បំណុលអាក្រក់មានប៉ុន្មានប្រភេទ?

តើអ្នកដឹងទេថាបំណុលអាក្រក់មានន័យដូចម្តេច? ហើយវាមានប៉ុន្មានប្រភេទ? មិនមែនថាបំណុលសុទ្ធតែអាក្រក់ទាំងអស់ទេ ក្នុងនោះក៏មានបំណុលល្អដែរ។ ប៉ុន្តែចំពោះបំណុលអាក្រក់វាងាយស្រួលណាស់នឹងធ្វើឲ្យដើរជាប់អន្ទាក់វា ហើយពេលខ្លះដោយមិនដឹងខ្លួនទៀតផង។ ដូច្នោះហើយ ដើម្បីស្គាល់ថាបំណុលអាក្រក់ជាអ្វី ហើយមានប៉ុន្មានប្រភេទ អេនមីននឹងប្រាប់នៅខាងក្រោម។

បំណុលអាក្រក់គឺជាបំណុលដែលបានពីការខាតប្រាក់ឬជាការចំណាយលើរបស់ប្រើប្រាស់ដែលបាត់បង់តម្លៃតាមពេលវេលា។ ជាទូទៅ បំណុលអាក្រក់គឺជាបំណុលដែលមនុស្សម្នាក់ មិនអាចសងវិញបាន។
បំណុលអាក្រក់មានដូចជា ៖

1. បំណុលបុគ្គលៈ ការខ្ចីប្រាក់ដើម្បីមូលហេតុផ្ទាល់ខ្លួននានា ដូចជា សម្រាប់ការដើរកំសាន្ត ការព្យាបាល ឬ គ្រោះអាសន្នផ្សេងៗគឺ សុទ្ធតែជាបំណុលដែលត្រូវឲ្យអ្នកចងការប្រាក់ នៅពេលដែលអ្នកខ្វះខាត។ បំណុលបែបនេះភាគច្រើនមានអត្រាការប្រាក់ខ្ពស់ ជាពិសេសបើអ្នកចងការប្រាក់ក្រៅពីប្រព័ន្ធធនាគារដែលមិនចាំបាច់តម្រូវឱ្យមានឯកសារ ឬដាក់វត្ថុបញ្ចាំ។ អ្នកអាចខ្ចីប្រាក់រហ័ស ប៉ុន្តែអ្នកក៏ត្រូវសងលឿនដែរ ហើយការប្រាក់ក៏ខ្ពស់ទៀត។

2. បំណុលប័ណ្ណឥណទានៈ បំណុលដែលនិយមជាងគេ គឺបំណុលមកពីការចាយតាមគណនីឥណទាន។ អ្នកអាចចំណាយប្រាក់របស់ធនាគារបានដោយមិនចាំបាច់មានទឹកប្រាក់ស្រាប់ក្នុងគណនី ប៉ុន្តែអ្នកនឹងត្រូវសងវិញតាមរយៈពេលកំណត់ បូកជាមួយការប្រាក់ដែលភាគច្រើនមាន អត្រាខ្ពស់ពីលើ។ មានមនុស្សច្រើនណាស់ដែលតែងតែធ្លាក់ចូលអន្ទាក់បំណុលនេះ ដោយសារតែការចាយភ្លេចខ្លួនទៅលើសម្ភារៈនិយម ការរស់នៅបែបហ៊ឺហា និងសម្លៀកបំពាក់ម៉ាកល្បីៗជាដើម។

3. ការទិញរបស់ដែលធ្លាក់តម្លៃៈ ជាឧទាហរណ៍ មានមនុស្សច្រើនដែលសន្សំ ឬខ្ចីប្រាក់ទិញរបស់ប្រើប្រាស់មួយចំនួនដូចជារថយន្តជាដើម។ ប៉ុន្តែការទិញរថយន្តគឺសឹងតែមានន័យថាអ្នកនឹងត្រូវខាតបង់នាថ្ងៃអនាគត មិនដូចជាការទិញទ្រព្យដូចជាដីឬផ្ទះនោះទេ។ នេះគឺដោយសារតែរថយន្តតែងតែធ្លាក់តម្លៃទៅតាមពេលវេលា ការប្រើប្រាស់ ភាពចាស់ ឬការសឹករេចរឹលផ្សេងៗ ហើយអ្នកក៏ត្រូវចំណាយប្រាក់ថែទាំវាបន្តបន្ទាប់ផងដែរ។

4. បំណុលពីអាជីវកម្មៈ ការរកសុីនីមួយៗតែងតែមានការខាតបង់ ឯការវិនិយោគនីមួយៗតែងតែមានការប្រថុយប្រថាន។ចំពោះអាជីវកម្មខ្លះដែលមានការរីកចំរើន និងទទួលបានប្រាក់ចំណេញ ដូច្នេះគេអាចសងបំណុលធនាគារបាន ហើយអាជីវកម្មក៏បន្តដំណើរការទៅមុខទៀតផង។ ប៉ុន្តែនៅពេលដែលអាជីវកម្មមួយដើរមិនរលូន ហើយគ្មានប្រាក់ចំណេញគ្រប់គ្រាន់ដើម្បីសងបំណុល ដោយសារតែមិនមានការចាត់ចែងថវិកាបានល្អ ឬចំណាយច្រើនជាងចំណេញ វានឹងធ្វើឲ្យអាជីវកម្មនោះកាន់តែដុនដាបទៅៗ ស្របពេលដែលគេរឹតតែត្រូវការខ្ចីបំណុលបន្ថែមដើម្បីបន្តអាជីវកម្មទៅមុខ។

5. សំណងៈ ការដែលអ្នកប្រព្រឹត្តអំពើខុសច្បាប់ ឬប៉ះពាល់ដល់សុវត្ថិភាព និងសិទ្ធិបុគ្គល ឬកម្មសិទ្ធិណាម្នាក់ ហើយអ្នកនឹងត្រូវសងថ្លៃជំងឺចិត្ត និងការខូចខាត តាមច្បាប់ ឬ តាមការទាមទារពីជនរងគ្រោះ។ក្នុងករណីដែលអ្នកមិនមានសមត្ថភាពសង នោះអ្នកនឹងមានបំណុលមួយដែលជាបំណុលអាក្រក់ជាក់ជាមិនខាន។

បំណុលទាំងប៉ុន្មានខាងលើសុទ្ធតែជាបំណុលដែលពិបាកនឹងជៀសផុត។ ក៏ប៉ុន្តែអ្នកអាច កាត់បន្ថយវាបានដោយការចេះសន្សំ និងការចាយប្រាក់ដោយមានការទទួលខុសត្រូវ ព្រមទាំងការវិនិយោគដែលមិនសូវប្រថុយប្រថាន។ អ្នកក៏គួរជៀសវាងការខ្ចីបំណុលដែលមាន អត្រាការប្រាក់ខ្ពស់ ហើយមិនស្របនឹងផ្លូវច្បាប់ផងដែរ៕

Good Debt Vs. Bad Debt | Types of Debt |credit.org
Bad Debt - Meaning and Examples, Types, Provision, Allowance, and FAQs
Good Debt vs. Bad Debt - Types of Good and Bad Debts
Bad Debt Definition

ចុចទីនេះស្វែងយល់បន្ថែម: ធ្លាក់ខ្លួនជាប់បំណុលវ័ណ្ឌកដោយសារអី្វ?