VC ឬ Venture Capitalist ឬ អ្នកវិនិយោគមូលធន អាចជាបុគ្គល អង្គភាព ឬសហគ្រាស ដែលផ្ដល់ទុនបម្រុង(កញ្ចប់ថវិកា)របស់ពួកគេទៅកាន់ក្រុមហ៊ុនតូចៗ និងក្រុមហ៊ុនប្រភេទ Start-Up ដែលមានសក្ដានុពលអាចអភិវឌ្ឍខ្លួនបាន ជាថ្នូរនឹងការទទួលបានភាគហ៊ុនពីក្រុមហ៊ុន ឬ Start-Up ដែលគេបានវិនិយោគនោះ។
• លក្ខណៈសម្បត្ដិដែល VC ឬ អ្នកវិនិយោគមូលធនត្រូវការ
ជាទូទៅ VC ចាប់អារម្មណ៍លើការវិនិយោគទៅលើសហគ្រិនក៏ដូចជាគំនិតថ្មីៗរបស់ពួកគេ ហើយខាងក្រោមនេះ ជាលក្ខណៈសម្បត្ដិខ្លះៗនៃសហគ្រិនដែល VC ស្វែងរក៖
- សហគ្រិនដែលមានផែនការអាជីវកម្មច្បាស់លាស់
- អាចរកអត្រាចំណូលបានទៅតាមលក្ខខណ្ឌដែលបានសន្យា
- ផ្សព្វផ្សាយស្ថាប័ន ឬក្រុមហ៊ុនរបស់ពួកគេទៅកាន់វិនិយោគិន
- មានកេរ្ដិ៍ឈ្មោះល្អ និងអាចបង្ហាញពីសមត្ថភាព ក៏ដូចជាជំនាញរបស់ពួកគេ
- មានគោលដៅនិងចក្ខុវិស័យរួមគ្នា និងអាចរក្សាបាននូវភាពបត់បែន
- មានទំនាក់ទំនងល្អជាមួយក្រុមវិនិយោគិនផ្សេងទៀត
- មានការរំពឹងទុកលេីការពង្រីក និងទទួលបានលទ្ធផលល្អ
• អត្ថប្រយោជន៍ដែលអាចទទួលបានពី VC ឬ អ្នកវិនិយោគមូលធន
សម្រាប់សហគ្រិនដែលមានគម្រោងអាជីវកម្មច្បាស់លាស់ ការទទួលបានការបណ្ដាក់ទុន មិនត្រឹមតែអាចជួយពន្លឿនអាជីវកម្មរបស់ខ្លួនប៉ុណ្ណោះទេ អ្នកក៏អាចទទួលបាននូវជំនាញបន្ថែម យុទ្ធសាស្ត្រផ្សព្វផ្សាយ ការបង្កើនទេពកោសល្យផ្សេងទៀតរបស់ខ្លួន លទ្ធភាពក្នុងការគ្រប់គ្រងហិរញ្ញវត្ថុ ក៏ដូចជាជំនួយដល់ការរីកចម្រើនផ្នែកបច្ចេកវិទ្យាទៀតផង។
និយាយជារួម VC មិនមែនគ្រាន់តែសម្លឹងឃើញនូវប្រយោជន៍ដែលទទួលបានតែម្យ៉ាងប៉ុណ្ណោះទេ ប៉ុន្តែពួកគេក៏អាចមាននូវឆន្ទៈនិងទស្សនវិស័យដែលចង់ផ្លាស់ប្ដូរ អភិវឌ្ឍ និងជម្រុញឱ្យស្ថានភាពអាជីវកម្មរបស់សហគ្រិនឱ្យមានដំណើរការដោយរលូន ឬវិស័យនៃអាជីវកម្មមួយនោះឱ្យកាន់តែរីកចម្រើន នាពេលអនាគតផងដែរ។
ដូច្នេះសម្រាប់សហគ្រិនទាំងឡាយ គួរចាប់ផ្ដើមពិនិត្យមើលគម្រោងផែនការអាជីវកម្ម ក៏ដូចជាទស្សនវិស័យរបស់ខ្លួនឱ្យមានភាពច្បាស់លាស់ ដើម្បីបង្កើននូវទំនុកចិត្ត និងទាក់ទាញឱ្យអ្នកវិនិយោគមូលធនទាំងនោះមកវិនិយោគលើអាជីវកម្មរបស់ខ្លួន៕
