដៃទទេ គួរត្រៀមចិត្តត្រៀមកាយដូចម្ដេចខ្លះ ?

គួរត្រៀមចិត្តត្រៀមកាយដូចម្ដេចខ្លះ ពេលចេញរកស៊ីដំបូងទាំងបាតដៃទទេស្អាត??

១ របររកស៊ីអាចជោគជ័យ តែក៏អាចបរាជ័យ

ធម្មតា ការរកស៊ីតែងមានចំណេញ មានខាត។ ចេញរកស៊ីដំបូង យើងតែងរំពឹងថានឹងទទួលបានជោគជ័យ ចំណេញបានច្រើន តែយើងក៏គួរត្រៀមចិត្តទទួលយកការបរាជ័យដែរ ប្រសិនវាកើតឡើង។ ស្របពេលអ្នកកំពុង ប្រឹងប្រែងជម្រុញឲ្យអាជីវកម្មរបស់អ្នកបានជោគជ័យ អ្នកក៏គួរត្រៀមដំណោះស្រាយ ឬវិធានការសម្រាប់ស្រោចស្រង់អាជីវកម្មមកវិញដូចគ្នា។

២ ចេញរកស៊ីអាចត្រូវជាប់ជំពាក់បំណុលគេ

អាជីវកម្មមួយកកើតមកបានដោយសារតែមានដើមទុនខ្លួនឯង។ តែអ្នករកស៊ីឆ្លាតវៃ ចេះខ្ចូីលុយពីធនាគារយកមកបង្វិលទុនរកស៊ីឲ្យកាន់តែងាយស្រួល ឬដើម្បីពង្រីកអាជីវកម្ម ឬដោះស្រាយបញ្ហានានាក្នុងដំណើរការអាជីវកម្ម។ កាលណាអ្នកមានបំណុល អ្នកមានកាតព្វកិច្ចសងម្ចាស់បំណុលរៀងរាល់ពេលកំណត់ណាមួយ ក្នុងចំនួនកំណត់មួយ។

៣ ក្លាយជាមា្ចស់អាជីវកម្ម មានទំនួលខុសត្រូវជាងមុន

ជាម្ចាស់អាជីវកម្មម្នាក់ ក៏មានន័យថាជាអ្នកដឹកនាំម្នាក់ដែរ ដោយត្រូវគ្រប់គ្រងដំណើរការអាជីវកម្មឲ្យដើរទៅមុនបានរលូន និងទទួលបានជោគជ័យ។ ជាអាជីវករម្នាក់ មិនត្រឹមតែមានទំនួលខុសត្រូវលើអាជីវកម្មប៉ុណ្ណោះទេ អ្នកត្រូវមានទំនួលខុសត្រូវដូចជាចំពោះផលិតផលឬសេវាកម្មរបស់ខ្លួនឲ្យអតិថិជន និងមើលការខុសត្រូវលើបុគ្គលិក។ល។

៤ ត្រូវប្រឈមមុខនឹងការប្រកួតប្រជែងក្នុងទីផ្សារ

ក្នុងទីផ្សារសេរី ការប្រកួតប្រជែងជារឿងធម្មតាសម្រាប់អាជីវកម្ម។ អ្នកគួរត្រៀមផែនការជាស្រេចសម្រាប់ការប្រកួតប្រជែងគ្រប់រូបភាពទាំងអស់ ដូចជាគោលការណ៍រក្សានិងបង្កើនគុណភាពផលិតផល ពង្រឹងសេវាកម្ម និងការផ្សព្វផ្សាយអាជីវកម្មឲ្យកាន់តែមានប្រសិទ្ធិភាព។

Click here to read more: Top Ten Problems Faced by Business

៥ មិនមានពេលវេលាផ្ទាល់ខ្លួនដូចមុន

ពេលមានរបររកស៊ីផ្ទាល់ខ្លួន អ្នកលែងសូវមានពេលទំនេរផ្ទាល់ខ្លួនដូចមុនហើយ ព្រោះត្រូវចំណាយពេលច្រើន ឬសឹងតែទាំងអស់ លើអាជីវកម្មដើម្បីឲ្យវាដំណើរការទៅបានរលូន។ ពេលរៀបចំមុនបើកដំណើរការ អ្នកមានការងារច្រើនរួចទៅហើយ តែពេលចាប់ផ្ដើមដំណើរការ អ្នកនឹងកាន់តែមមាញឹកជាងមុនទៅទៀត។

លើលោកនេះ គ្មានអ្វីស្រួល ឬបានមកដោយងាយៗនោះទេ។ ចាប់ផ្ដើមពីបាតដៃទទេ វាទាមទារឲ្យយើងខិតខំប្រឹងប្រែង តស៊ូ និងមិនបោះបង់។ អ្នកអាចទទួលបានផ្លែផ្កាជាទីគាប់ចិត្ត តែក៏អាចខកបំណងដោយប្រការណាមួយដែលយើងមើលមិនឃើញ។ ទោះជាយ៉ាងនេះក្ដី អ្នកគប្បីត្រៀមខ្លួនជាមុនដោយសិក្សានិងមានផែនការអាជីវកម្មច្បាស់លាស់ដើម្បីទំនុកបម្រុងជាកិច្ចនាំផ្លូវរបស់ខ្លួនពីចំណុចសូន្យឲ្យឆ្ពោះទៅមុខ៕