Snowball Method គឺជាវិធីសាស្ត្រមួយនៃការសងបំណុលច្រើនក្នុងពេលតែមួយ។ វិធីសាស្ត្រនេះបង្កើតឡើងដោយអ្នកជំនាញហិរញ្ញវត្ថុ លោក Dave Ramsey ហើយវិធីសាស្ត្រសងបំណុលនេះ ផ្តោតសំខាន់ទៅលើការសងបំណុលដែលមានចំនួនតិចជាងគេជាមុន។
• វិធីសាស្ត្រដោះបំណុល Snowball Method ចាប់ផ្តើមពី៖
- ជំហានទី១៖ កត់ត្រាបំណុលរបស់អ្នកពីបំណុលតូចបំផុត ទៅបំណុលដែលធំបំផុត ដោយមិនគិតពីការប្រាក់។
- ជំហានទី២៖ សងបំណុលផ្សេងទៀតក្នុងចំនួនបន្តិចបន្តួចសិន លើកលែងតែបំណុលតូចជាងគេ គួរបង់សងឱ្យបានច្រើន
- ជំហានទី៣៖ នៅពេលសងបំណុលតូចជាងគេបង្អស់ហើយ សឹមចាប់ផ្ដើមសងបំណុលដែលតូចបន្ទាប់
- ជំហានទី៤៖ ធ្វើតាមវិធីបែបនេះរហូតដល់អ្នកទូទាត់បំណុលដែលអ្នកមានអស់។
ឧបមាថា អ្នកមានបំណុល៖
➥ ធនាគារ $1,000 បង់ប្រចាំខែ $100/ខែ
➥ មិត្តភក្តិ “ក” $100 និង មិត្តភក្តិ “ខ” $300
➥ បំណុលលើថ្លៃជួសជុលម៉ូតូ ឬឡាន $400
បើស្របតាមវិធីសាស្ត្រ Snowball Method រឿងដំបូងដែលអ្នកត្រូវដោះស្រាយ គឺដោះបំណុលជាមួយមិត្តភក្តិ "ក" មុនគេ។ អ្នកអាចសងគាត់មុន បន្ទាប់មកសឹមដោះបំណុលមិត្តភក្តិ "ខ" តាមក្រោយ។ សម្រាប់បំណុលនីមួយៗ វាមិនចាំបាច់តម្រូវឱ្យអ្នកទាល់តែមានលុយគ្រប់ ទើបសងនោះទេ អ្នកអាចសុំសងបណ្ដោះជាប្រចាំខែក្នុងចំនួនណាមួយដែលអ្នកគិតថា អ្នកមានលទ្ធភាពក៏បាន។
ឧទាហរណ៍ ក្នុងខែទី១ អ្នកត្រូវសងប្រាក់ធនាគារជាប្រចាំខែ $100 ហើយមិត្តភក្តិ “ក” អ្នកអាចលៃលកសងក្នុងចំនួនមួយឱ្យបានច្រើនតាមដែលអាចធ្វើបាន រីឯមិត្តភក្តិ “ខ” និងបំណុលថ្លៃជួលជួលយានយន្តនោះ អ្នកអាចសងបណ្ដោះបន្តិចបន្តួចបណ្ដើរសិនក៏បាន គ្រាន់តែឥឡូវអ្នកផ្ដោតលើបំណុលដែលតិចជាងគេមុនសិន។ នៅពេលអ្នកសងផ្ដាច់មិត្តភក្តិ “ក” រួចហើយ សឹមអ្នកផ្ដោតចម្បងលើបំណុលមិត្តភក្តិ “ខ” និងថ្លៃជួសជុលយានយន្តបន្តទៀត។
វិធីសាស្ត្របែបនេះ នឹងជួយអ្នកឱ្យមានកម្លាំងទឹកចិត្តដើម្បីដោះស្រាយបំណុលទាំងនោះ ដ្បិតថាអ្នកនឹងឃើញម្ចាស់បំណុលអ្នកកាន់តែតិចទៅៗ នោះឯង។
★គន្លឹះ៖ គួរស្វែងរកប្រភពចំណូលបន្ថែម ក្រៅពីប្រភពចំណូលសកម្ម (ប្រាក់ខែ)
មែនទែនទៅ ដើម្បីដោះបំណុលបាន អ្នកគួរតែមានមនសិការ និងការប្ដេជ្ញាចិត្តដូចគ្នា។ យ៉ាងណាមិញ វិធីសាស្ត្រដោះបំណុលតាមបែប Snowball Method មិនមែនជាវិធីសាស្ត្រល្អណាស់ណានោះទេ ដោយសារតែវាមិនបានគិតពីអត្រាការប្រាក់នៃបំណុលទាំងនោះឡើយ។ ប៉ុន្តែវាអាចនឹងមានឥទ្ធិពលទៅលើផ្លូវចិត្ត ឬលើកទឹកចិត្តរបស់អ្នក
ជាពិសេសគឺសម្រាប់អ្នកដែលចង់ឃើញចំនួនបំណុលរបស់ខ្លួនថយចុះ។ ម្យ៉ាងទៀត វាជាវិធីចិត្តសាស្ត្រល្អមួយ ដ្បិតថា វាបានបង្ហាញតួលេខច្បាស់លាស់ដែលអ្នកត្រូវចំណាយប្រចាំខែ ក៏ដូចជាជួយអ្នកឱ្យចៀសផុតពីការបាក់ទឹកចិត្ត (Depression) ស្ត្រេស និងមានក្ដីសង្ឃឹមឡើងវិញផងដែរ។
កាក់សេន សង្ឃឹមថាអត្ថបទនេះនឹងជួយជាវិធីខ្លះៗដើម្បីដោះស្រាយបំណុលដែលអ្នកកំពុងមាន ហើយតស៊ូឡើង កុំទាន់អាលបាក់ទឹកចិត្ត។ ជួបគ្នានៅក្នុងអត្ថបទក្រោយៗទៀតណា៎៕
