អ្នកដែលមានគណនីសន្សំនៅធនាគារធ្លាប់ចាប់អារម្មណ៍ឬទេ?
មុននឹងខាងធនាគារផ្ទេរការប្រាក់ឱ្យអ្នក គេបានគិតនិងកាត់ទុកពន្ធលើការប្រាក់ដែលអ្នកត្រូវទទួលបាននោះរួចស្រេចទៅហើយ។ ពន្ធនេះដែរ គឺគេហៅថាពន្ធកាត់ទុក។
ពន្ធកាត់ទុកគឺជាពន្ធមួយប្រភេទដែលត្រូវអនុវត្តលើចំណូលឬការទូទាត់ថ្លៃសេវាកម្មផ្សេងៗទៅឱ្យបុគ្គល ឬ សហគ្រាស ឬ អង្គការណា ដែលមានសកម្មភាពសេដ្ឋកិច្ច ប្រកបរបររកស៊ី ឬផ្ដល់សេវាកម្ម ប៉ុន្តែមិនបានចុះបញ្ជីពន្ធដារ ហើយគាត់ទទួលការទូទាត់ជា សាច់ប្រាក់ ឬជាវត្ថុជាក់លាក់ណាមួយ។
ប្រសិនបើអ្នកទទួលការទូទាត់ទាំងនោះ មានវត្តមាននិងមានប្រតិបត្តិការអាជីវកម្មនៅក្នុងប្រទេសកម្ពុជាលើសពី ១៨២ថ្ងៃ (ប្រហែល៦ខែ) ហើយតាំងកន្លែងរកស៊ីជាអចិន្រ្តៃយ៍នៅក្នុងប្រទេសកម្ពុជា គេហៅថានិវាសជន (resident taxpayer)។ តែបើផ្ទុយពីនេះ គេហៅថាអនិវាសនជន (non-resident taxpayer)។
ពន្ធកាត់ទុកនេះ ត្រូវបានគិតទៅលើការទូទាត់ដូចជា ការប្រាក់ ថ្លៃសេវាគ្រប់គ្រង សេវាពិគ្រោះ ឬសេវាបច្ចេកទេសផ្សេងៗ សួយសារចំពោះទ្រព្យអរូបី (royalties) ការចម្រាញ់នូវធនធានធម្មជាតិ ថ្លៃជួលចលន ឬអចលនទ្រព្យ ភាគលាភ (dividend)។ រីឯអត្រាពន្ធកាត់ទុកគឺខុសៗគ្នាទៅតាមប្រភេទនៃការទូទាត់ និងអ្នកទទួលការទូទាត់នោះ។
ចំពោះការទូទាត់ទៅកាន់និវាសនជន ឬ resident taxpayer៖
» ១៥% ចំពោះ ថ្លៃសេវាគ្រប់គ្រង សេវាពិគ្រោះ ឬសេវាបច្ចេកទេសផ្សេងៗ សួយសារចំពោះទ្រព្យអរូបី ការចម្រាញ់នូវធនធានធម្មជាតិ និងថ្លៃការប្រាក់ដែលទូទាត់ក្រៅពីស្ថាប័នហិរញ្ញវត្ថុ
» ១០% ចំពោះ ថ្លៃជួលចលន ឬអចលនទ្រព្យ
» ៦% ចំពោះ ការប្រាក់ទទួលពីគណនីសន្សំមានកាលកំណត់ និង
» ៤% ចំពោះ ការប្រាក់ទទួលពីគណនីសន្សំគ្មានកាលកំណត់
រីឯការទូទាត់ទៅកាន់អនិវាសនជន ឬ non-resident taxpayer គឺ ១៤% ចំពោះ
គ្រប់ប្រភេទការប្រាក់ (Interest)
សួយសារ (Royalties) ថ្លៃឈ្នួល និងប្រាក់ចំណូលផ្សេងៗ ទាក់ទិននឹងការប្រើប្រាស់ទ្រព្យសម្បត្តិ
ការទូទាត់ចំពោះសេវាគ្រប់គ្រង និងសេវាបច្ចេកទេសនានា ដែលនិងត្រូវកំណត់ដោយប្រកាសរបស់ក្រសួងសេដ្ឋកិច្ច និងហិរញ្ញវត្ថុ
ភាគលាភ (Dividend)
គេគណនាពន្ធកាត់ទុកដោយយក មូលដ្ឋានគិតពន្ធ គុណនឹង អត្រាពន្ធនៃការទូទាត់នោះ
ដែលមូលដ្ឋានគិតពន្ធកាត់ទុក គឺចំនួនទឹកប្រាក់ដែលត្រូវទូទាត់។
ត្រលប់មកការគិតពន្ធលើការប្រាក់ពីគណនីសន្សំមានកាលកំណត់ដែលអ្នកត្រូវទទួលបានពីធនាគារវិញ ឧទាហរណ៍ថា អ្នកត្រូវបានការប្រាក់ $100 តែការប្រាក់នោះត្រូវជាប់ពន្ធកាត់ទុក 6% នោះបន្ទាប់ពីគិតពន្ធកាត់ទុករួច ការប្រាក់ដែលអ្នកនឹងទទួលបានពិតប្រាកដនោះត្រឹមតែ $94 តែប៉ុណ្ណោះ៕
ព័ត៌មានដកស្រង់ចេញពី៖
https://www.tax.gov.kh/bwt.php
https://www.tax.gov.kh/bl/WT_Booklet_2013.pdf
