បច្ចុប្បន្នប្រព័ន្ធឌីជីថលជាផ្នែកសំខាន់មួយមិនអាចខ្វះបាននៅក្នុងជីវភាពរស់នៅប្រចាំថ្ងៃ។ វាទទួលបានប្រជាប្រិយភាពខ្លាំងពីសំណាក់អ្នកប្រើប្រាស់ ដោយសារតែភាពងាយស្រួលនិងរហ័សទាន់ចិត្តរបស់វា រាប់បញ្ចូលទាំងការផ្ដល់ព័ត៌មានឱ្យគ្នាទាន់ពេលវេលា ហើយអាចសិក្សារៀនសូត្រនិងអាចធ្វើការពីចម្ងាយបានទៀតផង។ មិនតែប៉ុណ្ណោះ យើងសង្កេតឃើញថាសេវាកម្មហិរញ្ញវត្ថុ ជាពិសេសការទូទាត់ប្រាក់តាមប្រព័ន្ធឌីជីថលបានក្លាយជាជម្រើសដ៏ពេញនិយមមួយក្នុងចំណោមអ្នកប្រើប្រាស់សម័យថ្មី។ ប៉ុន្តែវាក៏អាចផ្ដល់បញ្ហាមួយចំនួនដល់យេីងផងដែរ ប្រសិនបើមានឧប្បត្តិហេតុមិនបានព្រាងទុកដូចហេតុការណ៍កាលពីប៉ុន្មានថ្ងៃមុននេះ។ តេីវាអាចបង្កបញ្ហាអ្វីខ្លះទៅ ?
១. ប្រព័ន្ធរអាក់រអួល
ថ្វីដ្បិតថា បច្ចេកវិទ្យាឌីជីថលជួយសម្រួលដល់ការទូទាត់ប្រចាំថ្ងៃ ក៏ប៉ុន្តែការពឹងផ្អែកទៅលេីបច្ចេកវិទ្យាឌីជីថលទាំងស្រុងនិងគ្រប់ពេលក៏អាចនាំនូវផលវិបាកមួយចំនួនដល់ជីវភាពប្រចាំថ្ងៃផងដែរ ប្រសិនបើស្រាប់តែមានការរអាក់រអួលណាមួយកេីតឡើង។ តួយ៉ាងដូចជាការរអាក់រអួលនៃសេវាធនាគារទាំងក្នុងកម្មវិធីទូរស័ព្ទដៃនិងនៅតាមស្ថាប័នធនាគារមួយចំនួនដែលនាំឱ្យមានការខកខាននិងប៉ះពាល់ដល់ដំណើរប្រតិបត្តិការផ្សេងៗមិនបានរលូននិងមិនទាន់ពេលវេលា។ ទោះបីការអាក់ខាននេះកើតឡើងដោយសារការកែសម្រួលឬធ្វើបច្ចុប្បន្នភាពប្រព័ន្ធក៏ដោយ តែវាបានបង្កឱ្យមានការរាំងស្ទះដល់សកម្មភាពសេដ្ឋកិច្ចការប្រកបរបររកស៊ីលក់ដូររបស់បងប្អូនអាជីវករដែលត្រូវទូទាត់តាមបែបឌីជីថល។ ក្នុងករណីដូចនេះ ទើបយើងកត់សម្គាល់សំខាន់ថា រាល់អាជីវកម្មនិងអ្នកប្រេីប្រាស់ទាំងអស់ គួរមានសាគួរលុយខ្លះនៅជាប់ខ្លួន និងមិនពឹងលើបច្ចេកវិទ្យាទាំងស្រុង ដើម្បីចៀសវាងជួបការលំបាកបែបនេះម្តងទៀត។
ចុចទីនេះដើម្បីស្វែងយល់បន្ថែម: អត្ថប្រយោជន៍នៃការទូទាត់ប្រាក់តាមប្រព័ន្ធឌីជីថល
២. បែកធ្លាយព័ត៌មានឯកជន
បច្ចេកវិទ្យាឌីជីថលជួយសម្រួលក្នុងការប្រមូល និងរក្សាទុកទិន្នន័យទាក់ទងនឹងព័ត៌មានឯកជន។ ព័ត៌មានឯកជនរួមមានព័ត៌មានក្នុងគណនីធនាគារ ព័ត៌មានលម្អិតនៃប័ណ្ណឥណពន្ធ ឬកាតឥណទាន ព័ត៌មានផ្ទាល់ខ្លួននានានៅក្នុងកម្មវិធីទូរសព្ទដៃរបស់អ្នក ដែលនាំផលអវិជ្ជមានដល់អ្នកប្រសិនបើត្រូវបានប៉ះពាល់ បែកធ្លាយ ឬទាញយកតាមប្រព័ន្ធអ៊ីនធឺណិតដោយជនទុច្ចរិត ដោយសាការរក្សាមិនបានល្អ ឬអសុវត្ថភាព។ ហេតុនេះ ទើបវាទាមទារឱ្យមានការត្រួតពិនិត្យ និងកែសម្រួលប្រព័ន្ធឱ្យបានខ្ជាប់ខ្ជួនជាប្រចាំ ដើម្បីចៀសវាងការបែកធ្លាយ ឬលួចយកព័ត៌មានទាំងនេះទៅលក់បន្ត ឬការលួចលុយចេញពីគណនី ដែលសុទ្ធសឹងជាអំពើខុសច្បាប់។
៣.ការខាតបង់
ទាក់ទងនឹងបញ្ហាខាងលេីនេះ ប្រសិនបេីព័ត៌មានឯកជនត្រូវបានប្លែកធ្លាយ ឬមានការរអាក់រអួលណាមួយ ទាំងអតិថិជននិងអាជីវកម្មតូចធំនឹងរងការខាតបង់ច្រេីនទាំងពេលវេលា និងប្រាក់កាស។ ក្នុងករណីនេះ មិនដឹងថាអាចទាមទារយកលុយដែលបាត់ទៅមកវិញបានឬអត់ ហើយបើយកមកវិញបានមិនដឹងថាត្រូវចំណាយពេលយូរ និងត្រូវចំណាយថ្លៃសេវាផ្សេងៗទៀតប៉ុណ្ណាទម្រាំបានលុយត្រឡប់មកដល់ដៃវិញ។ ក្រៅពីនេះ ស្ថាប័នទាំងឡាយថែមទាំងអាចរងការខូចខាតដល់កេរ្តិ៍ឈ្មោះព្រោះតែអតិថិជនពួកគេបាត់បង់ទំនុកចិត្តទៅលើអាជីវកម្ម និងអានឈានដល់ការប្តឹងផ្ដល់ទៀតផង។
យើងអាចនិយាយបានថាទោះបីបច្ចេកវិទ្យាមានគុណសម្បត្តិយ៉ាងណាក៏វានៅតែមានគុណវិបត្តិជាមួយគ្នាដែរ។ ដូច្នេះហើយអ្នកគួរតែប្រុងប្រយ័ត្នព័ត៌មានរបស់អ្នកហេីយនៅតែអាចបន្តទុកប្រាក់ក្នុងកុងដោយមានទំនុកចិត្តមិនបាច់ព្រួយបារម្ភព្រោះបញ្ហាអាចនឹងដោះស្រាយបានជាធម្មតា៕
© 2021 - 2022 KAKCENT | រក្សាសិទ្ធិដោយកាក់សេន
សូមទាក់ទងមកពួកយើង ប្រសិនបើអ្នកចង់យកមាតិកាយើងទៅប្រើប្រាស់បន្ត។
