ពេលមានកូនត្រូវទទួលរ៉ាប់រងអ្វីថ្មីខ្លះ?

ក្នុងគ្រួសារមួយ បើមានក្មេងតូចនៅក្នុងផ្ទះ បរិយាកាសមើលទៅអ៊ូអរសប្បាយរីករាយណាស់។ មើលតែរូបភាពកូនៗដែលឪពុកម្ដាយតុបតែងខ្លួនស្អាតៗ ឃ្យូតៗ តាម Facebook Instagram ក៏គួរឱ្យស្រលាញ់ណាស់ដែរ។ ប៉ុន្តែម្ដងម្កាលក៏ឮពីមិត្តភក្ដិ ឬអ្នកជិតខាងរអ៊ូថារវល់ណាស់ ជួនកាលយំលួងមិនបាត់ ជួនកាលកូនក្ដៅខ្លួន ត្រូវយកទៅពេទ្យទាំងយប់ ហើយមិនដែលបានគេងឆ្អែតទេ។ និយាយទៅ មានកូនហើយ មានទាំងសប្បាយ មានទាំងហត់។
ឥឡូវយើងមកពិភាក្សាគ្នាតិចមើលថា តើពេលមានកូនហើយ ឪពុកម្ដាយត្រូវទទួលរ៉ាប់រងអ្វីថ្មីខ្លះ?

ចំណាយថ្មីៗទាំងលើការចិញ្ចឹមបីបាច់ ថែទាំ និងការអប់រំ

ឪពុកម្ដាយមានតួនាទីចិញ្ចឹមបីបាច់កូនឱ្យធំធាត់ មានសុខភាពល្អ។ ពេលកូននៅតូច ត្រូវត្រៀមចំណាយទៅលើថ្លៃទឹកដោះគោ (ករណីបំបៅទឹកដោះគោបន្ថែម) និងសម្ភារទារកផ្សេងទៀត។ ពេលកូនធំដឹងក្ដីបន្តិចម្ដងៗ នៅតែត្រូវបន្តផ្គត់ផ្គង់ចំណីអាហារ ការហូបចុក សម្លៀកបំពាក់ របស់របរលេង។ ពេលកូនឈឺត្រូវចំណាយទៅលើការព្យាបាលថែទាំកូនឱ្យជាសះស្បើយ។ លុះពេលកូនធំដល់វ័យចូលរៀន ការចំណាយក៏នឹងកើនឡើងទៅតាមកម្រិតសិក្សា និងជម្រើសនៃស្ថាប័នអប់រំ។

ផ្ដល់ជំនួយបន្ថែមដល់ការអប់រំ

ចំពោះការអប់រំ កូនតូចៗតែងត្រូវការជំនួយនិងការណែនាំបន្ថែមពីអាណាព្យាបាលផងដែរ ក្នុងការហ្វឹកហាត់បន្ថែមនៅតាមផ្ទះ ឬការធ្វើកិច្ចការផ្ទះដែលគ្រូបានដាក់ឱ្យ -ល- ជាពិសេសក្នុងបរិបទកូវីដនេះតែម្ដង។ តួយ៉ាងក្នុងអំឡុងវិបត្តិកូវីដដែលស្ថាប័នអប់រំត្រូវផ្អាកដំណើរការរយៈពេលយូរ ហើយផ្លាស់ប្ដូរប្រតិបត្តិការមកតាមប្រព័ន្ធអនឡាញទៀតសោត កូនៗត្រូវការជំនួយពីឪពុកម្ដាយ ឬអាណាព្យាបាលកាន់តែច្រើនជាងមុន ដើម្បីជួយសម្របសម្រួលការសិក្សាពីចម្ងាយរបស់គាត់។

ចំណាយពេលជាមួយកូនៗ កំដរកូនលេងកំសាន្ដ

ការលេងកំសាន្ដជួយឱ្យកូនរីកចម្រើនទាំងកាយសម្បទា និងសតិបញ្ញា។ បើយោងតាមសង្ខេបបទដោយ Education Sector នៃការិយាល័យកណ្តាលរបស់អង្គការ UNICEF ចាប់ពីពេលកើតរហូតដល់អាយុ ២ឆ្នាំ ការមើលថែប្រកបដោយក្ដីស្រលាញ់ និងការប្រឡែងលេងជាមួយទារក ជួយឱ្យទំនាក់ទំនងនៅក្នុងកោសិកាប្រសាទនៃខួរក្បាលកុមារដំណើរការបានល្អ។ ចាប់ពីអាយុ ៣ឆ្នាំ ទៅ ៥ឆ្នាំ កុមារចាប់ផ្ដើមរីកចម្រើនផ្នែកភាសា អារម្មណ៍ ទំនាក់ទំនងសង្គម និងបំណិនទទួលបានចំណេះដឹង។

