មនុស្សជាច្រើនយល់ថាធានារ៉ាប់រងអាយុជីវិតមានតម្លៃថ្លៃ ហើយហាក់មិនងាយទទួលបានអត្ថប្រយោជន៍មកវិញទៀត។ ប៉ុន្តែមុននឹងថាវាមានតម្លៃថ្លៃ អ្នកមានដឹងទេថា ថ្លៃធានារ៉ាប់រងអាយុជីវិតត្រូវបានកំណត់ដោយកត្តាអ្វីខ្លះ?
តាមពិតទៅ តម្លៃគម្រោងធានារ៉ាប់រងអាយុជីវិតមួយតែងមានទំនាក់ទំនងទៅនឹងហានិភ័យដែលក្រុមហ៊ុនធានារ៉ាប់រងត្រូវប្រថុយប្រថានទទួលយកក្នុងការទូទាត់សំណង ប្រសិនបើមានឧប្បត្តិហេតុណាមួយកើតឡើងនៅថ្ងៃមុខ តួយ៉ាងដូចជាជំងឺធ្ងន់ធ្ងរ ឬគ្រោះថ្នាក់ដល់អាយុជីវិត។ ក្រៅពីនេះ នៅមានកត្តាចម្បងមួយចំនួនទៀតក្នុងការកំណត់តម្លៃបុព្វលាភធានារ៉ាប់រងអាយុជីវិតដូចជា៖
#អាយុ
បើអ្នកទិញធានារ៉ាប់រងអាយុជីវិតពីក្មេងទៅ តម្លៃបុព្វលាភដែលត្រូវបង់អាចមានកម្រិតទាបជាង ដោយសាររាងកាយអ្នកនៅរឹងមាំ ហើយអត្រាប្រឈមនឹងជំងឺនៅមានតិច។ តែបើអ្នកទិញធានារ៉ាប់រងពេលអាយុច្រើនវិញ តម្លៃបុព្វលាភអាចមានតម្លៃខ្ពស់ជាង រីឯអត្ថប្រយោជន៍អាចទទួលបានក៏មានលក្ខណៈខុសគ្នាដែរ និងគោលការណ៍សេវាធានារ៉ាប់រងមួយចំនួនទៀតមានលក្ខខណ្ឌកំណត់ការលក់ឲ្យអតិថិជនត្រឹមអាយុជាក់លាក់មួយប៉ុណ្ណោះ។
#ប្រភេទការងារនិងប្រាក់ចំណូល
ចំពោះប្រភេទការងារមួយចំនួនដែលប្រឈមនឹងហានិភ័យច្រើនដូចជាអ្នកដឹកជញ្ជូន កម្មករឧស្សាហកម្ម ឬអ្នករុករករ៉ែជាដើម អាចនឹងត្រូវបង់បុព្វលាភច្រើនជាងអ្នកមានការងារស្ថិតក្នុងបរិយាកាសសុវត្ថិភាពជាង។ ទន្ទឹមនឹងនេះ ក្រុមហ៊ុនធានារ៉ាប់រងនឹងត្រួតពិនិត្យមើលលើប្រភេទការងារ និងប្រាក់ចំណូលរបស់អ្នក ដើម្បីអាចវាយតម្លៃ និងប្រឹក្សាបានថាអ្នកគួរទិញកញ្ចប់ធានារ៉ាប់រងមួយណាដែលស័ក្តិសម ហើយត្រូវទៅតាមគម្រោងកញ្ចប់ថវិការបស់អ្នក។
#ប្រវត្តិសុខភាព
គោលការណ៍របស់ក្រុមហ៊ុនធានារ៉ាប់រងរមែងរួមបញ្ចូលការពិនិត្យសុខភាពយ៉ាងហ្មត់ចត់ ដោយការធ្វើតេស្តវេជ្ជសាស្រ្តនឹងជួយឲ្យដឹងច្បាស់ពីស្ថានភាពសុខភាព និងកាយសម្បទាបច្ចុប្បន្នរបស់អ្នក ដើម្បីងាយស្រួលវាយតម្លៃហានិភ័យ និងកំណត់ថ្លៃបុព្វលាភបានត្រឹមត្រូវ។ ហេតុនេះ ក្រុមហ៊ុនចង់ស្វែងយល់ឲ្យច្បាស់ពីលទ្ធផលនៃតេស្ដវេជ្ជសាស្ត្រលើសុខភាពរបស់អ្នក ដើម្បីដឹងថាអ្នកមានជំងឺប្រចាំកាយ ឬជំងឺបន្តពូជណាមួយដែរឬទេ។
#ទម្លាប់រស់នៅប្រចាំថ្ងៃ
ជាមួយគ្នា ទម្លាប់រស់នៅប្រចាំថ្ងៃក៏ជាកត្តាសំខាន់ដែលក្រុមហ៊ុនធានារ៉ាប់រងនឹងសិក្សាបន្ថែម។ ជាក់ស្ដែង ទម្លាប់ក្នុងការរស់នៅប្រចាំថ្ងៃមិនល្អ ឬខ្វះការថែរក្សាបានត្រឹមត្រូវដូចជា ការដើរលេងយប់ជ្រៅ ទទួលទានគ្រឿងស្រវឹង ជក់បារី ឬសារធាតុផ្សេងៗដែលអាចផ្ដល់ផលប៉ះពាល់ដល់សុខភាព និងសុវត្ថិភាពរបស់អ្នក។ បុគ្គលដែលមានទម្លាប់រស់នៅមិនល្អបែបនេះ ប្រឈមខ្ពស់នឹងការកើតជំងឺធ្ងន់ធ្ងរ នោះថ្លៃបុព្វលាភធានារ៉ាប់រងអាចត្រូវបានកំណត់ខ្ពស់ជាងអ្នកដែលមានទម្លាប់រស់នៅប្រចាំថ្ងៃល្អ។
ខាងលើនេះជាកត្តាធំៗ៤ដែលក្រុមហ៊ុនធានារ៉ាប់រងពិនិត្យមុនកំណត់តម្លៃបុព្វលាភសម្រាប់អតិថិជនផ្សេងៗគ្នា។ បើគិតទៅ បុព្វលាភធានារ៉ាប់រងអាយុជីវិតដែលអ្នកត្រូវបង់មិនមានតម្លៃថ្លៃហួសពេកទេ ដ្បិតគេពិចារណាមើលលើកត្តាជាច្រើនក្នុងលក្ខណៈ ឬកិច្ចសន្យាធានារ៉ាប់រងអាយុជីវិតនេះ រួមជាមួយនឹងសំណងដែលក្រុមហ៊ុនធានារ៉ាប់រងត្រូវរ៉ាប់រងលើចំណាយទូទាត់សម្រាប់ការខាតបង់ ប្រសិនបើព្រឹត្តិការណ៍អកុសលណាមួយកើតមាន៕
*មាតិកានេះនាំមកជូនប្រិយមិត្តដោយ កាក់សេន និងសហការដោយ Manulife Cambodia
© 2022 – 2023 KAKCENT | រក្សាសិទ្ធិផលិតដោយកាក់សេន
