តើអ្នកបានធ្វើខួបកំណើតអាយុ២៩ឆ្នាំហើយឬនៅ? បើបានធ្វើហើយ មានអារម្មណ៍យ៉ាងម៉េចដែរ? យល់ថាពេលវេលាដើរទៅមុខលឿនណាស់មែនទេ? មិនទាន់បានអីផង អាយុជិតចូលក្បាលបីទៅហើយ។ ក្រឡេកក្រោយពិនិត្យមើលឡើងវិញ ដូចជាមិនមានសេសសល់អ្វីជាដុំកំភួនសោះ។
ដើម្បីឱ្យអ្នកអាចអបអរខួបកំណើតទី៣០ឆ្នាំដោយរីករាយ និងមោទនភាព អ្នកគួរចាប់ផ្ដើមយកចិត្តទុកដាក់លើចំណុចមួយចំនួនខាងក្រោមនេះ៖
១. បង្កើតទម្លាប់ហិរញ្ញវត្ថុល្អៗ
ជារឿងមួយល្អដែលអ្នកចាប់ផ្ដើមបង្កើតទម្លាប់ហិរញ្ញវត្ថុល្អៗនៅចន្លោះអាយុ២០-៣០ឆ្នាំ។ ទម្លាប់ទាំងនេះ អាចជាការរៀបចំផែនការថវិកាប្រចាំខែ ការតាមដានចំណាយប្រចាំខែទៀងទាត់ ទម្លាប់សន្សំ ប្រាក់សម្រាប់ចូលនិវត្តន៍ និងសម្រាប់គ្រាអាសន្ន ទម្លាប់បង់ថ្លៃវិក្កយប័ត្រទឹកភ្លើង និងសេវាផ្សេងៗទាន់ពេលវេលា ទម្លាប់អានសៀវភៅអំពីហិរញ្ញវត្ថុផ្ទាល់ខ្លួន។ល។ ទម្លាប់ហិរញ្ញវត្ថុល្អ ជួយសម្រួលដល់ការរស់នៅរបស់យើង ពេលដែលយើងឈានចូលដល់ដំណាក់កាលមានទំនាក់ទំនងគូស្រករ មានកូន ឬត្រូវការផ្លាស់ប្ដូរការងារ។
២. សាងអាជីពមួយរឹងមាំ
នៅចន្លោះវ័យនេះ គ្នាយើងខ្លះបានចាប់ផ្ដើមការងារដំបូងរបស់ខ្លួន ហើយអ្នកខ្លះទៀតអាចនឹងប្ដូរទៅការងារទី២ ឬទី៣។ នេះជាពេលវេលាដ៏សំខាន់ដែលអ្នកអាចរកមើលការងារមួយដែលត្រូវនឹងចំណង់ចំណូលចិត្ត និងអត្តចរិតរបស់ខ្លួន។ ទន្ទឹមនឹងនេះ បើការងារដែលអ្នកចូលចិត្តផ្ដល់ចំណូលខ្ពស់ផង កាន់តែប្រសើរ។ ពេលរកឃើញហើយ អ្នកត្រូវប្រើពេលវេលានេះធ្វើការបណ្ដើរ និងពង្រឹងជំនាញដែលការងារនេះត្រូវការក្នុងពេលទន្ទឹមគ្នា។
អ្នកក៏អាចប្រើពេលវេលានេះដើម្បីស្គាល់ និងកសាងទំនាក់ទំនង ជាមួយបុគ្គលពាក់ព័ន្ធសំខាន់ៗក្នុងវិស័យការងាររបស់អ្នកផងដែរ។ នៅចន្លោះវ័យនេះ អ្នកមានសេរីភាពច្រើនផ្នែកទាំងពេលវេលា និងសុខភាព ក្នុងការធ្វើដំណើរ និងមានពេលវេលាអាចកែកុន ឬចាប់ផ្ដើមឡើងវិញបានក្នុងករណីដែលអ្នករកមិនទាន់ឃើញការងារដែលត្រូវនឹងអ្នក។ ដើម្បីឱ្យក្លាយជាបុគ្គលិកម្នាក់ដ៏សំខាន់ អ្នកក៏អាចចាប់ផ្ដើមរៀនជំនាញថ្មីៗ ឬភាសាបរទេសបន្ថែមដែលពាក់ព័ន្ធនឹង ការងាររបស់អ្នកផង។
