លោក Warren Buffett ពីឈ្មួញកណ្តាលម្នាក់ក្លាយជាអ្នកវិនិយោគដ៏ជោគជ័យ និងមានក្រុមហ៊ុនតម្លៃវាល់លាន

លោក Warren Buffett មានឈ្មោះក្រៅហៅថា “Oracle of Omaha” ជាអ្នកវិនិយោគដ៏ជោគជ័យម្នាក់។ លោកធ្លាប់ជាបុគ្គលិកនៅក្រុមហ៊ុនប៉ាគាត់ និង​ Benjamin Graham's partnership។ ​បច្ចុប្បនេះគាត់មានទ្រព្យសម្បត្តិសរុបចំនួន ១២១.៨ ប៊ីលានដុល្លារ។

ការវិនិយោគរបស់លោក Warren Buffett ចាប់ផ្តើមឡើងបន្ទាប់ពីក្រុមហ៊ុន Benjamin ត្រូវបានបិទ គាត់បានបង្កើតក្រុមហ៊ុនវិនិយោគផ្ទាល់ខ្លួនហៅថា Buffett's Partnership។ ក្នុងឆ្នាំ ១៩៦០​​ ក្រុមហ៊ុនមានដៃគូសហការ ៧នាក់ និងទឹកប្រាក់សរុបប្រហែល​ ៧លានដុល្លារដែលលុយជាង ១លានដុល្លារជារបស់លោក។ អំឡុងពេលនោះ លោកក៏បានវិនិយោគលើក្រុមហ៊ុនវាយនភណ្ឌ Berkshire Hathaway ជាមួយលោក Charlie Munger ហើយផ្លាស់ប្ដូរទៅជាក្រុមហ៊ុនវិនិយោគនៅពេលដែលលោកកាន់តំណែងជានាយកប្រតិបត្តិការ ក្រោយពីបិទ Buffett's Partnership។ លោកបានវិនិយោគលើវិស័យជាច្រើនដូចជា វិស័យធានារ៉ាប់រង វិស័យថាមពល ឧស្សាហកម្មសំណង់។ល។ ភាគជោគជ័យនៃការវិនិយោគជាមួយ Berkshire Hathaway បានធ្វើឲ្យលោកក្លាយជាមហាសេដ្ឋីលំដាប់ទី ៥ ក្នុងពិភពលោក។ 

តាមពិតទៅ នៅក្នុងការវិនិយោគរបស់លោក Warren គាត់ប្រើវិធីសាស្ត្រមួយហៅថាតម្លៃនៃការវិនិយោគ (Value Investing) ដែលជាការទិញភាគហ៊ុនក្នុងតម្លៃទាប ហើយរក្សាទុករហូតដល់កើនតម្លៃ។ ការវិនិយោគបែបនេះជាការវិនិយោគរយៈពេលវែង ដែលផ្តល់ឱ្យគាត់នូវការប្រាក់​សមាស (Compound Interest) ជារៀងរាល់ឆ្នាំ ហើយផ្តល់ពេល និងថវិកាឱ្យក្រុមហ៊ុនទាំងនោះបន្តអភិវឌ្ឍ។ ចំណែកការទិញភាគហ៊ុនវិញ គាត់ទិញតែក្នុងវិស័យដែលគាត់យល់ដឹងច្បាស់លាស់ប៉ុណ្ណោះ និងមើលទៅលើកេរ្តិ៍ឈ្មោះយូរអង្វែង មិនងាយមានដៃគូប្រជែងដែលខ្លាំងជាង និងមានអតិថិជនស្មោះត្រង់របស់ក្រុមហ៊ុន។  

ការវិនិយោគរបស់លោក Warren តែងតែផ្តល់មកវិញនូវប្រាក់ចំណេញដល់ Berkshire Hathaway Inc. និងម្ចាស់ភាគហ៊ុនរបស់ក្រុមហ៊ុន ដែលធ្វើឱ្យភាគហ៊ុនរបស់វាកើនឡើងជារៀងរាល់ឆ្នាំ។ ក្នុងឆ្នាំ ២០២៣ នេះភាគហ៊ុនរបស់ Berkshire Hathaway Inc. មានតម្លៃជាង ៥០ម៉ឺនដុល្លារក្នុងមួយហ៊ុន ហើយក្លាយជាភាគហ៊ុនដែលមានតម្លៃថ្លៃជាងគេបំផុតនៅលើពិភពលោក។ 

តាមរយៈការវិនិយោគរបស់លោក Warren Buffett បានបង្រៀនយើងនូវមេរៀនមួយចំនួនដូចជា៖ 

• អ្នកអាចចាប់ផ្តើមពីការវិនិយោគតូចតាចជាមុនសិន 
• ត្រូវមានចំណេះដឹងពីការវិនិយោគឱ្យបានច្បាស់លាស់ 
• វិនិយោគលើក្រុមហ៊ុនណាដែលឈរជើងយូរមកហើយ 
• ទិញភាគហ៊ុននៅពេលដែលតម្លៃភាគហ៊ុនធ្លាក់ចុះ 
• វាយតម្លៃពីដំណើរការបស់ក្រុមហ៊ុនក្នុងរយៈពេលវែង ជាជាងការសង្កេតពីការឡើងចុះនៃភាគហ៊ុនត្រឹមរយៈពេលខ្លី។ 

“ហានិភ័យកើតឡើងនៅពេលដែលអ្នកមិនដឹងពីអ្វីដែលអ្នកកំពុងធ្វើ” - Warren Buffett