ការជាប់បំណុលអាចចាត់ទុកបានថាជាបន្ទុកមួយដែលអាចផ្ដល់ផលប៉ះពាល់ដល់ស្ថានភាពហិរញ្ញវត្ថុនិងជីវភាពរបស់អ្នកនាពេលអនាគត។ អញ្ចឹងហើយរាល់ពេលដែលអ្នកចង់ខ្ចីលុយពីធនាគាររឺនរណាម្នាក់ អ្នកត្រូវគិតអោយបានច្បាស់មុននឹងសម្រេចចិត្ត។
កត្តាមួយចំនួនដែលអ្នកគួរគិតពិចារណាមុននឹងសម្រេចចិត្តខ្ចី ដូចជា៖
១. គោលបំណងនៃការខ្ចីលុយ
យេីងដឹងហេីយថា រាល់ពេលខ្ចីលុយច្បាស់ជាត្រូវខាតបង់ប្រាក់ខ្លះហើយ ព្រោះត្រូវបង់ការប្រាក់អោយគេ។ ដូចនេះ មុននឹងសម្រេចចិត្តថាខ្ចីលុយគេ ត្រូវគិតពីគោលបំណងនៃការខ្ចីលុយរបស់អ្នកអោយបានច្បាស់លាស់ ថាអ្នកនឹងខ្ចីលុយនោះយកទៅធ្វើអ្វីអោយប្រាកដ។ អ្នកអាចថ្លឹងថ្លែងជាមុនសិនថាតើគោលបំណងនោះចាំបាច់ដល់កម្រិតណា ផ្តល់ប្រយោជន៍អ្វីខ្លះដល់អ្នកវិញ ហើយផលប្រយោជន៍ទាំងនោះសាកសមឲ្យអ្នកខ្ចីជាមួយនឹងអត្រាការប្រាក់ដែលអ្នកត្រូវខាតបង់រឺទេ។
២. យល់ច្បាស់ពីលក្ខខណ្ឌនៃប្រាក់កម្ចីនោះ
អ្នកត្រូវស្វែងយល់ពីលក្ខខណ្ឌផ្សេងៗនៃប្រាក់កម្ចីដូចជាកម្រិតអត្រាការប្រាក់ថាវាខ្ពស់ពេករឺអត់ រយៈពេលដែលត្រូវបង់ប្រាក់សង ហើយនិងការទាមទារអោយអ្នកដាក់ទ្រព្យបញ្ចាំរឺទេ។ អ្នកចាំបាច់ត្រូវយល់ដឹងលក្ខខណ្ឌទាំងនេះអោយច្បាស់ ដេីម្បីសិក្សាពីទំហំហានិភ័យនៃកម្ចី និងចៀសវាងធ្លាក់ខ្លួនជាប់បំណុលវ័ណ្ឌក។ លើសពីនេះ អ្នកគួរចរចាប្តូរលក្ខខណ្ឌទាំងនេះបើចាំបាច់ ក្នុងករណីវាមានភាពមិនប្រក្រតីផ្សេងៗ។ បើតាមរូបមន្តខ្ចីលុយ អ្នកមិនគួរជាប់បំណុលដែលអ្នកត្រូវសងវិញ មានចំនួនលើសពី ២៥% នៃប្រាក់ខែរបស់អ្នកឡើយ។
៣. ស្វែងរកប្រាក់កម្ចីដែលផ្តល់ប្រយោជន៍អោយអ្នក
អ្នកគួរប្រៀបធៀបប្រាក់កម្ចីផ្សេងៗគ្នាអោយបាន២ទៅ៣ រឺច្រេីនជាងនេះ ហើយព្យាយាមស្វែងរកប្រាក់កម្ចីមួយណាដែលអាចផ្តល់ប្រយោជន៍និងផលចំណេញអោយអ្នកច្រេីនជាងគេ។
ជាឧទាហរណ៍ អ្នកអាចធ្វើការប្រៀបធៀបអត្រាការប្រាក់ សិក្សានិងត្រួតពិនិត្យពីចំនួនទឹកប្រាក់ដែលអ្នកអាចខ្ចី ល័ក្ខខ័ណ្ឌក្នុងការសងប្រាក់ និងកិច្ចសន្យានៃកម្ចីនោះអោយបានច្បាស់លាស់ នោះអ្នកនឹងអាចសម្រេចបានថាជ្រើសប្រាក់កម្ចីណាដែលសមស្របតាមលទ្ធភាពដែលអ្នកអាចបង់សងវិញតាមកាលកំណត់និងក្នុងរយៈពេលសមរម្យ ហើយមិនរងកំហាតច្រើន។
៤. បំណុលគឺជាបន្ទុក
បំណុលគឺជាបន្ទុកមួយដែលអាចប៉ះពាល់ដល់ស្ថានភាពហិរញ្ញវត្ថុផ្ទាល់ខ្លួននិងកិច្ចការងារប្រចាំថ្ងៃរបស់អ្នក។ តែការខ្ចីបុលមិនមែនសុទ្ធតែអាក្រក់នោះទេ។ បើវាជាបំណុលល្អ វានឹងជួយអោយស្ថានភាពទូទៅនៃហិរញ្ញវត្ថុរបស់អ្នកមានភាពល្អប្រសេីរឡេីង។ ហេីយបំណុលដែលល្អនឹងអាចជួយអោយអ្នកដោះស្រាយបញ្ហាដែលកំពុងប្រឈម ព្រមទាំងអនុញ្ញាតអោយអ្នកមានលទ្ធភាពគ្រប់គ្រាន់ក្នុងការដោះខ្លួនចេញពីបំណុលនេះដែរ។ ប៉ុន្តែបើជាបំណុលអាក្រក់វិញ វាអាចធ្វេីអោយស្ថានភាពហិរញ្ញវត្ថុរបស់អ្នកមានភាពដុនដាបកាន់តែខ្លាំង អាចប៉ះពាល់ដល់ជីវភាពប្រចាំថ្ងៃ ហើយថែមទាំងផ្តល់ទុក្ខលំបាកទាំងផ្លូវចិត្តនិងផ្លូវកាយទៀតផង។
ហេតុនេះ មុននឹងខ្ចីលុយគេ កុំភ្លេចគិតពិចារណាលើកត្តាទាំងនេះណា៎! ហើយបើមានបងប្អូនញាតិមិត្តណាគិតគូរចង់ធ្វើកម្ចីដែរនោះ សូមជួយចែករំលែកអោយពួកគាត់ដឹងពីកត្តាទាំងនេះផង
