ដើរលេង​អត់ប្រយោជន៍ ហើយអស់លុយទៀត​ មែនអត់?

​អ្នកណា​ថា​ដើរលេង​អត់ប្រយោជន៍​ ​នាំឲ្យ​ខ្ជះខ្ជាយពេលវេលា​ ​និង​លុយកាក់​? ​តែ​ការពិត​មិនមែន​អ៊ីចឹង​ទេ​! ​ឥឡូវ​ចាំ​ ​កាក់​សេន​បកស្រាយ​ប្រាប់​ថា​វា​ជួយ​ជ​ម្រុ​ញ​ផលិតភាព​ការងារ​យ៉ាងម៉េច​ខ្លះ​។​

1 ​បង្កើន​គំនិតច្នៃប្រឌិត​

​នៅកន្លែង​ការងារ​ ​ស្ថិត​ក្នុង​បរិយាកាស​ដដែល​ៗ​ ​មិន​មាន​ការផ្លាស់ប្តូរ​ ​អាច​នឹង​គាំង​គំនិត​ ​គិត​អ្វី​ថ្មី​មិន​ចេញ​ ឬុ​មាន​អារម្មណ៍​ធុញទ្រាន់​នឹង​ការងារ​កំពុង​ធ្វើ​រាល់ថ្ងៃ​ក៏​ថា​បាន​។​ ​នៅ​ពេល​គំនិត​មានការ​រាំង​ស្ទះ​បែប​នេះ​ ​ការ​ក​ម្សាន្ត​បន្តិចបន្តួច​ ​ដើរផ្សងព្រេង​ ​ឡើងភ្នំ​ ​ទៅ​កោះ​ ​ឬ​កន្លែង​ដែល​មិន​មានសំឡេង​រំខាន​ដើម្បី​ទទួល​បាន​បរិយាកាស​ថ្មី​ ​បង្កើត​គំនិតច្នៃប្រឌិត​ ​ឬ​ធ្វើសកម្មភាព​ថ្មីៗ​ដែល​ពុំ​ធ្លាប់​បាន​ធ្វើ​ពីមុន​។​ ​ម៉្យាង​ ​ដំណើរ​ក​ម្សាន្ត​នឹង​ជួយ​សម្រាល​ភាព​តានតឹង​ ​ជួយ​បើកភ្នែក​ ​បើក​ច្រមុះ​ឲ្យ​យើង​មើលឃើញ​ជ្រុង​ថ្មីៗ​ ​បើក​ចិត្ត​ ​បើក​គំនិត​ថ្មីៗ​បន្ថែម​។​

2 ​សាក​ថ្ម​ឲ្យ​ខ្លួនឯង​

​ធ្វើការ​រាល់ថ្ងៃ​ ​មិនមែន​ហត់​តែ​កាយ​ទេ​ ​ចិត្ត​ក៏​ហត់​ ​រីឯ​ខួរក្បាល​ក៏​ត្រូវការ​សម្រាក​ដែរ​។​ ​ការ​ផ្ដល់​ពេលវេលា​ឲ្យ​ខ្លួនឯង​បាន​សម្រាក​ជា​មធ្យោបាយ​ដ៏​ល្អ​មួយ​ដើម្បី​បញ្ចូល​ថាមពល​ដល់​រាងកាយ​ឲ្យ​មាន​កម្លាំងចិត្ត​មក​បំ​ពេញការ​ងារ​វិញ​។​ ​មែនទែន​ទៅ​ ​ដើរលេង​មិន​ត្រឹមតែ​ជួយ​ឲ្យបាន​លំហែ​រ​ខួរក្បាល​ពី​ការងារ​ ​ក៏​ជួយ​ឲ្យ​មាន​អារម្មណ៍​ស្រស់ស្រាយ​ផង​ ​ដើម្បី​ពេល​មក​ធ្វើការ​វិញ​នឹងបាន​ធ្វើការងារ​មានគុណ​ភាព​ ​និង​លទ្ធផល​កាន់តែ​ប្រសើរ​ជាង​មុន​។​