ក្នុងដំណាក់កាលនេះ ឪពុកម្ដាយគួរចំណាយពេលលេងជាមួយកូន នាំកូនៗច្រៀងលេង គូរគំនូរ និងហាត់ប្រាណស្រាលៗជាដើម ដើម្បីជួយជំរុញដល់ការលូតលាស់របស់ពួកគេ និងពុំគួរឱ្យគាត់មើលតែចម្រៀងកុមារក្នុងទូរស័ព្ទច្រើនពេកនោះទេ។ ម្យ៉ាងទៀត ទោះបីកូនធំដឹងក្ដីក៏ដោយ ឪពុកម្ដាយក៏នៅតែអាចធ្វើជាដៃគូពិភាក្សា ផ្ដល់ដំបូន្មាន និងស្ដាប់រឿងរ៉ាវក្នុងចិត្តរបស់កូនៗដែរ។

ពេលវេលាឯកជន និងពេលវេលារ៉ូមែនទិចនឹងត្រូវកាត់បន្ថយ

ពេលមិនទាន់មានកូន អាចមានពេលញ៊ាំអាហារពេលល្ងាចដ៏រ៉ូមែនទិចតែ២នាក់ ទៅមើលកុន ទៅនេះទៅនោះ dating បានដោយសេរី។ ប៉ុន្តែពេលមានកូនហើយ ស្ថានភាពមិនដូចពីមុនទេ ព្រោះត្រូវលៃពេលមួយចំណែកធំដើម្បីមើលថែ និងកំដរកូនៗ។ ទោះបីដើរលេង ក៏ត្រូវរៀបចំទំនុកបម្រុងអីវ៉ែអីវ៉ាន់កូនជាច្រើន ហើយក៏មិនសូវបានសង់ទីម៉ង់ដូចមុន ព្រោះមានសមាជិកបន្ថែមនៅជាមួយ។

គិតគូរពីអនាគតកូន

ជាឪពុកម្ដាយចៀសមិនផុតពីការព្រួយបារម្ភ តែងនឹកគិតពីកូន ទាំងរឿងដែលមិនទាន់កើតឡើងក៏ដោយ។ ពេលកូននៅក្នុងបន្ទុកក៏គិតរឿងចិញ្ចឹមបីបាច់ទាំងកាយសម្បទា ទាំងសតិបញ្ញានិងស្មារតី និងការអប់រំដូចបានលើកឡើងខាងលើ។ ដល់កូនធំពេញវ័យក៏ចាប់ផ្ដើមគិតគូររឿងកូនមានគូស្រករ និងការបែងចែកទ្រព្យសម្បត្តិទុកឱ្យកូនជាដើម។
ពេលកូនមានគូស្រករហើយ គ្រួសារថ្មីរបស់គេហើយក៏នៅតែនឹកគិតដល់ក្ដីសុខ សុភមង្គលកូនទៀត។

នេះគ្រាន់តែជាការសង្ខេបត្រួសៗពីភារៈដែលឪពុកម្ដាយគ្រប់រូបនឹងត្រូវទទួលរ៉ាប់រងប៉ុណ្ណោះ ដ្បិតអីតួនាទីឪពុកម្ដាយចំពោះកូនធំធេងណាស់ មិនអាចយកអត្ថបទមួយមករៀបរាប់អស់នោះទេ។ យ៉ាងណា អេដមីនសង្ឃឹមថា អ្នកនឹងមិនភ័យខ្លាចដោយសារតែតួនាទីទាំងអស់នេះទេ។ ទោះមានបន្ទុកច្រើនក្ដី តែឪពុកម្ដាយយើងអាចចិញ្ចឹមបីបាច់ថែរក្សាយើងឱ្យធំដឹងក្ដី មានគូស្រករ ហើយដើរមកដល់ចំណុចដែលត្រូវពិចារណាពីការមានកូន។ ហេតុនេះ អ្នកក៏អាចរៀនសូត្រតាមគំរូដ៏ល្អរបស់ឪពុកម្ដាយអ្នកទៅចិញ្ចឹមមើលថែកូនបានដូចគ្នា៕

ប្រភពសិក្សា:

តួនាទីមាតាបិតា ៥ សិក្ខាបទ | 5000-years.org
បទយកការណ៍ស្ដីពី តួនាទីឪពុកម្ដាយក្នុងការជួយបង្ហាត់បង្ហាញកូននៅផ្ទះ ក្នុងបរិបទកូវីដ-១៩ | ក្រសួងព័ត៌មាន | information.gov.kh
Learning through play | unicef.org