ធ្លាប់ជួបរឿងបែបនេះអត់? ទំនិញ ឬអីវ៉ាន់ពេលឃើញក្នុងពាណិជ្ជកម្មឡើងទំនង ហើយទាក់ទាញ ដល់ពេលទិញបានដល់ដៃហើយ ខុសគ្នាពីការផ្សាយ ទាំងរូបរាង និងគុណភាពដែលអ្នកលក់សន្យា។
តើការផ្សាយពាណិជ្ជកម្មមិនពិត ស្ដែងឡើងតាមរូបភាពណា?
ការផ្សាយពាណិជ្ជកម្មមិនពិតមានច្រើនទម្រង់ដូចជា (១). មិនបានភ្ជាប់ជាមួយនូវការផ្ដល់សេវាជូន (២). ផលិតផលមិនមានលក្ខណៈគ្រប់គ្រាន់ ឬ (៣). មិនផ្ដល់អត្ថប្រយោជន៍ដូចការអះអាងឡើយ។ ផលិតផលមួយចំនួនមិនមានផ្ទុកនូវសារធាតុដែលបានបញ្ជាក់លើស្លាកសញ្ញា ខ្លះទៀតផ្សព្វផ្សាយខុសពីទំហំពិតប្រាកដ និងមិនបានរួមតម្លៃសេវាកម្មផ្សេងៗ។ល។
ថ្ងៃនេះ កាក់សេននឹងលើកផលប៉ះពាល់ទាំងនោះមកអត្ថាធិប្បាយ ជាពិសេសសម្រាប់អ្នកដែលជាពាណិជ្ជករ និងអ្នកទិញទំនិញ និងសេវាដូចតទៅ៖
1 បាត់បង់ការទុកចិត្តពីអតិថិជន
គ្មានអតិថិជនណាដែលពេញចិត្តនឹងត្រូវបានគេបោកប្រាស់ និងកេងចំណេញលើនោះទេ។ កាលណាដែលអតិថិជនដឹងថាអាជីវកម្មមួយរកសុីបាតដៃខ្នងដៃ លក់ផលិតផលដែលប៉ះពាល់សុខភាព និងខុសពីការរំពឹងទុក គាត់នឹងបាត់បង់ទំនុកចិត្តជាមិនខាន។ មិនតែប៉ុណ្ណោះ ក្រុមហ៊ុននឹងបាត់បង់ភ្ញៀវថ្មីដែលបម្រុងនឹងទិញផលិតផលពួកគេ ក៏ថាបាន។
2 ល្អក់កករដល់ទំនាក់ទំនងជាមួយដៃគូរកស៊ី និងអ្នកដាក់ទុន
ក្នុងវិស័យជំនួញ កេរ្តិ៍ឈ្មោះគឺមានសារ:សំខាន់ណាស់។ ការផ្សាយពាណិជ្ជកម្មមិនពិត នឹងធ្វើឲ្យក្រុមហ៊ុនមួយខូចកេរ្តិ៍ឈ្មោះ ហើយអ្នកវិនិយោគទុនក៏នឹងអល់អែក ដកភាគហ៊ុនចេញ ហើយដៃគូសហការក៏លែងចង់រកសុីជាមួយ ដោយសារខ្លាចប៉ះពាល់មុខមាត់របស់ពួកគេនៅថ្ងៃមុខ។ ទោះបីជាចង់ដើររកអ្នកវិនិយោគថ្មី ក៏មិនងាយស្រួលដែរ។
3 ប៉ះពាល់ដល់ហិរញ្ញវត្ថុ និងពេលវេលា
នៅពេលដែលក្រុមហ៊ុនមួយមានប្រវត្តិមិនស្មោះត្រង់ ចាប់ផ្តើមបាត់បង់ភ្ញៀវ និងអ្នកវិនិយោគ នោះនឹងប៉ះពាល់ជាអវិជ្ជមានដល់ការលក់ ប្រាក់ចំណូល និងទុនទៅថ្ងៃមុខ។ ពេលវេលា និងថវិកាចំណាយលើការធ្វើពាណិជ្ជកម្មក៏ត្រូវខាតបង់។ លើសពីនេះ ការផ្សាយពាណិជ្ជកម្មកុហក និងបំផ្លើស អាចត្រូវគេព្រមាន និងពិន័យតាមផ្លូវច្បាប់ជាទឹកប្រាក់ ឬត្រូវភ្ញៀវទាមទារដូរយកលុយវិញជាដើម។
