អ្នកណាក៏ធ្លាប់ព្យាយាមសន្សំលុយដែរ ប៉ុន្តែបញ្ហានៅត្រង់ថា ខំសន្សំបែបណាក៏មិនដែលមានលុយសល់។ តើមានធ្លាប់សួរខ្លួនឯងទេ វាបណ្តាលមកពីអ្វី? វាអាចមកពីទម្លាប់មិនល្អមួយចំនួនរបស់អ្នកផ្ទាល់។ ដូច្នេះ កាក់សេន សូមទាញចំណាប់អារម្មណ៍មិត្តអ្នកអានមកមើលទម្លាប់មិនល្អមួយចំនួនខាងក្រោម និងស្វែងយល់
ថាត្រូវធ្វើបែបណាខ្លះដើម្បីផ្លាស់ប្ដូរទម្លាប់ទាំងនេះ៖
1.អ្នកខ្ជះខ្ជាយប្រាក់កាសបន្តិចបន្តួច
ពេលខ្លះ អ្នកបែរជាគិតថា វាគ្រាន់តែជាកូនលុយបន្តិចបន្តួចប៉ុណ្ណោះ បើចាយវាក៏មិនអស់ច្រើនប៉ុន្មានដែរ។ ប៉ុន្តែបើសិនអ្នកសាកល្បងគិតម្តងទៀតថា នៅថ្ងៃណាមួយ លុយសន្សំកាក់ល្អិតនេះបូកផ្សំគ្នាបន្តិចម្ដងៗប្រាកដជានឹងក្លាយជាដុំកំភួនមិនខាន។ ចូរកុំមើលរំលងចំណុចដ៏តូចនេះ ហើយត្រូវចាំសុភាសិតខ្មែរមួយថា៖ «តក់ៗ ពេញបំពង់»។
2.អ្នកចាយមិនចំគោលដៅ
វាជាបញ្ហាសម្រាប់មនុស្សភាគច្រើន ដ្បិតមនុស្សយើងពិបាកបែងចែករវាងតម្រូវការចាំបាច់ឬមិនចាំបាច់។ បើអ្នកអាចបែងចែកតម្រូវទាំងពីរនេះបាន នោះអ្នកនឹងអាចកាត់បន្ថយចំណាយខ្លះៗ ហើយអាចសន្សំវិញបាន។
3. អ្នកចាយលើសចំណូល
អ្នកគិតថាអ្នករកចំណូលបានគ្រប់គ្រាន់ហើយ។ ប៉ុន្តែបើចំណូលរបស់អ្នកមិនល្មមសម្រាប់ការចំណាយប្រចាំខែនោះទេ ប្រាកដណាស់ អ្នកនឹងមិនសល់លុយសម្រាប់សន្សំនោះឡើយ។ ដូច្នេះ បើអ្នកមិនស្វះស្វែងរកចំណូលបន្ថែមទេ ទម្លាប់នេះនឹងមិនផ្លាស់ប្តូរទៅណាទេ។
4. អ្នកមិនមានផែនការចំណូលចំណាយ (budget plan)
ផែនការចំណូលចំណាយអាចជួយឲ្យអ្នកតាមដានការចំណាយផ្សេងៗបានយ៉ាងមានប្រសិទ្ធភាព។ វាក៏អាចជួយឲ្យអ្នកចៀសវាងការចាយវាយភ្លេចខ្លួន រហូតលើសចំណូលបានដូចគ្នា។ ផែនការចំណូលចំណាយនេះដែរ អាចជួយអ្នកក្នុងការកំណត់គោលដៅហិរញ្ញវត្ថុផ្ទាល់ខ្លួន (personal financial goals) រឺ គម្រោងសន្សំ (saving plans) ផ្សេងៗ ដែលគម្រោងទាំងនេះជំរុញឲ្យអ្នក យកចិត្តទុកដាក់លើការសន្សំបន្ថែមទៀតបាន។
5. អ្នកមិនបានត្រៀមកញ្ចប់លុយសម្រាប់ពេលអាសន្ន (emergency funds)
ការចំណាយលើការព្យាបាល (medical bills) ឬ ការជួសជុលម៉ូតូ ឡាន ឬ ផ្ទះសម្បែងជាដើម សុទ្ធសឹងតែជាចំណាយពេលមានអាសន្ន។ អ្នកមិនអាចដឹងមុនឡើយ តម្រូវការទាំងនេះនឹងមកដល់នៅពេលណាទេ។ នៅពេលមានតម្រូវការទាំងនេះ ពិតហើយថា ការចំណាយសរុបរបស់អ្នកនឹងកើនលើសពីការព្រាងទុក។ ប្រាកដណាស់ថា វានឹងប៉ះពាល់ដល់គម្រោងសន្សំលុយរបស់អ្នក តិចឬច្រើនតាមការចំណាយទាំងនោះដែរ។ ហេតុនេះហើយ អ្នកគួរតែមានកញ្ចប់លុយសម្រាប់ពេលមានអាសន្ន ដើម្បីបញ្ចៀសបញ្ហាទាំងនេះ។
ភាគច្រើន អ្នកធ្លាប់គិតថា ថ្ងៃណាសន្សំលុយក៏បាន មិនហួសពេលទេ។ ប៉ុន្តែ បើអ្នកមិនធ្វើវាពេលនេះ តើត្រូវចាំដល់ពេលណា? អ្នកពុំគួរឲ្យលេសនេះបន្តរារាំងការចាប់ផ្តើមសន្សំលុយរបស់អ្នកទេ ហើយកុំបណ្តោយឲ្យវាក្លាយជាទម្លាប់ ដ្បិតវានឹងមិនងាយផ្លាស់ប្ដូរឡើយ។ ដូចដែលបានលើកឡើងខាងលើអញ្ចឹង គ្មានអ្នកណាអាចដឹងទេថា គ្រោះអាសន្ននឹងកើតពេលណា។ បើអ្នកមានប្រាក់សន្សំខ្លះ ទោះបីតិចតួចក្ដី ក៏វាអាចជួយសម្រួលបន្ទុកបានគ្រាន់បើដែរ។
