តើអ្នកធ្លាប់មានក្ដីសុបិនចង់ធ្វើជាម្ចាស់អាជីវកម្មផ្ទាល់ខ្លួនដែរឬទេ? ដើម្បីបើកដំណើរការអាជីវកម្មមួយឱ្យស្របច្បាប់ តេីអ្នកគួរគិតពីអ្វីខ្លះ? ហើយចំណុចអ្វីខ្លះដែលអ្នកគួរតែដឹង? ខាងក្រោមនេះជាបំណកស្រាយខ្លះៗសម្រាប់មិត្តអ្នកអាន ៖
១. ស្វែងយល់ពីប្រភេទនៃអាជីវកម្ម
ជំហានដំបូង អ្នកត្រូវស្គាល់ពីប្រភេទអាជីវកម្មរបស់អ្នកជាមុនសិន ដ្បិតអាជីវកម្មអាចបែងចែកជាច្រើនប្រភេទដូចជា ៖
ក. អាជីវកម្មសេវាកម្ម (Service Business) ៖ ជាប្រភេទអាជីវកម្មដែលប្រើប្រាស់សេវាកម្មជាគោល ដូចជា សេវាកម្មជួសជុល សេវាកម្មរចនា ឬសាងសង់ជាដេីម។
ខ. អាជីវកម្មបែបជំនួញ (Merchandising Business) ៖ ជាអាជីវកម្មដែលផ្ដោតច្រើនទៅលើការ “ទិញ” និង ”លក់” ។
គ. អាជីវកម្មសិប្បកម្ម ឬឧស្សាហកម្ម (Manufacturing Business) ៖ ជាអាជីវកម្ម “ផលិត ដើម្បី លក់”។
ឃ. អាជីវកម្មកូនកាត់ (Hybrid Business) ៖ ជាប្រភេទអាជីវកម្មចម្រុះ ដែលមានអាជីវកម្មផ្សេងៗរួមបញ្ចូលគ្នា ឧទាហរណ៍ដូចជា ភោជនីយដ្ឋាន (មានទាំងការផលិត លក់ និងបម្រើសេវាកម្ម)។
២. ស្វែងយល់ពីលក្ខណៈនៃអាជីវកម្ម
ការធ្វើអាជីវកម្មសំដៅទៅលើសកម្មភាពដែលពាក់ព័ន្ធនឹងការផលិត ទិញលក់ និងផ្គត់ផ្គង់ទំនិញ ឬសេវាកម្មក្នុងគោលបំណង ដើម្បីទទួលបានប្រាក់ចំណេញ ដែលមានទម្រង់ដូចតទៅ ៖
ក. ឯកកម្មសិទ្ធិ (Sole Proprietorship)៖ គ្រប់គ្រងដោយបុគ្គលតែម្នាក់ ដូច្នេះរាល់ការចំណេញ ឬខាត គឺត្រូវបានរ៉ាប់រងដោយម្ចាស់អាជីវកម្មតែឯកឯង។
ខ. សហកម្មសិទ្ធិ (Partnership)៖ ខុសគ្នាពីឯកកម្មសិទ្ធត្រង់ថា អាជីវកម្មនេះបានបង្កើតដោយបុគ្គលចាប់ពី ពីរនាក់ឡើងទៅ ដោយម្នាក់ៗមានសិទ្ធិសម្រេចស្មើៗគ្នា ហើយលទ្ធភាពទទួលបាន និងខាតបង់ក៏ស្មើៗគ្នាផងដែរ។
គ. សាជីវកម្ម (Corporation)៖ ជាប្រភេទអង្គភាព ឬសហគ្រាសធំៗ។ លក្ខណៈពិសេសរបស់អង្គភាពនេះគឺត្រង់ថា អាចមានសិទ្ធិសម្រេចលក់ភាគហ៊ុនរបស់ខ្លួនបាន ជាហេតុធ្វើឲ្យមានការបណ្ដាក់ទុនច្រើន។
ឃ. ក្រុមហ៊ុនចំកាត់ (Limited Liability Company)៖ ជាការបញ្ចូលគ្នារវាងសាជីវកម្ម និងសហកម្មសិទ្ធិ។
៣. ចុះបញ្ជីពាណិជ្ជកម្ម
អាជីវកម្មស្របច្បាប់ គឺជាអាជីវកម្មដែលបានចុះបញ្ជីត្រឹមត្រូវ ឬមានការទទួលស្គាល់ដោយរដ្ឋាភិបាល។ រីឯអត្ថប្រយោជន៍ដែលអ្នកនឹងទទួលបានបន្ទាប់ពីចុះបញ្ជីពាណិជ្ជកម្មមានដូចតទៅ ៖
អាចបង្កើតអត្តសញ្ញាណ ឬ Brand សម្រាប់អាជីវកម្មផ្ទាល់ខ្លួន
បញ្ជៀសបាននូវការផាកពិន័យផ្សេងៗ រួមទាំងការប្រឈមនឹងបិទទ្វារអាជីវកម្ម
ទទួលបានការគាំពារដោយច្បាប់
ទាក់ទាញអតិថិជន (មិនមានអ្នកណាចង់រកស៊ីជាមួយអ្នកខុសច្បាប់នោះឡើយ)
បង្កើនទំនុកចិត្ត (ងាយស្រួលទទួលបានប្រាក់កម្ចី)
នយោជិកអាចទទួលបានអត្ថប្រយោជន៍ផ្សេងៗពីបេឡាជាតិរបបសន្ដិសុខសង្គម (ប.ស.ស)
បានបំពេញកាតព្វកិច្ចជាពលរដ្ឋល្អ (ស្ថិតក្រោមច្បាប់និងបញ្ញត្តិនៃប្រទេសកម្ពុជា)
បច្ចុប្បន្ននេះ ម្ចាស់អាជីវកម្មអាចចុះបញ្ជីពាណិជ្ជកម្មតាមប្រព័ន្ធអ៊ីនធឺណែតបានដោយងាយស្រួលផងដែរ តាមរយៈគេហទំព័ររបស់ក្រសួងផ្ទាល់ “www.registrationservices.gov.kh”ឬតាមអាសយដ្ឋាន៖ ផ្លូវលេខ ៩២ សង្កាត់វត្តភ្នំ ខណ្ឌដូនពេញ រាជធានីភ្នំពេញ។
យ៉ាងណាមិញ ដ្បិតថាយើងម្នាក់ៗមានសិទ្ធិសេរីភាពបើកអាជីវកម្មក៏ពិតមែន ប៉ុន្តែត្រូវប្រាកដថាអាជីវកម្មអ្នកប្រព្រឹត្តទៅស្ថិតនៅក្រោមច្បាប់នៃអាជីវកម្ម និងមានការចុះបញ្ជីបានត្រឹមត្រូវផង៕
Click here to read more about: ផលប៉ះពាល់ដល់អាជីវកម្មប្រសិនបើផ្ដល់សេវាកម្មមិនបានល្អ