៣. រៀបចំផែនការចូលនិវត្តន៍
នៅអាយុជាងម្ភៃទេ ហេតុអីត្រូវគិតដល់រឿងចូលនិវត្តន៍នៅអាយុ៦០នោះ? យើងសាកគិតលេខជាមួយគ្នា បើយើងសន្សំ២៥ដុល្លាររាល់ខែ ក្នុងគណនីសន្សំសម្រាប់ចូលនិវត្តន៍ ដោយមិនប៉ះពាល់លុយនោះទាល់តែសោះ ចាប់ផ្ដើមពីអាយុ២៥ឆ្នាំ នៅថ្ងៃកំណើតវ័យ៦០ឆ្នាំរបស់អ្នក អ្នកក៏សន្សំបានប្រាក់ ១០,៥០០ដុល្លារដែរ ដោយមិនទាន់រាប់បញ្ចូលការប្រាក់ដែលអ្នកទទួលបានពីគណនីសន្សំនោះនៅឡើយទេ។ ត្បិតថា មើលមួយភ្លែត ចំនួននេះអាចមិនសូវជាច្រើនប៉ុន្មាន ប៉ុន្តែនៅវ័យចូលនិវត្តន៍ កញ្ចប់សន្សំមួយនេះនឹងជួយ សម្រាលបន្ទុកចំណាយរបស់អ្នកបានយ៉ាងច្រើន។
៤. សន្សំសម្រាប់ការបង់ Down Payment នៃកម្ចីទិញផ្ទះ
ថ្វីត្បិតថាផ្ទះជាទ្រព្យបំណុល (ចំណាយលើពន្ធ ថ្លៃថែទាំ ជួសជុល។ល។) អាចមានផ្ទះមួយជាកម្មសិទ្ធផ្ទាល់ខ្លួនមុនឈានចូលអាយុ៤០ឆ្នាំ ជាកម្លាំង និងសេរីភាពផ្លូវចិត្តមួយប្រៀបដូចជាអ្នកបានផ្ដល់រង្វាន់ធំមួយឱ្យខ្លួនឯង និងគ្រួសារដូច្នោះដែរ។ ចាត់ទុកថា ការខិតខំប្រឹងប្រែងក្រោកពីព្រលឹម ចូលគេងយប់ជ្រៅជាច្រើនឆ្នាំកន្លងមក បានហុចផលជាដុំកំភួនមួយឱ្យអ្នក គឺទីជម្រកសមរម្យ និងស្រស់ស្អាតមួយដែលអ្នកពេញចិត្ត។ បន្ថែមលើនេះ បើអ្នកមិនទាន់ចាំបាច់ត្រូវរើទៅនៅផ្ទះថ្មីទេ អ្នកក៏អាចដាក់ផ្ទះនោះជួលដើម្បីបានចំណូលបន្ថែមផងដែរ។
៥. សាកល្បងបង្កើនប្រភពចំណូល
ឆ្លៀតពេលអ្នកនៅមានពេល មានកម្លាំងកាយ កម្លាំងប្រាជ្ញា អ្នកគួរចាប់ផ្ដើមស្វែងរកប្រភពចំណូលបន្ថែម លើប្រភពចំណូលគោលដែលអ្នកទទួលបានពីប្រាក់ខែ។ ការងារក្រៅម៉ោងបែបឯករាជ្យ (freelance) ដូចជាការបកប្រែភាសា សរសេរអត្ថបទ បង្កើត និងរចនាគេហទំព័រ។ល។ សុទ្ធតែជាការងារដែលអ្នកអាចធ្វើបាន។