3 ​ស្វែងយល់​ពី​ខ្លួនឯង​កាន់តែ​ច្រើន​

ធ្វើការ​រាល់ថ្ងៃ​ ​បើ​មិន​ឆ្លៀតពេល​ឲ្យ​ខ្លួន​បាន​សម្រាក​ខ្លះ​ ​អាច​ធ្វើឲ្យ​បាត់បង់​ខ្លួនឯង​ម្ដង​បន្តិចៗ​ ​ដែល​នឹង​ប៉ះពាល់​ដល់​គុណភាព​ការងារ​ ​ទទួល​បាន​លទ្ធផល​មិន​ល្អ​។​ ​ដូចនេះ​ ​យើង​គួរ​ទៅ​រំសាយ​អារម្មណ៍​ទាំងអស់​នេះ​ ​ដោយ​ការ​ដើរលេង​ ​ផ្តល់​ពេលវេលា​ឲ្យ​ខ្លួនឯង​ក្នុង​ការ​មើល​ត្រឡប់​នូវ​សកម្មភាព​ដែល​បាន​ធ្វើ​កន្លងមក​ ​ស្វែងយល់​ពី​គោលដៅ​ដែល​ខ្លួន​ចង់បាន​ ​ឬ​បាន​កំណត់​ឡើងវិញ​។​

4 ​ជួប​មនុស្ស​ថ្មី​ ​គំនិត​ថ្មី​

កំឡុង​ពេល​ដើរលេង​ ​យើង​នឹងបាន​ជួប​មនុស្ស​ថ្មីៗ​ច្រើន​ដែល​អាច​ចែករំលែក​ឲ្យ​យើង​នូវ​ទ​ស្សនៈ​ថ្មីៗ​ប្លែក​ ​ហើយ​អាច​ជ​ម្រុ​ញ​ដល់​ការ​គិត​របស់យើង​ឲ្យ​កាន់តែ​មាន​ភាព​ច្នៃប្រឌិត​។​ ​ម៉្យាង​ ​យើង​ក៏​អាច​ពង្រឹង​ការ​ប្រាស្រ័យ​ទាក់ទង​ពី​ម្នាក់​ទៅ​ម្នាក់​ដែល​ជា​ប្រយោជន៍​ដល់​ផលិតផល​ការងារ​រួម​។​ ​បន្ថែម​ពី​នេះ​ ​ពេល​ធ្វើដំណើរ​ ​យើង​អាច​ជួប​បញ្ហា​ដែល​នឹកស្មាន​មិនដល់​ ​ឬ​តម្រូវ​ឲ្យ​មាន​ដំណោះស្រាយ​ភ្លាម​ៗ​ ​នោះ​យើង​ថែមទាំង​បាន​ហ្វឹកហាត់​លើ​ជំនាញ​ដោះស្រាយបញ្ហា​ទៀត​ផង​។​

​បំពេញ​ជីវិត​ឲ្យ​កាន់តែ​មានន័យ​ ​និង​ផលិតផល​ការងារ​ល្អ​ ​ការ​ផ្ដល់​ពេលវេលា​ឲ្យ​ខ្លួនឯង​បាន​សម្រាក​ ​បាន​លំហែអារម្មណ៍​ ​ទទួល​យកគំនិត​ថ្មីៗ​ ​ប្លែកៗ​គឺជា​ជំនួយ​ដល់​ការងារ​របស់យើង​ទៅវិញ​ទេ​។​

​អ្នក​ថាឲ្យ​គេ​ថា​ដើរលេង​អត់ប្រយោជន៍​ ​ហើយ​អស់​លុយ​ទៀត​នោះ​ ​នៅ​គិត​អ៊ីចឹង​ទៀត​អត់​?

© 2022 - 2023 K​A​K​CENT​ | ​រក្សាសិទ្ធិ​ដោយ​កាក់​សេន​
​សូម​ទាក់ទង​មក​ពួកយើង​ ​ប្រសិនបើ​អ្នក​ចង់​យក​មាតិកា​យើង​ទៅ​ប្រើប្រាស់​បន្ត​។​