4 អាចត្រូវគេប្តឹង
ចំពោះអតិថិជនខ្លះ ពួកគាត់អាចសម្រេចចិត្តចាត់ការតាមនីតិវិធីច្បាប់ ប្ដឹងផ្ដល់ពីការខូតខាតផ្សេងៗដែលគាត់បានទទួលរង។ ឧទាហរណ៍ កាលពីឆ្នាំ២០១១ ក្រុមហ៊ុនស្បែកជើង New Balance ត្រូវបានប្ដឹងពីការផ្សាយពាណិជ្ជកម្មមិនពិត ដោយអះអាងស្បែកជើងរបស់ខ្លួនអាចជួយដុតកាឡូរីរបស់អ្នកពាក់។ ក្រោយមកត្រូវបានគេរកឃើញថា ស្បែកជើងនោះមិនមានអត្ថប្រយោជន៍សុខភាពដូចបានផ្សព្វផ្សាយទេ បណ្ដាលឱ្យក្រុមហ៊ុនត្រូវខាតបង់ ទឹកប្រាក់ ២.៣លានដុល្លារ ជាសំណង។
សរុបមក ក្រុមហ៊ុននានាគួរណាស់តែជៀសវាងការផ្សព្វផ្សាយពាណិជ្ជកម្មមិនពិត ដែលជាផ្នែកមួយនៃការប្រកួតប្រជែងមិនស្មោះត្រង់ និងការកេងប្រវ័ញ្ចផ្សេងៗដើម្បីតែផលចំណេញ។
នៅកម្ពុជាយើង បើសិនជាធុរជនផ្សព្វផ្សាយពាណិជ្ជកម្មមិនពិត អតិថិជនមានសិទ្ធិក្នុងការរាយការណ៍ និងដាក់ពាក្យបណ្ដឹងទៅកាន់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ “ក.ប.ប” នៃក្រសួងពាណិជ្ជកម្ម ឬស្ថាប័នមានសមត្ថកិច្ចពាក់ព័ន្ធ។
ក្នុងនាមជាអ្នកប្រើប្រាស់ យើងគួរយកចិត្តទុកដាក់ទៅលើស្លាកសញ្ញា ការផ្តល់មតិរបស់អតិថិជនដទៃ ការគិតថ្លៃសេវា និងលក្ខខណ្ឌផ្សេងៗមុនទិញទំនិញជៀសវាងការផុងខ្លួនតាមការផ្សាយពាណិជ្ជកម្មមិនពិត នាំឱ្យជួបកំហាតបង់ដោយប្រការណាមួយ៕
© 2022 - 2023 KAKCENT | រក្សាសិទ្ធិដោយកាក់សេន
ឯកសារយោង
1. Azcentral - What Is the Worst Thing About Deceptive Advertising?
2. Dominion - 3 things wrong with unethical advertising and why it’s such a no no
3. Chron - What Are the Ethical Limits in Advertising?
4. Top class action - $2.3 Million New Balance Toning Shoe Settlement Reached
5. ក.ប.ប - វីដេអូស្តីអំពីការផ្សព្វផ្សាយពាណិជ្ជកម្មមិនពិត
6. ក.ប.ប - វីដេអូស្តីអំពីដំណោះស្រាយ និងការទាមទារនូវសំណង
