ពាក្យថាហិរញ្ញវត្ថុផ្ទាល់ខ្លួនសំដៅទៅលើគ្រប់ទិដ្ឋភាពនៃការគ្រប់គ្រងលុយកាក់ផ្ទាល់ខ្លួន ដែលក្នុងនោះរួមមានការគ្រប់គ្រងចំណូលចំណាយ គម្រោងសន្សំលុយ គម្រោងវិនិយោគ និងការរៀបគម្រោងហិរញ្ញវត្ថុសម្រាប់អនាគតជាដើម។ ហើយគ្រប់ជ្រុងនៃទិដ្ឋភាពទាំងនេះអាចរៀបចំ សិក្សាស្វែងយល់ និងអនុវត្តដោយខ្លួនឯងបានតាមរយៈផែនការហិរញ្ញវត្ថុផ្ទាល់ខ្លួន។
ជាទូទៅ ផែនការហិរញ្ញវត្ថុផ្ទាល់ខ្លួនត្រូវបានបង្កើតឡើងក្នុងគោលបំណងសម្រេចបាននូវគោលដៅហិរញ្ញវត្ថុណាមួយក្នុងជីវិតរបស់អ្នក ដែលគោលដៅហិរញ្ញវត្ថុភាគច្រើនជាគោលដៅសន្សំប្រាក់ដើម្បីបំពេញក្ដីស្រមៃអ្វីមួយ ដូចជាទិញឡានឬផ្ទះ សន្សំសម្រាប់ដំណើរកម្សាន្ត សន្សំសម្រាប់ពេលចូលនិវត្តន៍ សន្សំដើម្បីសងបំណុល ឬ ដើម្បីបង្កើតអាជីវកម្មក៏ថាបាន។
ការបង្កើតផែនការហិរញ្ញវត្ថុផ្ទាល់ខ្លួនពិតជាចាំបាច់ប្រសិនបើអ្នកចង់សម្រេចគោលដៅហិរញ្ញវត្ថុណាមួយ ព្រោះវាអាចជួយអោយអ្នកត្រួតពិនិត្យនិងគ្រប់គ្រងចំណូលចំណាយជាប្រចាំរបស់អ្នក តាមដានដំណើរវិវត្តនៃការសន្សំប្រាក់ ក៏ដូចជាជំហាននៃផែនការដើម្បីសម្រេចគោលដៅហិរញ្ញវត្ថុនោះ។ ហើយអ្នកណាៗក៏អាចរៀបចំផែនការហិរញ្ញវត្ថុផ្ទាល់ខ្លួនបានដែរ ដោយមិនចាំបាច់ទាល់តែជាអ្នកជំនាញ ឬត្រូវការជំនួយពីអ្នកមានវិជ្ជាជីវៈច្បាស់លាស់ទើបអាចគ្រោងផែនការហិរញ្ញវត្ថុបាននោះទេ។
សម្រាប់មិត្តអ្នកអានអត្ថបទរបស់កាក់សេនដែលមានផែនការហិរញ្ញវត្ថុផ្ទាល់ខ្លួនហើយនោះ ប្រហែលជាធ្លាប់ឆ្លងកាត់ហើយនូវការរៀបចំផែនការហិរញ្ញវត្ថុរបៀប old school គឺការធ្វើកំណត់ត្រាដោយដៃនូវចំណូលចំណាយ និងគម្រោងសន្សំផ្សេងៗ។ រីឯប្រិយមិត្តខ្លះទៀតក៏ប្រហែលជាបានវិវត្តមកធ្វើកំណត់ត្រាជាលក្ខណៈឌីជីថលតាម spreadsheet រួចទៅហើយ។ ឯខ្លះទៀតក៏បានសាកល្បងប្រើប្រាស់នូវបច្ចេកវិទ្យាកាន់តែទំនើបជំនាន់ឌីជីថល នោះគឺកម្មវិធីទូរស័ព្ទដៃដែលមានដូចជា Jamnay និង Money manager ដែលវាមានភាពសាមញ្ញនិងងាយស្រួលក្នុងការប្រើប្រាស់។ វិធីកត់ចំណាំនិងរក្សាទុកទិន្នន័យទាំងនេះនឹងជួយអ្នកអោយពង្រឹងបន្ថែមលើវិធីសាស្ត្ររៀបចំផែនការហិរញ្ញវត្ថុរបស់អ្នកអោយកាន់តែមានប្រសិទិ្ធភាព។
ចុះមិត្តអ្នកអានដទៃទៀតមានគម្រោងបង្កើតផែនការហិរញ្ញវត្ថុផ្ទាល់ខ្លួនហើយឬនៅ?
ចុចទីនេះដើម្បីស្វែងយល់បន្ថែមពី: ហេតុអ្វីហិរញ្ញវត្ថុផ្ទាល់ខ្លួនសំខាន់?