ក្រៅពីនេះ ការវិនិយោគក្នុងរូបភាពផ្សេងៗ និងការចាប់ផ្ដើមអាជីវកម្មដោយខ្លួនឯង ក៏ជាប្រភពចំណូលបន្ថែមដែរ។ ត្បិតថាលំបាក ហើយអ្នកអាចនឹងត្រូវដួលហើយងើបជាច្រើនដង ការចាប់ផ្ដើម វិនិយោគ និងបង្កើតអាជីវកម្មនៅវ័យក្មេងនឹងផ្ដល់មូលដ្ឋាន និងបទពិសោធន៍រឹងមាំឱ្យអ្នក។ ល្មមដល់ពេលដែលអ្នកមានទុននិងបទពិសោធន៍រកស៊ីរឹងមាំហើយ អ្នកអាចមានអាជីវកម្មល្អមួយ ហើយធ្វើជាថៅកែដោយខ្លួនឯងតែម្ដង។
៦. វិនិយោគលើខ្លួនឯង
“វិនិយោគលើខ្លួនឯង” ក្នុងអត្ថបទនេះ យើងចង់ផ្ដោតទាំងលើចំណេះដឹង ជំនាញ និងសុខភាព។ ទាន់ពេលដែលសមត្ថភាពខួរក្បាលរបស់អ្នកនៅរឹងមាំ ជាជាងទុកពេលទំនេរ អ្នកអាចចុះឈ្មោះរៀនវគ្គដែលស្របនឹងការងាររបស់អ្នក (អាចជាវគ្គខ្លី ថ្នាក់បរិញ្ញាប័ត្រ អនុបណ្ឌិត បណ្ឌិត)។ ទន្ទឹមនឹងនេះ អ្នកក៏គួរ យកចិត្តទុកដាក់ចំពោះសុខភាព ដោយធ្វើលំហាត់ប្រាណជាប្រចាំ ឆ្លៀតពេលដើរលេងលំហែរ និងប្រុងប្រយ័ត្នចំពោះរបបអាហាររបស់អ្នកផងដែរ។
៧. ទិញសេវាធានារ៉ាប់រងដែលចាំបាច់
កាក់សេនធ្លាប់បានលើកឡើងរួចមកហើយនូវប្រភេទប័ណ្ណធានារ៉ាប់រងដែលស័ក្ដិសមសម្រាប់អ្នកដែលមានអាយុក្រោម៣០ឆ្នាំ ដែលរួមមានធានារ៉ាប់រងអាយុជីវិត ធានារ៉ាប់រងសុខភាព ធានារ៉ាប់រងលើយានយន្ដ និងធានារ៉ាប់រងលើទ្រព្យសម្បតិ្ត។ ការទិញធានារ៉ាប់រងដែលសមស្របសម្រាប់ស្ថានភាពរបស់អ្នក នឹងជួយសម្រាលបន្ទុកហិរញ្ញវត្ថុសម្រាប់អ្នក និងគ្រួសារអ្នកនៅគ្រាដែលអ្នកត្រូវការចាំបាច់។
អាស្រ័យស្ថានភាពរស់នៅ លក្ខខណ្ឌហិរញ្ញវត្ថុ ចំណង់ចំណូលចិត្ត និងផែនការអនាគត អ្នកអាចនឹងរៀបចំជីវិតនៅមុនវ័យ៣០ឆ្នាំខុសៗគ្នា។ យ៉ាងណាមិញ មិនថាអ្នករៀបចំបែបណាក៏ដោយ នេះជាចន្លោះពេលដែលត្រូវការអ្នកដាក់កម្លាំងកាយ កម្លាំងចិត្តច្រើនបំផុត ព្រោះវានឹងកំណត់ស្ថានភាពរស់នៅរបស់អ្នកនៅដំណាក់កាលបន្ទាប់៕
